1 ✡16:1: Rome 15:25-26Now we like talk bout da money dat you guys like give fo help da peopo dat stay spesho fo God. I wen tell da church peopo all ova Galatia, wat fo do wit da money, an now you guys, gotta do da same ting. 2 Ery Sunday, erybody suppose to stash some money fo dis, from wateva dey wen make. No good you guys try fo put da money togedda afta I come dea. 3 So, wen I come ova dea, you guys go pick da bestes guys fo carry dis money fo you guys give da church peopo Jerusalem side, an I goin write lettas fo tell da church leadas who dem. 4 An if you guys figga az good fo me go too, den we all go togedda.

5 ✡16:5: JGuys 19:21Afta I go thru Macedonia, den I like go by you guys. But firs, I gotta go Macedonia. 6 Den maybe I can stay wit you guys short time, o even all winta. Den you guys can help me go da nex place from dea. 7 Right now, I figga no good ony pass by you guys cuz den I ony goin see you guys short time. Mo betta I go dea layta cuz den I stay shua I can hang out wit you guys long time if Da One In Charge let me. 8 ✡16:8: Pries 23:15-21; Rules2 16:9-11✡16:8: JGuys 19:8-10But I goin stay ova hea Efesus side till Pentecos time. 9 Cuz az jalike God wen open one door ova hea fo me do plenny, no matta get plenny peopo dat like go agains me.

10 ✡16:10: 1Cor 4:17Timoty, wen he go dea by you guys, take kea him so he no need worry bout notting. He one worka guy fo Da One In Charge, jalike me. 11 So no let nobody make to him jalike he notting. Help um out befo he go. So stay good wit him, fo him come back by me. Me an da odda braddahs, we all stay wait fo him.

12 Anodda ting, oua braddah Apollos, I wen give him plenny good kine words fo him go by you guys wit da odda braddahs. But right now, he no like go. Bumbye wen can, he goin go.

13 Eh! Watch out! Stay solid an trus God! No sked! Stay strong! 14 Eryting you guys do, do um wit love an aloha.

15 ✡16:15: 1Cor 1:16Eh, my braddahs an sistahs, you all know Stefanas an his ohana guys, aah? Dey was da firs peopo dat wen trus Christ from all ova dea Akaia side by you guys. An dey wen go all out fo kokua all da peopo dat stay spesho fo God. 16 I like tell you guys fo lissen dat kine peopo an do wat dey tell you fo do. Dass erybody dat work hard togedda lidat. 17 I wen stay real good inside cuz Stefanas, an Fortunatus, an Akaicus wen come ova hea cuz dey wen do wat you guys no can do. 18 Dey wen make me come jalike new one mo time inside, an dey wen do da same ting fo you guys. Dat kine peopo, show um respeck.

19 ✡16:19: JGuys 18:2Da peopo dat come togedda fo church all ova West Asia side, dey like tell you guys “Aloha!” Aquila an Priscilla, an all da odda peopo dat come togedda inside dea house, dey fo real kine like tell you guys “Aloha!” too cuz dey stay tight wit Da One In Charge. 20 All oua Christian braddahs an sistahs ova hea like tell you guys “Aloha!” An you guys, give each odda one hug an kiss cuz you da peopo dat stay spesho fo God.

21 Now dis me, Paul, an I stay write dis wit my hand:

22 Anybody dat no mo love an aloha fo Da One In Charge, dey goin get punish fo shua!

“Marana Tha!” You know wat dat mean? “Eh, Boss! Come back!”

23 I like fo Da One In Charge, Jesus, do plenny good tings fo you guys. 24 I get love an aloha fo all you guys cuz us all stay tight wit da Spesho Guy God Wen Sen, Jesus!