69
God, Help Me!
One David kine Song Fo God, fo da main music guy sing um wit da tune “Lily Flowas”
1 Eh God! Get me outa trouble!
Jalike da flood watta
Come up to my neck awready!
2 Jalike I go deep down inside da mud
An no mo place
Fo me stan up down dea!
Jalike I stay inside one stream
Full a watta
An da watta go up
An cova my head!
3 I yell to you real plenny fo you help me.
Az why I stay tired!
Az why my throat feel jalike stay burn,
An my eyes come weak.
You my God, I stay wait
Fo you fo do someting.
4 ✡69:4: Songs 35:19; John 15:25Da peopo dat stay hate me,
An I neva do notting
Fo make dem hate me,
Get mo plenny a dem,
Den I get hairs on top my head!
Get choke plenny peopo
Dat like kill me
Fo make me shut up foeva!
Dey stay agains me,
But dey ony bulai bout me.
Dey talk jalike I gotta give back someting
Dat I neva take away from nobody!
5 Eh God! You know awready,
All da real stupid kine tings I wen do.
I no can hide from you
Da tings I wen do
Dat I get da blame fo.
6 You my Boss, da God Ova All Da Armies.
No let da peopo dat trus you
Come shame cuz a me!
You da God dat da Israel peopo pray to.
No let da peopo dat trus you
Lose face cuz a me!
7 Cuz I yoa guy, plenny peopo
Talk stink bout me,
An I suffa plenny.
Dey make me come shame,
Fo me no face da peopo.
8 I no can even talk to my ohana peopo,
An my muddah odda kids ack
Jalike I not from hea.
9 ✡69:9 a: John 2:17; b: Rome 15:3Cuz I go fo broke
Wen I tink bout yoa Temple,
Az why wen peopo like talk bad
Bout you,
Dey talk bad bout me firs.
10 Da time I wen come plenny sore inside
An cry plenny
An no eat so can pray,
Dey even wen talk bad bout me
Cuz a dat!
11 Da time I wen wear
Burmbag kine clotheses
Fo show I stay sad inside,
Dem guys, dey make fun a me.
12 Da guys dat hang out by da town gate,
Dey talk any kine bout me.
Da piloot guys
Even make songs bout me.
13 But me, I stay pray to you,
Da One In Charge.
Wen da right time come, God,
Do wat I aks you fo do,
Cuz you stay tight wit yoa peopo
Big time,
An I can trus you
Fo get me outa trouble!
14 Get me outa hea,
Cuz jalike I go down
Inside da slimy mud.
Get me outa trouble
From da peopo dat hate me,
Cuz jalike I stay inside da deep watta.
15 No let da flash flood carry me away,
No let da deep watta
Pull me down inside,
No let da Deep Dark Hole
Cova me.
16 Eh! You Da One In Charge!
Do someting fo help me!
Cuz az good,
How you stay tight wit yoa peopo.
Turn aroun an look at me,
Cuz you get plenny pity
Fo do stuff fo me.
17 No look da odda way
An hide so I no can talk to you,
Eh! Dis me, yoa worka guy!
I stay stressing out,
So do someting fas!
18 Go come nea me,
Get me outa trouble,
Do wat you gotta do fo save me,
Cuz get peopo dat stay agains me.
19 You know awready
How all da peopo dat stay agains me,
Talk stink bout me
An make me come shame
An make any kine to me.
20 Da way dem guys talk bad bout me,
Inside I come real sore.
I look fo somebody
Dat can take away da sore,
But no mo nobody can do dat.
21 ✡69:21: Matt 27:48; Mark 15:36; Luke 23:26; John 19:28-29Fo food, dey give me poison
Dat taste bad,
Wen I stay thirsty,
Dey make me drink vinega.
22 ✡69:22: Rome 11:9-10Wen dey make dea dinnas
By da Temple,
I like dem guys come wipe out
Cuz a dat.
Wen dey tink eryting stay okay
Fo dem an dea frenz,
I like dem fall inside one trap.
23 Make dea eyes come blind
Fo no see notting.
Make dea body come
All weak an shaking.
24 Get mad an punish um plenny!
Stay huhu wit dem!
No let um run away!
25 ✡69:25: JGuys 1:20I like da place dey make camp
Come all bus up.
I like dea house come
So no mo nobody live dea.
26 Cuz wen you punish somebody,
Dey go afta da same guy.
An wen you stab somebody,
Dey tell erybody
How much you wen hurt dem.
27 Keep track a ery crime dey do.
Wen you tell
Wass right an wass wrong,
No let um go.
28 ✡69:28: Outa 32:32; JShow 3:5; 13:8; 17:8Wipe out dea name
From da Book Dat Tell Who Get Life.
No write um wit da peopo
Dat stay do wass right.
29 But me, I stay suffa, an I hurt.
Eh God, get me outa trouble
So notting bad happen to me.
30 I goin sing fo tell dat God, he da greates,
Cuz I know wat kine god him.
I goin tell erybody dat God, he big,
An dat I like tell him “Mahalo plenny!”
31 Wen I do dat,
Da One In Charge goin tell,
Mo betta sing an talk lidat,
Den bring one bull
Fo make one sacrifice.
32 Da peopo dat stay suffa,
Goin see wat stay happening,
An dey goin stay good inside
Cuz a dat!
All you peopo dat like find God,
You goin get one good life cuz a dat!
33 Cuz Da One In Charge,
Him da kine God stay lissen
To da peopo dat no mo notting.
Even wen his peopo stay prisonas,
He no make to dem jalike dey junk.
34 I like fo eryting dat move inside da sky
Tell dat God da greates,
An da peopo all ova da world
Tell dat he da greates.
Same ting fo da ocean,
An eryting dat move aroun inside dea.
35 Cuz da Jerusalem
An Mount Zion peopo,
God goin get dem outa trouble.
He goin build da towns
All ova Judah one mo time.
Dose peopo goin live dea,
An dea towns goin stay dea property.
36 Da peopo dat get ancesta guys
Dat wen work fo God,
Dey goin own da land.
Da ones dat get love an aloha fo God
Cuz dey know wat kine god him,
Dey goin make dea house dea.
✡69:4 69:4: Songs 35:19; John 15:25
✡69:9 69:9 a: John 2:17; b: Rome 15:3
✡69:21 69:21: Matt 27:48; Mark 15:36; Luke 23:26; John 19:28-29
✡69:22 69:22: Rome 11:9-10
✡69:25 69:25: JGuys 1:20
✡69:28 69:28: Outa 32:32; JShow 3:5; 13:8; 17:8