Taidasa
Polohanda Taidasahondo beba ogo gilibu wia hene
Mbuga ogoha gilibu ngarunaga nemandi ogo
Taidasa ibu Yu agali ndo hene. Ibugua Kerisohondo mini mbiraore wu howa Polola Bi Mana Debene lawai hama ibaga bialu hene. Kiridi dindiha tano bibahendeni Keriso hameigini hearu hondo helo Polohanda Taidasahondo, Í̠ hondo habe, lalu helalu pene. Puwa mani Polohanda Taidasa biamogo bialu beba ogo gilibu wia hene.
Polohanda beba gili binidagoni irane tebira wiago hondowa mo walia halu gili bini.
Mbira
Keriso hameigini karu haru helo mbirali dabo helalu howa mana ogobi biagane holene nga manda buwa helabe, lalu gili bini.
Mende
Wali agalibi wandari igiribi garabaya biabe ale bia haga karubi urunihondo agua bialu habe ogodagua lalu habe lalu lawai habe, lalu gili bini.
Tebone
Keriso hameigini karume ogonidagua bialu holenebi mini mo palia hagane yu holenebi nenegene hinulenebi lowa marume handabe manga halu lai lalu karuhondo bi wai nabilimu lalubi Keriso hameigini karu mo tale bu baga nabilimu lalubi bayuwa hondo holene nga, lalu lamaro bialu gili bini.
Bu̱lu̱ baga buwa kuni gilibu ngago
1.1-4
Gili binigonaga irane 1.5-16
Keriso hameigini karu hondo hagane helo dabo helolenego 2.1-15
Keriso hameigini karume biabe tara tara bulenego 3.1-11
Keriso hameiginime bayale bulene mugubelo hondo holenego 3.12-15
Lamaro bialu lenego
1
Polohanda Taidasahondo beba ogo gilibu wia hene
1 I̱ Polo Ngode Datagaliwabenaga biabe biahagabi Yasu Kerisonaga abosolobi kogoni. Wali agali Ngode Datagaliwabehanda dabayaru ti ibuhondo mini bilina ho haabo helobi bi mana henene yu tiga biai helobi i̱na ti biamogo buliya ibugua i̱ dabo helaya. 2 Haabo holene yule mini dunubia ho holene tene mana henene ngagoria nga. Haabo holene ogoni Ngode Datagaliwabe ibu mini bilinahe howa bibahende nawabi heangi, Ngulebero, lalu heneneore lowini.✡Lm 16.25, Kl 1.27, 2 Ti 1.1, 1.9, 1 Pi 1.20 3 Ngode Datagaliwabehanda horo mbiru pongo bo winigo lola hayagola holene ogoni ibunaga bi mana langialu inahondo mo pani haya. Inanaga Pele Ngiaga Ngode Datagaliwabe ibugua bi mana i̱na wali agalihondo lamuliyanaga biabe ogoni i̱hondo ngiya.✡Eb 1.9-10, 1 Te 2.4, 1 Ti 1.1, 1.11, 2.3, 2 Ti 1.10, Ta 2.10, 3.4
4 Ngode Datagaliwabehondo mini mbiraore wu harabaligo manda buwa Taidasa-o i̱ igini henene kego i̱hondo beba ogo gilibu wia haro.✡Lm 1.7, 2 Ko 8.23, Ga 2.3, 2 Ti 1.2, 4.10
Aba Ngode Datagaliwabebi Pele Ngiaga Keriso Yasubi libugua í̠hondo biamogo bia holenebi mo palia holenebi ngilo hamelo ko.
