1 Eh, my braddahs an sistahs, I like you guys know bout da tings dat God Spirit give us guys da powa fo do. Not good if you donno dat! 2 You guys know awready, dat befo you guys wen come God peopo, someting wen make you guys erytime go da wrong way an follow da idol kine gods dat no can even talk, an you wen pray to dem. 3 Az why I like make shua you guys know dat nobody dat stay tight wit da Good An Spesho Spirit goin tell, “Dam you, Jesus!” An nobody goin tell, “Jesus stay in charge!” if dey no stay tight wit da Good An Spesho Spirit.

4 ✡12:4: Rome 12:6-8God Spirit give diffren peopo da powa fo do all diffren kine tings, but all dat come from da same Spirit. 5 Get diffren kine ways fo work fo God, but all da worka guys get da same One In Charge. 6 God make all diffren kine tings happen fo all da diffren peopo, but get da same God dat stay make eryting happen fo erybody.

7 God show erybody wat his Spirit stay do, dass fo erybody help each odda. 8 He give his Spirit to some guys fo give dem da powa fo tell odda peopo wass da bestes ting fo dem do. Fo odda guys, da same Spesho Spirit give um da powa fo dem tell wat dey undastan. 9 He give odda peopo da powa fo trus God plenny cuz dey stay tight wit his Spirit. Odda peopo, dey can make da sick peopo come good. 10 An odda peopo, God give um da powa fo do awesome kine stuff dat show da powa God get. An odda peopo, he give um da powa fo talk fo God, an oddas, he give um da powa fo figga wat spirits come from God an wat spirits not from God. Oddas can talk diffren kine language. An still yet oddas can tell wat da diffren language mean. 11 Da same Spirit, he do all dis. He give erybody da powa fo do da ting dat he like dat guy fo do.

12 ✡12:12: Rome 12:4-5Same ting wit da body, you know. You ony get one body, an inside da body, get plenny parts. No matta get plenny parts inside da body, az ony one body.

Same ting wit God Spesho Guy Christ an his ohana. 13 Us guys stay tight wit da one Spirit. Az why, wen us guys wen get baptize, us all come jalike we one peopo. No matta we Jew o not, no matta us gotta work like one slave o not, God wen give all us guys da One Spirit, jalike us all drink watta from da same puka.

14 Inside oua body, no mo jus one part—get plenny diffren parts. 15 Wat if one foot wen go tell, “Me, I not one hand, so gotta be, I not from dis guy body!” You tink dat mean da foot not from da same guy body? No way! 16 An wat if yoa ear wen go tell, “Me, I not one eye, so gotta be, I not from dis guy body!” Same ting, you tink dat mean dat da ear not from da same guy body? Not even! 17 If all yoa body was one eye, how you goin hear? If all yoa body was one ear, how you goin smell? 18 But you know, God wen make oua body one ting, an he wen put all da diffren kine parts inside, jalike he wen like fo do. 19 If oua whole body was jus one part, den no mo body, aah? 20 But fo real, oua body get plenny parts, an dass wat make da whole body one ting.

21 Da eye no can tell da hand, “I no need you, you know!” Da head no can tell da foot, “I no need you, you know!” 22 Get tings inside da body dat us guys tink not real strong, but eh! we need um. 23 Get odda tings inside da body dat us guys figga not importan, but eh! we take good kea dem. An get tings inside da body, we figga dey not fo show, so we make um fo dem look good. 24 Da tings inside da body dat look good, no need do notting fo dem.

But you know, wen God wen put eryting togedda fo make da body, he wen take da tings dat not so importan an make um importan, 25 cuz he no like da body stay all split up. He like eryting inside da body fo work togedda wit each odda, same same. 26 If one part a da body suffa, all da odda parts suffa, same time. If one part a da body stay awesome, all da odda parts feel good, same time.

27 Same ting wit you guys. You jalike Christ body. Erybody jalike one part inside Christ body. 28 ✡12:28: Efes 4:11From all da peopo dat come togedda fo church, da numba one importan ting, God sen some guys all ova da place fo tell wat he tell. Numba two, he make some peopo his talka guys. Numba three, he make some peopo teachas. Den, he give some peopo da powa fo do all kine awesome stuff dat show da powa God get. Odda peopo can make da sick peopo come good. Odda peopo can help. Odda peopo can bring peopo togedda fo do stuff. An odda peopo, he give um da powa fo dem talk diffren kine language.

29 Now, wat you guys figga? You tink God sen erybody all ova da place fo tell wat he tell? No ways. You tink he make erybody talk fo him? No ways. You tink he make erybody teacha guys? No ways. You tink he make erybody do awesome kine stuff? No ways. 30 You tink he give erybody da powa fo make da sick peopo come good? No way. You tink he make erybody talk diffren kine language? No ways. He make erybody tell wat da diffren kine language mean? No ways.

31 Now, you guys go all out fo handle da mos importan stuff God give you fo do.

Still yet, I like show you guys da bestes way fo live: