3
Pani nolenebi mini beregedolenebi mini dunu bia holenebi ngago ogo
1 Anduane Homogohanda i̱hondo keba timbuni howa i̱ minu bayagola i̱na tandaga timbuniore nalu haru.
2 Ibugua i̱ warape halu wá kagoha polilono ko arumaha puabo holiyanaga warape haya.
3 Ibugua i̱ hanguore minu balu haabo kagoni.
Horo bibahendengi anidagua biaabo halu kagoni.
4 Ibugua i̱ baabo hayagome i̱naga kuni bibahende podabaga biai halu i̱naga tingini bibahende gedaore hai halu pirilabaga biai ka.
5 Ibugua genda tandagabi tara tara mo ngidagome i̱ mo dariba henego kogoni.
6 Ibugua i̱ abale halu homayarunibi dege bu hinu helalu arumaha i̱ ibagabu holiya heledagoni ndobe.
7 Ibugua i̱ dariba ho heledagola golalu ibida pora bialu pobe naheore kogo.
Ibugua i̱naga gi geru pu senime minu daribaho ngeledagola heyalu ibagabu holenebi nakarulapeore kogoni.
8 I̱na Anduane Homogohondo i̱ biamogo bia lalu kogola
ibugua i̱naga bi larogo hale nahaga kagoni ndobe.
9 I̱ ibaga bialu porogohabi ibu hapai halu ibuni hai ka.
Ibugua i̱ hariga poleberogoha ege to̱le̱ wia pai haradagua biragoni.
10 Anduane Homogohanda biango handalehe timbuni mini beame nogo tara karu ibiragola bo nole ohowa harigani yu biragadagua
budi gabua timbuni laionome mbirale bo nole nendebu hagadaguabi
11 i̱ harigani pialu hewaria ibugua i̱ minu balu hariga gibuniha gililo yalu pubagi howa
i̱naga tingini budubaga buwa i̱ biamogo bulene mbira naheha ngelalu piya.
12 Anduane Homogohanda i̱ timume bogole edaho haya.
13 Ani edaho howa ibugua tegelape halu i̱naga gubalinini baya.
14 Anidagua biyago hondowa i̱naga wali agali bu karume i̱ hondo oba halu mege bi lalu iba gana lalu ka.✡Yob 30.9, Iba 69.12, Yar 20.7
15 Ibugua i̱ genda dewaore mo ngidagome i̱ha wu to̱leda.
I̱naga tomo nolenebi iba nolenebi kaubi ale dege ngiaga kagoni.
16 Ibugua i̱naga dengui dindiha mo guya howa
ma mo nigi biragola ege to̱le̱me i̱naga ne hondo biba haradagua bidagoni.
Ani bidagome i̱ mo ko henego kogoni.
17 Ainde i̱naga bu miniha mo palia howa turu ho holenego henge nawiore kogoni.
Bayale holenenaga mana damene bibahende embeda hai harugoni.
18 Anidagua bidogome manda bu handalu koria Anduane Homogohanda i̱hondo mbirale bayale ngulebiragonaga mini dunubia ho harugo ai mbira nangulebirada.
Ani bialu i̱ dindi ogoria ho lu nabi abale homolobodane hendedo.
19 Agalime dindi andabi ibuninagaore lenego mbira nahe bame hopebe dege biaga mbira kaligo ale i̱ harudane hendedo.
I̱ha tandaga uruni damene mo ngirago nalu koria mbirale kaubi ngaligobi neha nalu kogoni ndobe.
20 Horo bibahendengi i̱na genda uruni mitangibu haabo kogome i̱naga bu miniha genda timbuniore ho kogoni.
21 Anigo ai mende nde mitangi bu kogome mini dunu bia ho kogoni.
22 I̱na mende mitangi bidogo ogo.
Anduane Homogohanda ina gubalini ho haabo haga kagoni.
Ibugua ina dara howa biamogo biaabo holebira.
Ibunaga mana ogoni ereba nahe wiaabo holebira.
