34
God, He Good!
One David kine song, Da time David get outa trouble wit one Filisha king. David ack jalike he real lolo, fo da Filisha king throw um out an David go way.
All da time, I goin tell peopo
How Da One In Charge give me
Da powa fo do wat he like fo me do.
All da time I goin tell
Good tings bout him.
I like talk big bout Da One In Charge,
Cuz a wat he do.
Wen da peopo dat no tink
Dey gotta be numba one
Hear bout him,
Dey goin stay good inside jalike me.
Me an all you guys togedda,
We tell peopo,
“Da One In Charge, he awesome!”
All togedda we tell,
“We know who him,
An he da greates!”
 
I wen try fo come close
To Da One In Charge,
An he let me.
He wen get me outa eryting
Dat make me come real sked.
Wen peopo wait fo him
Fo tell um wat fo do,
Dey feel real good,
Jalike dea face shine!
Dey no come shame.
Me, I ony one guy dat no mo notting.
I wen yell fo somebody help me.
Da One In Charge, he wen hear me!
He wen get me outa all kine trouble!
You know wat?
Da One In Charge,
He sen his angel guy
Fo stay all aroun da peopo
Dat stay sked a him
An get respeck fo him.
Da angel guy get um outa trouble!
 
34:8: 1Pet 2:3Go check out Da One In Charge!
You, find out fo real kine
How good he stay!
Anybody dat let Da One In Charge
Hide dem from trouble,
Dey stay good inside!
Eh all you guys
Dat stay spesho fo Da One In Charge!
Get plenny respeck fo him!
Cuz anybody dat get respeck fo Da One In Charge,
Dey no need notting.
10 Da young lions come hungry,
Cuz dey no mo notting fo eat,
But da peopo dat like come close
To Da One In Charge,
Dey goin get plenny good tings!
 
11 Eh, my kids! Go come ova hea
An lissen me!
I goin teach you guys wat mean,
Fo get respeck fo Da One In Charge.
12  34:12: 1Pet 3:10-12If you like live fo real kine,
An like fo good tings happen to you
Fo long time,
13 Make shua you no tell notting bad.
Make shua you no bulai nobody
Fo get someting from dem.
14 No go do bad kine stuff.
Ony do good kine stuff.
Work hard fo be frenz wit erybody.
 
15 Da One In Charge, he keep track
A da peopo dat erytime do wass right
Fo take kea dem.
He lissen dem
Wen dey yell to him.
16 But Da One In Charge stay agains
Da peopo dat stay do bad kine stuff.
He goin wipe dem out from dis world,
So nobody even rememba who dem.
17 Erytime dey yell to Da One In Charge,
He lissen dem,
An he get um outa
All da trouble dey stay in.
18 If you stay sad inside,
Da One In Charge
Goin stay real nea you.
Da peopo dat feel all bus up inside,
Da One In Charge get um outa all dat.
 
19 Get plenny bad tings happen
To da peopo dat stay do da right ting.
But Da One In Charge
Goin get um outa all dat.
20  34:20: John 19:36Da One In Charge goin take kea dem,
No mo even one bone goin broke.
21 Ony need one bad ting fo happen
To da peopo dat do bad kine stuff,
An dey mahke cuz a dat.
Da peopo dat hate da guys
Dat stay do da right ting,
Dey goin get punish.
22 Wen Da One In Charge pay da price
So dat da peopo dat work fo him
No goin mahke,
Dat mean all da peopo dat let
Da One In Charge take kea dem,
Dey no goin get punish notting.

34:8 34:8: 1Pet 2:3

34:12 34:12: 1Pet 3:10-12

34:20 34:20: John 19:36