Do Wat Make Odda Peopo
Stay Good Inside
Stay Good Inside
1 You know, us guys dat stay strong inside, us gotta kokua da peopo dat no stay strong enuff inside fo handle all da stuff dat happen. No good we ony do da tings dat make us guys stay good inside. 2 Real good fo us guys do wass good fo oua braddahs an sistahs fo make um come mo strong fo handle all dat. Den dey goin stay good inside too.
3 ✡ 15:3: Songs 69:9Even Jesus Christ neva do wat he wen do fo ony him stay good inside. Befo time inside da Bible, God tell bout da bad kine stuff goin happen to Jesus:
“Wen dey talk harsh kine to yoa face,
Az jalike dey stay tell me da same ting.”
4 Eryting dat peopo wen write inside da Bible befo time, all dat stay inside da Bible fo teach us guys fo come mo strong fo hang in dea. Dass da good kine words we get from da Bible. Fo shua we goin know dat bumbye God goin do plenny good tings fo us.
5 God, he da One dat help us hang in dea wen we get hard time an he give us good kine words. He do dat fo help you guys live pono wit each odda. Dass how Jesus Christ live. 6 Den togedda wit da same message, all you guys goin tell how awesome God stay. God, he da Faddah a Da One In Charge, dass Jesus Christ.
Da Good Kine Stuff From God,
Az Fo Da Jew Peopo
An All Da Odda Peopos Too
Az Fo Da Jew Peopo
An All Da Odda Peopos Too
(2 Samuel 22:50; Songs 18:49; 117:1; Rules Secon Time 32:43; Isaiah 11:10)
7 So den, come each odda ohana, jalike Christ make you guys come his ohana. Den peopo goin tell how awesome God stay. 8 No foget, Christ wen come jalike one worka guy fo help da Jew guys know dat God tell da trut an do wat he tell he goin do. Christ do dis fo make all da tings God wen promise oua ancesta guys happen. 9 ✡ 15:9: 2Sam 22:50; Songs 18:49Den all da diffren odda peopos too, dey goin tell how awesome God stay, cuz dey know dat he get pity fo us guys an give us guys chance. Jalike David tell befo time inside da Bible:
“Az why I goin talk good bout you plenny
To all da odda diffren peopos.
I goin sing songs bout wat kine guy you in front oddas.”
10 ✡ 15:10: Rules2 32:43Get anodda place inside da Bible dat tell da same ting:
“Eh, all you diffren peopos from all ova da place,
Stay good inside wit odda peopo dat stay tight wit God.”
11 ✡ 15:11: Songs 117:1Get anodda place inside da Bible dat David tell:
“All you odda diffren peopos,
Go tell how awesome an good Da One In Charge stay.”
12 ✡ 15:12: Isa 11:10Isaiah wen tell dis inside da Bible too:
“From Jesse boy King David,
Goin get anodda Guy dass goin come bumbye.
He goin come da leada fo all da diffren peopos.
Dey know dat he goin come bumbye,
An dat dey goin trus him cuz dey know who him.”
13 I like you guys stay real good inside an notting bodda you cuz you trus God. Him da God dat make you guys stay shua bout wat goin happen bumbye, fo eryting come out good kine. Den da Good An Spesho Spirit goin make you guys mo strong fo wait fo wat God goin do fo you guys bumbye.
God Sen Paul All Ova Fo Talk Fo Him
14 My braddahs an sistahs, I know dis fo shua: you guys do good kine tings erytime. You guys get all da smarts you need. An you guys know how fo help each odda know da importan stuff. 15 I no shame fo write you guys dese tings, cuz az fo help you guys no foget dem one mo time. I do dis cuz God like do plenny good kine stuff fo me. 16 God wen make me one worka guy fo Jesus Christ fo tell all da diffren peopos da Good Stuff Bout God, jalike one pries guy. God do dat cuz he like all da diffren peopos come jalike one present fo him dat make him come good inside. An da Good An Spesho Spirit goin make dose peopos be good an spesho fo God.
17 Dass how come I feel real good bout all dis stuff I stay do fo God cuz I stay tight wit Jesus Christ. 18 I no even talk bout odda kine stuffs. I ony talk bout da tings Christ wen give me da powa fo do fo him. Da diffren peopos lissen Christ now, cuz a da tings I wen tell an do. 19 Christ wen give me da powa from God Spirit fo do awesome kine stuff. He do dat fo show who Christ stay. Dass how I tell all da Good Kine Stuff Bout Christ to all da peopo from Jerusalem side all da way to Illyricum side. 20 From befo time, I tink lidis: “Fo real kine I like tell bout Christ to da peopo dat neva hear da Good Stuff Bout Him!” I no like tell da Good Kine Stuff Bout Christ wea odda peopo stay tell bout dat awready. 21 ✡ 15:21: Isa 52:15Jalike da Bible tell befo time,
“Da peopo dat neva have nobody fo tell um bout God,
Dey da peopo dat goin see him.
Da peopo dat neva hear notting befo time,
Dey da ones goin undastan.”
Paul Make Plan Fo Go Rome
22 ✡ 15:22: Rome 1:13Az how come I neva go by you guys befo time. Fo long time, I wen like go dea, but no can. 23 But now, I pau my work ova hea. Long time I like go see you guys. 24 Az why, wen I go Spain side, I like stop fo see you guys dat time. Afta I stay wit you guys litto bit, you guys can kokua me fo go Spain.
25 ✡ 15:25: 1Cor 16:1-4Befo I go by you guys, I gotta go Jerusalem side fo kokua da peopo ova dea dat stay spesho fo God. 26 Cuz oua braddahs an sistahs Macedonia side an Akaia side wen give money fo kokua da pooa peopo Jerusalem side dat stay spesho fo God. 27 ✡ 15:27: 1Cor 9:11Real good dey wen make up dea mind fo do dat cuz dey know dey gotta kokua da Jerusalem peopo. Dey do dis cuz all da odda peopos from all ova get da same good kine stuffs dat da Spirit from God wen give da Jews firs. Az why da church peopos dass not Jew guys give dea Jew braddahs an sistahs some money fo help um.
28 So afta I pau dis, an make shua dat my Jerusalem braddahs an sistahs get da money, den I goin go see you guys wen I go Spain. 29 Fo shua wen I go by you guys, I goin come ova dea wit all da good kine stuffs Christ give us guys.
30 Eh, my braddahs an sistahs, cuz Jesus Christ Da One In Charge a us guys, an cuz God Spirit give you guys love an aloha, try pray hard wit me an fo me fo God help me. 31 Try aks God fo take kea me Judea side, so da peopo dat stay ova dea dat no like trus God no goin hurt me. An try pray fo me wen I go kokua da Jerusalem peopo dat stay spesho fo God fo dem stay good inside cuz a dat. 32 Den, if God like me go Rome, pray fo me stay real good inside, an fo me come by you guys fo feel mo good inside, an fo res up plenny. 33 God, he da kine god dat make you guys come so notting bodda you. I like him stay real tight wit all you guys. Dass it!
✡15:3 15:3: Songs 69:9
✡15:9 15:9: 2Sam 22:50; Songs 18:49
✡15:10 15:10: Rules2 32:43
✡15:11 15:11: Songs 117:1
✡15:25 15:25: 1Cor 16:1-4