23 Ibugua ina dara holene irane nawinigoyu
ibunaga dara holene horo bibahendengi gahenge ibaho wiaabo haga kagoni.✡Har 34.6, Seb 3.5
Anduane Homogo-o egerebagi bibahendengi ni tagira ibaabo hagadagua
í̠naga dara holene inahondo walia haabo haga í̠ mini bilinahe kegoni.
24 I̱na mbirale ngarunaga mini dege dindiho nahe
Anduane Homogo ibu hangu karulape kagoni lo mitangi bialu holenego bayaledane hendedo.✡Iba 16.5, 119.57, Yar 10.16
Ani mitangi bidogo ai ibugua i̱ biamogo bilonaga i̱na mini dunu bia ho kogoni.
25 Wali agali tinime Anduane Homogo taya bialu ibunihondo mini dunu bia ho haga karu tihondo ibugua bayale biaga kagoni.✡Iba 33.18, Ais 30.18, Mai 7.7
26 Anigo Anduane Homogohanda wali agali ti mo wialu pele milonaga tigua ema nabi hondo holene nga.
27 Ti wandari igiri daliahe wene kangi howa genda tandaga uruni yu hayagua nde karulapeore holebira.
28 Anduane Homogohanda mbiralihondo genda mo miyagua nde bi nale wahalu ibu pubagi howa ema nabi ibuni hangu holene nga.
29 Ani biragola Anduane Homogo ibugua ibu biamogo bulebira badago lowa ibuni mo dindiha howa ema nabi hondo holene nga.
30 Maru karume ibuhondo bi ko lalu minu bayaguabi nde harugo ani bilo ibu ema nabi holene nga.✡Ais 50.6, Md 5.39
31 Anduane Homogohanda wali agali dara howa biamogo biaga kago
ibugua ti erembira mu haabo naholebira.✡Iba 94.14
32 Anigo Anduane Homogohanda wali agalihondo genda yilo mo muwa dege
mani ibugua ti dara ho dai biaga.✡Iba 78.38, 106.43-45, Hos 11.8
Ibugua wali agali gubalini timbuniore haabo haga kagome ani biaga ka.
33 Ibugua wali agali mbirago bame genda yuwa tandaga nalu helo mo ya holenego ibu hame nalaga ka.✡Ese 33.11, Hi 12.10
34 Maru karume garabaya biabe biahaga bu karu bo hengedayaguabi Anduane Homogo ibu manda bu ka.
35 Mbiralime Anduane Homogo Daligaorene Daliga kagonaga deni bulene ngago mbira bialu karia
ogoni nabilonaga mendealime hongo howa bope hayaguabi ibuni manda bu kagoni.
36 Mbiralime ibunaga nenege kagohondo ke̱ howa bameoreni godi laba layaguabi
mbirale mana uruniale damenego hondowa Anduane Homogo ibu manda biai howa turu nahaga ka.
37 Mbirale bibahende ngaru íbu ha lalu ái ibugua bi laragola hale halu íbu hai habehebe.
Anduane Homogo ibugua hangu ogoni lolene karulapeore kagoni.
38 Anduane Homogo Daligaorene Daliga kago ibugua bi laragola mbirale ko holene bayale holenebi bibahende tagira ibaga.
39 Wali agalime ko biyagonaga pani nayagua nde bi gomogomo lolene henge nawigo aginaga lolebe.
40 Iname mana bialu harimaru manda bialu dabolene nga.
Dabalu mana ko bialu harimaru yu wahalu Anduane Homogo ibuni karia dai bulene nga.✡Iba 119.59, 139.23, 1 Ko 13.5
41 Iname gi dogola daga halu bu miniha mbira do nahe howa Ngode Datagaliwabe dahuliya andaga kagohondo bi lalu,
42 Anduane Homogo-o iname í̠hondo mine halu mana ko dewa bialu harimago
í̠na ko ogoni domo wa nahe kegoni.
43 Í̠na inaore talima ibaga bialu bo homa hai harigoni.