Kiridini howa Taidasanaga biabe bulene winigo ogo
5 Biabe biai nahe bulene maru wiago biai habelo i̱na í̠ Kiridi dindini habe lalu piru. Í̠na bialu habe larugo ogo. Tano bibahendeha Keriso hameigini karu haru helo agali ala hene miniwi karu mbira mbira dabo helabe, laru. 6 Agali ala hene miniwi uruni ti kagua nabiagamebi one mbira hangu beremebi tinaga waneiginime Keriso mana yu tiga biaga howa kagua nabi aba ai̱yalanaga bi larago hale hagamebi agali ogonibigo helolene nga, laru.✡2 Ti 2.24-26✡1 Ti 3.2-7 7 Agali Ngode Datagaliwabenaga wali agali haru holebirago mana tiga tiga biagago hangume haru helo dabo helabe. Ti mine nahagabi abale keba nahagabi lulu yule waini iba timbuni nanagabi gungu nabiagabi muni dibaudu nahagabi helolene nga.✡LBM 10.9, 1 Ko 4.1, Eb 5.18, 1 Pi 5.2 8 Tigua wali agali nenege hinagabi bayale bibahende ngago bulene hame lagabi mini haru hagabi mini tigabiwibi Ngode Datagaliwabehondo tini loma bia henebi tinginime hame lagaru bibahende haru hai hagamebi holene nga. 9 Tigua bi mana heneneore lameramaligoni hangu hongo howa yu holene nga. Ogonibi howa tigua bi mana henene bayuwa lawai haragome wali agalinaga mini mo hongo halubi maru bi mana hame nalaga karu ti nakarulape harimadane hendelo walia halubi holebira.✡1 Ti 1.10, 1.15, 2 Ti 1.13, 2.15, 4.3, Ta 2.1
Kiridi dindini ke̱ haga agali dewa ka, lenego ogo
10 Agali dewa mana henenego yu tiga nabiaga howa tigua bi nahabane ale la gimbu bialu wali agali mo hondo halu ka. Ogoni Yuali dongone podo mabu biaga karume ani biaga ka.✡1 Ti 1.6, 4.7 11 Tigua muni dimagoli howa mana ko nakarulape ngaru hangu lawai halu damene dewa bu karu mo gura hangu hangu helo mini burugula halu ka. Agali urunibime bi larago nalalimu lolene nga.✡Md 23.14, Yo 10.12, 1 Ti 6.5, 2 Ti 3.6, 1 Pi 5.2 12 Bamba Kiridiali mbira tininaga mana latagi halu mbiwia haga henegome lalu, Kiridiali ke̱ hagabi nogo gabua ale ko hagabi tomo timbuni nagimbu buwa biabe manga hagabi ka, lene. 13 Ibugua bi ogoni lenego heneneore lene. Irane ogonigo ti Ngode Datagaliwabe mana hangu yu tiga biaabo helo í̠na ti hongo howa talialu lamibe.✡2 Ti 4.2, Ta 2.2 14 Yualinaga mamali tebi agali degeme mana wabu wini ngarubi ti wahai helo ani talibe. Agali urunime mana henene ngaru hame nale wahai halu mana nakarulape ogoni lawai hagane tene ti ka.✡1 Ti 4.7, 2 Ti 4.4 15 Mini tigabiwi karume mbirale bibahende ngago tigabi dege mitangi biaga ka. Anigo Yasuhondo mini mbiraore nawi karume bibahende ngago ko dege mitangi biaga ka. Tinaga minibi mandabi ko hai hene ka.✡Md 15.11, Lg 11.39-41, Lm 14.14, 14.20, 14.23, 1 Ko 6.12 16 Tigua bi degeme lalu, Ina Ngode Datagaliwabe mana manda biaihe kama, lagago tigua mana bia tagi haragome, Ina Ngode Datagaliwabe mana manda nabi kama, lalu walia haga. Tigua wali agalihondo handabe manga hagabi mana tigabi bibahende ngaru wahagabi ogonibi howa ti bayale mbira nabibehe holebira.✡Lm 1.28, 2 Ti 3.5, 3.8, 1 Yo 1.6, 2.4, Yu 4
✡1:2: Lm 16.25, Kl 1.27, 2 Ti 1.1, 1.9, 1 Pi 1.20
✡1:3: Eb 1.9-10, 1 Te 2.4, 1 Ti 1.1, 1.11, 2.3, 2 Ti 1.10, Ta 2.10, 3.4
✡1:4: Lm 1.7, 2 Ko 8.23, Ga 2.3, 2 Ti 1.2, 4.10
✡1:7: LBM 10.9, 1 Ko 4.1, Eb 5.18, 1 Pi 5.2
✡1:9: 1 Ti 1.10, 1.15, 2 Ti 1.13, 2.15, 4.3, Ta 2.1
✡1:11: Md 23.14, Yo 10.12, 1 Ti 6.5, 2 Ti 3.6, 1 Pi 5.2
✡1:15: Md 15.11, Lg 11.39-41, Lm 14.14, 14.20, 14.23, 1 Ko 6.12
✡1:16: Lm 1.28, 2 Ti 3.5, 3.8, 1 Yo 1.6, 2.4, Yu 4