52
(Rome 2:24; 10:15; 15:21; 1 Corint 2:9; 2 Corint 6:17; Efesus 2:17; 6:14-15)
1 ✡52:1: JShow 21:2, 27Wake up! Wake up, you Jerusalem peopo!
Come strong,
An put on yoa fancy kine clotheses!
Cuz yoa town, da one God make spesho fo him!
Da guys dat no mo cut skin mark
Fo show dey God peopo,
An da ones dat do stuff dat make um
So dey no can pray,
Dey no goin go inside Jerusalem one mo time.
2 Shake off da dirt from wea you sit.
Get up, you Jerusalem peopo!
Sit down jalike kings on top yoa thrones.
Hemo da slave band aroun yoa neck
You guys was prisonas befo time, but not now!
3 Cuz dis, da spesho message from Da One In Charge:
“I wen sell you guys to da Babylon peopo
An dey neva pay me notting fo you guys.
Now, dey let you guys go,
An I no goin pay dem notting!”
4 Dis, anodda spesho message from Da One In Charge, da Boss:
“Egypt was da place my peopo wen go fo live, da firs time.
Den, was da Assyria peopo wen give my peopo hard time,
Neva mind dey no mo da right fo do dat.”
5 ✡52:5: Rome 2:24An now, Da One In Charge tell:
“Now, wat I get hea?!
Da Babylon peopo take away my peopo
An dey no pay me notting fo dem.
Da guys dat stay lead da Babylon peopo yell plenny.
An all day dey talk bad bout who me.
6 But cuz da Babylon guys talk bad bout who me,
My peopo goin know wat kine god me.
Wen dat time come, dey goin know dat I da One
Wen tell bout dis stuff befo time.
Yeah, I da One!”
7 ✡52:7: Nahum 1:15; Rome 10:15; Efes 6:15Real nice! Wen we see da messenja guy feet
Stay coming ova da mountains
Fo tell us good kine stuff!
He make shua erybody hear,
“Eryting goin come good now!
Good tings goin happen!
Da One In Charge goin get us outa trouble.”
He tell God peopo, Jerusalem town,
“Yoa God, he da king now!”
8 Lissen up! Yoa guys dat stay watch,
Dey stay yell togedda cuz dey feel good inside!
Wen Da One In Charge come back Jerusalem, his spesho town,
All dem goin see um!
9 Sing togedda cuz you guys stay feel real good inside,
No matta Jerusalem town still stay all bus up!
Dass cuz Da One In Charge take away da sore
Dat his peopo feel inside.
He pay da price
Fo get da Jerusalem peopo outa trouble.
10 Da One In Charge goin show how strong him
Cuz he good an spesho!
An all da peopo inside all da countries,
Even da ones inside da mos far places on top da earth,
Dey goin see
How oua God get his peopo outa trouble!
11 ✡52:11: 2Cor 6:17Get away! Get away! Get outa Babylon!
No touch notting dat not spesho fo Da One In Charge!
Get outa dea!
Make shua you clean fo go inside da Temple fo pray!
Dass cuz you guys stay carry da tings fo Da One In Charge
Dat go inside da Temple.
12 But wen you guys come back from Babylon side,
No need go real fas,
Jalike you stay running away from dem.
Cuz da God yoa ancesta guy Israel wen pray to,
Da One In Charge, he goin go wit you guys.
He goin go in front you guys
An behind you guys
Fo make shua nobody catch you.
Da Guy Dat Work
Fo Da One In Charge Goin Suffa
Fo Da One In Charge Goin Suffa
13 Da One In Charge tell: “Look! My worka guy,
He do wat he suppose to do.
He do one good job cuz he know wat he stay do.
Peopo goin know he importan.
Dey all goin know who him,
An show him plenny respeck.
14 But goin be jalike befo time,
Wen plenny peopo stay bum out
Cuz dey see you guys, my peopo,
Suffa plenny.
Same ting, da way my worka guy goin look.
He goin look jalike he all bus up,
Mo den any odda guy.
An his face, no goin look jalike anybody.
15 ✡52:15: Rome 15:21He goin shock erybody in plenny countries
Cuz a da way he look.
Cuz a dat, even da king guys
Goin stay futless
An no can say notting.
Dey goin see stuff dat nobody tell um bout.
Dey goin start fo undastan stuff dey neva hear bout.”