1 Afta two days, get one wedding inside Cana town, Galilee side. Jesus muddah was dea. 2 Da ohana tell Jesus an his guys fo come too, so dey go. 3 Bumbye no mo wine. Den Jesus muddah tell him, “Dey no mo wine, you know.”

4 Jesus tell, “Eh, Ma! Dass not my job, you know. Not time yet fo me fo show da awesome stuff.”

5 Den his muddah tell da worka guys, “Wateva my boy tell you guys fo do, go do um!”

6 Da Jew guys get Rules fo wash dea hands befo dey eat. Az why dey get six mangus stone watta jugs ova dea by da wall. Ery jug can hold twenny o thirty gallon watta. 7 Jesus tell da worka guys, “Fill up da jugs wit watta.” So dey fill um up to da top. 8 Den he tell um, “Now, go take some out, an take um to da guy in charge a da luau.” So dey take um to da guy. 9 Da guy taste da watta an tell, “Eh, da watta wen come wine!” But he neva know wea da wine come from. Ony da worka guys dat go get da watta, dey know. Den da guy tell da groom fo come. 10 Da guy tell da groom, “Erybody bring out da real good wine firs. Den, afta dea frenz drink plenny, dey bring out da cheap wine. But you, you bring out da bestes kine wine now!”

11 Dis ting inside Cana town, Galilee side, dis da firs time Jesus do someting awesome. He show how awesome he stay, an da guys he stay teach trus him.

12  ✡ 2:12: Matt 4:13Afta dat, Jesus, his muddah, his braddahs, an da guys he stay teach, dey go down Capernaum town. But dey ony stay dea short time.

13  ✡ 2:13: Outa 12:1-27Dat time, almos time fo da Jew Passova. So Jesus go Jerusalem. 14 Inside da open lanai fo da Temple, Jesus see guys stay sell cows, sheeps, an doves fo make sacrifice. Had guys dat sit dea fo sell da spesho kine temple money dat da peopo give God fo da Temple. 15 Jesus make one whip from small kine ropes, an he chase um all outside da open lanai fo da Temple, even da cows an sheeps. He huli da money guys tables an dump dea coins all ova da place. 16 An he tell da guys dat stay sell da doves, “Get um outa hea! No make my Faddah house jalike one open market!” 17  ✡ 2:17: Songs 69:9Den his guys rememba wat da Bible tell, “I get plenny love an aloha fo yoa house, an dat stay burn inside me jalike one fire.”

18 Den da Jew leada guys tell him, “Wat awesome ting you goin do fo show us dat you get da right fo do all dis kine stuff?”

19  ✡ 2:19: Matt 26:61; 27:40; Mark 14:58; 15:29Jesus tell, “Bus up dis Temple, an in three day I goin make one new Temple.”

20 Da Jew guys tell him, “Ho! Had guys dat work fo forty six year fo make dis Temple! How you figga you goin make one new temple in three day?”

21 But Jesus stay talk bout his body, cuz his body jalike one temple. 22 So den bumbye, wen Jesus mahke an come back alive, his guys no foget dat he wen tell um dat, an dey trus wat da Bible tell from befo time, an wat Jesus tell.

23 Wen Jesus stay inside Jerusalem fo da Passova religious kine ceremony, plenny peopo trus him, cuz dey see all da awesome stuff he do fo show who him. 24 But Jesus neva trus da peopo, cuz he know all dem. 25 He neva need nobody fo tell um how da peopo stay, cuz he know how dey stay inside.