33
Moses Tell God Fo Do
Good Tings Fo Da Israel Peopo
Good Tings Fo Da Israel Peopo
1 Dis da good tings dat Moses, da guy dat know God, wen tell wat he like God do fo da Israel peopo, befo Moses mahke. 2 Moses tell,
“Da One In Charge come from Mount Sinai.
He come fo dem
Jalike wen da sun come up from Mount Seir.
He shine from Mount Paran.
He come wit plenny angel messenja guys
Dat stay spesho fo him,
From da south, from da sides a da mountain.
3 You, Da One In Charge, fo shua you get
Love an aloha fo da Israel peopo.
All da ones dat stay spesho fo you,
Jalike dey stay inside yoa hand.
Dey go down in front yoa feets,
An dey learn stuff from you.
4 Us Jacob peopo learn da rules
Dat me, Moses, wen give all us guys,
Da spesho ting we get wen we come togedda.
5 God, da king fo da Israel peopo dat stay do wass right,
Wen da leadas fo da peopo all come togedda
Wit da Israel ohanas.”
6 “Let Reuben an his ohana peopo stay alive an no mahke,
But no let dem come plenny peopo.”
7 Dis wat Moses tell bout da Judah ohana:
“Da One In Charge, lissen da peopo from dat ohana
Wen dey yell fo help.
Bring dem togedda wit da odda Israel peopo.
Let dem fight
Wit da powa dey get.
Be da One dat help dem
Wen dey fight da peopo dat stay agains dem!”
8 ✡33:8 a: Outa 28:30; b: Outa 17:7; c: Outa 17:7; Census 20:13Dis wat Moses tell bout da Levi ohana:
“Da One In Charge, yoa Tummim an Urim,
Az ony fo da Main Pries Guy you stay tight wit
Fo find out wat you like.
You wen give da Levi peopo one tes Massah side,
An judge dem by da Meribah watta.
9 Dat time, da Levi guys neva make diffren kine
Even to dea faddah an muddah guys.
Dey neva even let go dea braddahs,
O even dea kids.
Cuz dey make shua fo do wat you tell, Da One In Charge,
An dey watch ova da deal you wen make wit da peopo.
10 Da Levi guys teach yoa rules to da odda Jacob peopo,
(Az da Israel peopo),
An dey teach how you make diffren kine
To da good peopo an da bad peopo.
Da Levi guys burn incense in front you,
An make burn up kine sacrifices on top yoa altar.
11 Da One In Charge, make eryting da Levi ohana do come out good.
Stay good inside bout da work dey do wit dea hands.
Cut down da peopo dat go agains dem.
So da ones dat hate dem no can make lidat one mo time.”
12 Dis wat Moses tell bout da Benjamin ohana:
“Da One In Charge get love an aloha fo dem,
I like fo dem get res an no mo trouble
Cuz dey stay tight wit him.
Da God Dass Mo Importan Den All Da Odda Gods
Take kea dem all da time,
Da ones Da One In Charge get love an aloha fo,
Jalike Da One In Charge stay carry dem on top his back.”
13 Dis wat Moses tell bout da Joseph ohana:
“I like Da One In Charge do plenny good kine stuff fo dea land,
An give dem da bestes kine dew
Dat come from da sky,
An da watta from deep undaneat da groun.
14 I like da land get da bestes stuff da sun make grow,
An da bestes stuff dat come up ery month,
15 Da bestes kine stuff from da ol mountains
An da hills dat stay foeva,
16 Da bestes stuff from da earth
An eryting inside um,
An da tings dat da One inside da bush dat wen burn
Give cuz he like you guys.
I like da Joseph ohana get all dis good kine stuff,
Cuz Joseph jalike one prince dat get one crown fo show he mo betta den his braddahs.
17 Da Joseph ohana, dey big an strong,
Jalike one king,
Jalike one bull dat born firs.
Da Joseph ohana get plenny powa,
Jalike one wild cow dat get big horn,
An wit da horn dey poke all da diffren peopos same time,
Even da one dat stay
Da mos far place on top da earth.
Az how da ten tousan Efraim ohana peopo dat come from Joseph stay,
An da tousans inside da Manasseh ohana dat come from Joseph.”
18 Dis wat Moses tell bout da Zebulun an Issakar ohana.
“You Zebulun ohana,
Stay good inside wen you go out some place.
An you Issakar ohana,
Stay good inside wen you stay home inside yoa tent.
19 Dey goin call peopo from da odda ohanas
Fo come by dea mountain
Fo make da good an right kine sacrifices ova dea.
Dey goin eat plenny stuff from da ocean,
An da rich kine stuff dat stay hide inside da sand.”
20 Dis wat Moses tell bout da Gad ohana:
“I like peopo tell dat Da One In Charge do good kine stuff fo dem
Cuz he make da Gad ohana land mo big.
Dey live dea jalike one lion
Dat can take off yoa arm
O even da skin from yoa head.
21 Da time da leada guys fo all da peopo come togedda,
Dey keep da bestes land fo you Gad guys,
Cuz you da real leadas.
You Gad peopo make diffren kine
To da good peopo an da bad peopo,
Da way Da One In Charge like do,
Da Judge fo da Israel peopo.”
22 Dis wat Moses tell bout da Dan ohana.
“Da Dan peopo jalike one young lion
Dat live Bashan side.
From dea, he attack
Da peopo dat stay agains him.”
23 Dis wat Moses tell bout da Naftali ohana.
“Da One In Charge stay real good inside
Bout how da Naftali peopo ack.
He do plenny good kine stuff fo dem.
He tell um fo take ova da land
From da west side Galilee Lake an south from dea.”
24 Dis wat Moses tell bout da Asher ohana.
“I like Da One In Charge do plenny good kine stuff
Fo da Asher ohana,
Mo den fo da odda ohanas.
I like Da One In Charge stay mo good inside bout dem
Den fo da odda ohanas.
I like dea olive trees give plenny oil,
Real plenny, dey even can wash dea feets wit olive oil.
25 You Asher guys, I like you get iron an bronze bars fo yoa gates,
Fo nobody hurt you all da time you stay alive.
26 “No mo anodda god like da God fo Jeshurun,
Az da Israel peopo dat stay do wass right,
He ride from one side a da sky to da odda side
Fo help you guys.
He ride jalike da clouds one war wagon fo him
Cuz he awesome.
27 Da God dat stay from befo time,
He take kea you guys.
Undaneat you guys, get his arms dat stay foeva.
He goin throw out da peopo dat stay agains you guys.
He goin tell, ‘Go wipe dem out!’
28 Dass how da Israel peopo goin live,
An nobody goin hurt dem.
Da place wea dey live,
Nobody goin bodda dem o wipe um out.
Da land get plenny wheat an barley an new wine
An da sky give plenny dew dea.
29 You Israel peopo can stay good inside!
No mo nobody jalike you guys.
Da One In Charge get you guys outa trouble.
Jalike he yoa shield,
He help you guys.
Jalike he yoa awesome sword,
He fight fo you guys.
Da peopo dat stay agains you guys
Goin come sked an shaking in front you guys.
You guys goin walk all ova dea backs.”