35
No Let Da Peopo
Dat Stay Agains Me Hurt Me
Dat Stay Agains Me Hurt Me
One David kine song
1 Eh! You Da One In Charge!
Go agains da guys dat go agains me!
Fight da guys dat attack me!
2 Grab yoa arm shield an body shield
An come help me!
3 Grab one spear fo fight,
Fo go agains da peopo
Dat stay chase me!
Tell me fo real kine,
You da one get me outa trouble.
4 Da peopo dat stay look fo me fo kill me,
I like fo dem come shame
An lose face in front erybody.
Wen dey make one plan fo make me suffa,
I like fo dem turn aroun an run away,
Back to da place wea dey live,
Wit plenny shame.
5 I like da wind blow dem away,
Jalike dey da junks from da wheat,
Wen one angel guy
From Da One In Charge
Push back da guys
Dat stay come agains me.
6 I like da angel guy
From Da One In Charge
Chase dem guys,
An make dea roads
Come dark an slippery.
7 Cuz I neva do notting to dem,
But still yet dey wen hide one net
Fo trap me.
I neva do notting to dem,
But still yet dey wen dig one big hole
Fo make me fall down inside
an mahke.
8 I like fo da big trouble dat stay come,
Come on top dem
But dey donno stay come.
I like fo da net dey wen hide
Trap dem an not me,
Fo dem get big trouble
Wen dey fall inside.
9 Den, I goin come real good inside
cuz a Da One In Charge,
An I goin feel real good
Cuz he get me outa trouble.
10 I go all out fo tell:
“Eh! You Da One In Charge!
No mo nobody jalike you!
Da peopo dat no mo powa,
You get um outa trouble
From da ones dat mo strong den dem.
Da peopo dat no mo notting,
You get um outa trouble
From da ones dat like steal dea stuff.”
11 Peopo come in front da judge
Dat ony like tell stuff fo hurt me.
Dey aks me bout stuff
Dat I donno notting about.
12 I do good tings fo dem,
But dey do bad kine stuff
Fo pay me back!
Dey like make me feel
Jalike nobody kea fo me.
13 Me, wen dey stay sick,
I wear burmbag fo clotheses
Fo show I feel sad inside fo dem.
I no eat so I can pray fo dem
An fo me no ack big head.
But da good tings I wen pray fo dem,
I like fo dat happen fo me too!
14 Fo me I sore inside
Jalike wen one fren o braddah mahke.
I wen go all ova jalike somebody
Dat cry cuz dea muddah mahke.
I look down an I cry plenny.
15 Wen dey see me almos fall down,
Dey ack jalike dey feel good bout dat.
Dey stay come aroun me plenny
Fo attack me.
Had guys dat I donno,
Dat come fo bus me up.
Dey try bus me up,
An dey no shut dea mout fo notting.
16 Dey ack jalike God no matta,
Dey erytime make fun a me,
Dey grind dea teet, cuz dey real mad.
17 Eh Boss! You ony goin look,
O you goin do someting?!
Wen dey attack me,
Make me stay alive,
Cuz I ony get dis one life, you know,
An dey come afta me, jalike dey lions!
18 Wen you do someting
Weneva choke peopo come togedda,
I goin tell dat I yoa guy.
Wen get mo plenny peopo
Den can count,
I goin tell good tings bout you.
19 ✡35:19: Songs 69:4; John 15:25Da bulaia guys dat stay agains me,
No let dem feel good
Cuz dey win ova me.
Da ones dat hate me
No matta I neva do notting to dem,
No let dem smile cuz I feel bad.
20 Cuz dem guys no stay talk bout
How fo make eryting
Come good fo erybody.
Dey ony talk bout how dey goin bulai
Da peopo dat no make trouble
Inside dea land.
21 Dey yell at me, but dey ony bulai.
Dey tell, “Hala! Us guys see
Wat you wen do!”
Wen I neva do notting bad.
22 Eh! You Da One In Charge!
You see all dat!
No hold back!
You my boss, aah?!
No go far from me!
23 Eh! Wake up!
Do someting fo me get my rights!
Eh God, you da boss guy fo me.
Do someting fo wat I gotta tell
In front da judge!
24 Eh! You Da One In Charge!
You da judge fo real kine,
So tell erybody I neva do notting bad,
Cuz you do wass right erytime,
An you my God!
No let dem buggahs win ova me
An feel good cuz a dat!
25 No let dem go figga,
“Ho, us guys get wat we like!”
No let dem tell,
“Us guys wipe him out awready!”
26 All da ones dat come good inside
Weneva someting bad happen to me,
I like fo dem get plenny shame
Cuz a dat.
Da ones dat ack big
An make jalike I no good,
I like fo peopo
No show dem respeck notting.
27 Da peopo dat stay good inside
Wen da judge tell I okay,
I like dem yell
Cuz dey feel good inside.
I like dem tell erytime, “Da One In Charge, he awesome!
Wen eryting go okay fo da guys dat stay work fo him,
He stay plenny good inside!”
28 Den, wit my mout, I goin talk
Bout how you erytime do da right ting.
All day, I goin tell peopo
Dat you da greates!