Í̠na inahondo keba timbuniore harigome í̠naga dara holene mo yi harigoni.
44 Í̠na inahondo lembo timbuni ho howa inanaga bi hale naholenaga hale hangaiho kegoni.✡Iba 97.2, Dug 2.1, Seg 7.13
Í̠ hari beralibame kabu bupe haradagua bu kegola inanaga bi laramago í̠ keria anda naibagabe tobaheda.
45 Í̠na ina bopeore ho heledegome wali agali dindi tara tarani bu karume handalu karia ina wali agali ko habane nabulene dodohe kamaria hondo kagoni ndobe.
46 Ina waitigi bu karuni bibahendeme ina yo handalu mo nagaloneore halu ka.
47 Mbirale tara tara tagira ibirarume ina mo gi timbuni halu
ina mo pila haga bialu kagome mo ko heneore kamagoni.
48 I̱naga wali agali burupale darabi bu karuni hondowa ina dugu bialu i̱naga de iba pugu lalu iba pora biradagua pigipugu lalu kogoni.
49 I̱na dugu berogoni haru biru lalu wa naholebero.
I̱naga de iba pugu lalu pialu haabo holebira.
50 Anduane Homogo ibunime dahuliya andagaha howa handa dali halu
i̱ dugu bialu haabo koria dege de handaragola dugu nabi waholebero.
51 I̱naga tanoha wali bedaru tiha mo ko holene bu ngaru dege ngola halu biraabo kagonaga de hondowa
i̱naga bu miniha tandaga timbuniore nalu kogoni.
52 Agali maru karume i̱la mo waitigi halu i̱ bameore bo wahole hene.
Agalime ega bole taliagadagua i̱ bo wahole talima ibaga bini.
53 Tigua i̱ gundu uliha minu bape howa i̱ homelo bole lowa ege to̱le̱ dugualu uli biagoha ba pebe biya.
54 Ibame i̱ namu lai hole biyagola ai i̱ homalu ereba harogonida mitangi biru.
55 Ani biyagola i̱na gundu uliha howa Anduane Homogo í̠ olarugoni.
I̱na humbirini andagaha haradagua buwa í̠naga mini lalu i̱ gini mialu biamogo bia laru.✡Yar 38.9, Yna 2.2, Ab 16.24-25
56 I̱na í̠hondo ogodagua bia lalu olarugola Anduane Homogo-o í̠naore nde hale hariya.
57 Hale howa í̠na i̱ hewaria kaware ibuwa i̱hondo lalu, Gi nahe habe, lalu langirigoni.✡Iba 145.18, Ais 41.10, 41.14
58 Anduane Homogo-o í̠na i̱ pele ngialu i̱ waitigi bu hearume i̱ nabelo hapai harigoni.
Í̠na i̱ pele ngirigola áyu i̱ bayale kogoni.
59 Anduane Homogo-o agali i̱ mo ko hole bialu hayaruni í̠ manda bidegoni.
Anigo i̱ waitigi uruni bope halu i̱ wayali holiya biamogo bibe.
60 I̱ baba waitigiore ho karunime i̱hondo keba haga kago í̠ manda bu kegoni.
Tigua i̱hondo mana ko ngaru bule manda manda bialu kagoni ndobe.
61 Urunime i̱ hondo oba halu mege biyago í̠ hale harigoni.
Anduane Homogo-o tigua i̱hondo bule manda birago í̠ manda biai ho kegoni.
62 Horo bibahendengi tigua i̱ mini lalu bo waholenaga bi lala bialu hariga taya bialu kagoni.
63 Tigua heyu howabi ha̱lo biruwabi iba gana i̱ bo waholenenaga mege bi hangu lalu laabo halu ka.
64 Anduane Homogo-o tigua mana ko o biyaruni handalu í̠na ti pani nelo mibe.
65 Tinaga mini mo luluya halu ti koorene ko helo ha habe.
66 Ti mbiraoreli hangubi mbira dindini yu wa nahelo í̠na keba timbuniore howa talima ibaga bialu bo wahai habe, laro.