(Rome 10:19; 12:19; 15:10; 1 Corint 10:20, 22; Hebrews 1:6; 10:30)
1 Lissen, peopo on top da earth an in da sky,
Lissen wat I goin tell.
2 I like wat I teach fall down jalike da rain.
An wat I tell come jalike wen get plenny dew,
Jalike small kine rain on top da new grass,
Jalike plenny rain on top young plants.
3 I goin tell wat kine god Da One In Charge.
I goin tell good stuff bout how big oua God stay!
4 God, he jalike one big stone.
Wateva he do erytime stay perfeck.
Eryting he do stay right.
He da God dat do wat he tell he goin do.
He no do notting wrong.
He ony do tings dass good an right.
5 But you Israel peopo,
You do pilau kine stuff dat he no like.
You not his kids no moa,
Cuz you all jam up inside.
You all crooked an kapakahi kine peopo.
6 You guys figga, az how you goin pay back Da One In Charge.
You goin do pilau kine stuff, o wat?!
You guys stupid!
You guys donno wat fo do!
God, he yoa Faddah,
He da One wen make you guys, so he own you,
He wen make you guys come one solid nation.
7 Tink bout da time long time befo time.
Tink bout all yoa ancesta guys dat wen stay alive befo time.
Go aks yoa faddah fo tell you wat wen happen.
Go aks da older peopo fo tell you too.
8 ✡ 32:8: JGuys 17:26Da God Dass Mo Importan Den All Da Odda Gods,
Wen he split up all da diffren peopos
An give all dem dea land,
He make one place fo ery peopo,
An fo da Israel peopo, he give enuff land fo all da peopo.
9 Da One In Charge wen pick his peopo,
Fo come dea God.
Da peopo dat come from Jacob,
Dey his property.
10 Da One In Charge wen find da Israel peopo inside da dry boonies,
One place wea no mo notting
Ony get wild animals stay making big noise.
But Da One In Charge stay all aroun da Israel peopo so notting hurt dem.
An he take kea dem.
He make shua notting hurt dem,
Jalike erybody make shua nobody hurt dea eye.
11 Jalike one eagle dat move stuff inside da nes,
An move aroun ova dea bebes.
Jalike Da One In Charge wen he wen put out his wings
Fo catch his peopo,
An carry dem jalike wit his feathers.
12 Da One In Charge, he da ony One wen lead his peopo,
No mo anodda god from anodda place help him.
13 Da One In Charge, he put da Israel peopo wea dey stay
In da up country inside da Canaan land.
He let um eat stuff dat grow inside da fields,
An honey from da bees inside da cliffs,
An oil from da olive trees dat grow wea get hard rocks.
14 He give um sof cheese from dea cows
An milk from dea sheeps an goats,
An da bestes kine meats from da bebe sheeps an goats,
An meat from da big kine sheeps
Dat stay Bashan side, an goats,
An wheat dat get big seed.
He let um drink da juice
From da grapes, da red wine.
15 But Jeshurun, az da Israel peopo
Dat stay do wass right,
Dey wen come real fat an do
Ony wat dey like do.
Eh, I stay talk bout you Israel peopo!
You guys eat too much an come real fat.
You wen bag from da God dat wen make you.
Da One dat stay solid jalike one big stone
Da One get you guys outa trouble,
But you guys tink he stupid, an bag from him.
16 You guys make him come jealous
Cuz you go pray to da gods fo da odda peopos.
You guys make him come real mad
Cuz you like da pilau idol kine gods.
17 ✡ 32:17: 1Cor 10:20You make sacrifice to da aumakua kine spirits.
But dat kine spirits, dey not real gods!
You guys neva know dose spirits befo time.
Dey new kine spirits fo you peopo.
Befo time, yoa ancesta guys neva stay sked a dem
O show respeck fo dem.
18 You guys wen bag, an go way from da real God
Dass jalike da Rock fo you guys,
An da One dat stay jalike yoa Faddah.
You guys foget da God dat wen bring you guys inside dis world.
19 Da One In Charge see wat his peopo stay do.
Az why he throw um out,
An no like dem be his peopo no moa,
Cuz he tell “Laytas” to wat his boys an girls stay do.
20 Da One In Charge tell, “I goin hide my face from dem,
An see wat goin happen to dem.
Cuz dey one crooked kine peopo.
Dey kids dat I no can trus.
21 ✡ 32:21 a: 1Cor 10:22; b: Rome 10:19Dey make me come jealous
Cuz dey pray to da kine gods
Dat not gods fo real kine.
Dey make me come huhu
Cuz a dea idol kine gods dat good fo notting.
Me, I goin make dem come jealous,
Cuz I goin do good tings
Fo some no good peopo, not dem.
I goin make dem come huhu
Cuz I goin do good tings fo one nation
Dat donno notting, not dem.
22 I stay huhu jalike one fire dat stay burn.
Da fire dat burn all da way
To da bottom a da Mahke Peopo Place,
Goin burn up da earth an da food dat grow on top um.
Goin burn up da foundations fo da mountains.
23 “I goin pile up plenny bad kine tings
Dat goin happen to da Israel peopo,
Jalike I goin shoot all my arrows at dem.
24 I goin make dem come skinny
Cuz dey no goin get food.
Dey goin get one real bad kine sick
Dat make dem feel jalike da sick stay eat um up.
I goin make um feel real bad
Befo I wipe um out!
I goin tell da wild animals fo bite dem,
An sen da poison kine snake
Dat crawl aroun on top da dirt.
25 Outside on da street,
Goin get war dat goin wipe out dea kids.
An even inside dea houses,
Dey goin come real sked.
Same ting fo da young guys an young wahines,
Da bebes an da ol guys,
Dey goin mahke too.
26 I wen tell dat I goin scatta dem all ova da place,
An all da peopo in da world goin foget who dem.
27 But bodda me plenny, dat maybe
Da peopo dat stay agains da Israel peopo
Goin talk bad bout dem
Cuz dey no undastan,
An cuz a dat, dey goin tell,
‘Us guys strong!
Az why we wen win ova dem!
Da One In Charge neva do all dis!’
28 “Da Israel peopo,
Dey da kine peopo dat no can tink.
Dey no undastan notting.
29 I like dem know wat fo do erytime,
An know how come all dis ting happen,
An know wat goin happen afta.
But az not how dey tink!
30 Dey no tink how come one army guy
Make one tousan Israel army guys run away!
O how come two a dea army guys
Make ten tousan Israel army guys run away!
Ony one way dat can happen!
Gotta be, Da One In Charge bag from dem!
Da One dat befo time stay strong
Jalike one Rock fo dem,
But now, he give up on dem!
31 Cuz dea gods dat stay strong jalike one rock
Fo da guys dat stay agains us guys,
Dey not strong like oua Rock!
Even da guys dat stay agains us know dat!
32 Da guys dat stay agains us,
Jalike da grape plant dat come from da Sodom peopo,
An from da fields Gomorrah side.
Sour dea grapes taste
An can kill you!
33 Da wine dey make,
Jalike az poison from snakes,
Da kine can kill peopo.
34 “Me, eryting I make one plan fo do,
I keep um in one good place wit me
An lock um up wea I put all my rich stuffs.
35 ✡ 32:35: Rome 12:19; Heb 10:30Wen dat time come, I da One goin afta da peopo fo pay um back fo da bad tings dey do.
Wen da right time come, jalike dea feets goin slip.
Da time fo wipe dem out
Stay come pretty soon.
An dey goin mahke real fas.”
36 ✡ 32:36: Songs 135:14Da One In Charge goin be da judge
Dat goin tell his peopo dey no mo da blame.
He goin show love an pity fo his worka guys
Wen he see dat dey no mo powa
An no mo da Israel guys dea,
No matta dey slave guys o not slave guys.
37 Da One In Charge goin tell his peopo,
“Eh, da odda peopo gods, wea dey stay?!
Dey suppose to be jalike one rock fo you guys fo go hide by dem!
Now, wat happen to dem?!
38 Wea da gods dat wen eat da fat from yoa sacrifice?
Da ones dat wen drink da wine from yoa drink sacrifice?
Let dose gods stan up fo help you guys!
Let dem give you guys one place fo hide!
39 “Now see, dis me, I God fo real kine!
No mo anodda god but me!
I can make peopo mahke, an I can give dem life.
I can hurt dem an I can make dem come good.
An no mo nobody can get dem
Outa da kine trouble I give um.
40 “I put up my hand to da sky
Fo make one strong promise
Fo erybody know dat I goin do um.
Dat fo shua I stay foeva!
41 Wen I make my sword sharp an shiny,
I goin use um cuz I da judge,
I goin punish da peopo dat stay agains me
An pay back da peopo dat hate me.
42 Wen I fight, goin be
Jalike my arrows stay piloot from da blood,
An my sword goin eat da bodies a da ones I goin kill
An da prisonas bodies too,
An da heads dat get long hair a da army guys dat stay agains me.”
43 ✡ 32:43: Rome 15:10; JShow 19:2All you peopos, yell plenny
Cuz you stay good inside
Wen you tink bout da peopo a Da One In Charge!
Cuz he goin pay back da ones dat wen kill his worka guys.
He goin pay back da peopo dat stay agains him.
He goin make his peopo an land
Come pono wit him one mo time.
44 Moses come wit Joshua, Nun boy, an tell eryting dis song tell fo da peopo hear um. 45 Wen Moses pau tell da Israel peopo eryting bout dis song, 46 den he tell dem, “Tink plenny bout all dis importan stuff dat I wen tell you guys today fo you guys tell yoa kids dey gotta lissen an do eryting dese rules tell. 47 Dis, az not stuff dat no mean notting fo you. Dis, az yoa life! If you lissen dis stuff I tell you, you guys goin live long time inside da land da odda side a da Jordan Riva dat you goin take ova.”
Moses Mahke On Top Mount Nebo
48 ✡ 32:48: Census 27:12-14; Rules2 3:23-27Dat same day, Da One In Charge tell Moses, 49 “Go up inside da Abarim mountains to Mount Nebo inside da Moab land, dat stay across Jericho, an den look all ova Canaan, da land I goin give da Israel peopo fo come dea property. 50 Afta you climb up da top a dat mountain, you goin mahke an go back by yoa ancesta guys, jalike yoa braddah Aaron wen mahke on top Mount Hor an go back by his ancesta guys. 51 Dis cuz you two guys neva do wat I wen tell you guys fo do, in front da Israel peopo by da Meribah watta place nea Kadesh town, inside da Zin boonies, da time you neva show respeck fo me in front dem. You neva show dat I da God dat stay good an spesho dat time. 52 Az why you ony goin see da land from dis side a da riva. You no goin go inside da land dat I stay give da Israel peopo.”
✡32:8 32:8: JGuys 17:26
✡32:17 32:17: 1Cor 10:20
✡32:21 32:21 a: 1Cor 10:22; b: Rome 10:19
✡32:35 32:35: Rome 12:19; Heb 10:30
✡32:36 32:36: Songs 135:14
✡32:43 32:43: Rome 15:10; JShow 19:2
✡32:48 32:48: Census 27:12-14; Rules2 3:23-27