Da Peopo Dat Stay Spesho Fo God
(Outa Egypt 19:6; Rules Secon Time 7:6; 10:15; Songs 34:8; 118:22; Isaiah 8:14; 9:2; 28:16; 43:20-21; 61:6; Hosea 2:23; Matthew 21:42; Mark 12:10; Luke 20:17; Jesus Guys 4:11)
1 So den, no do no bad kine stuffs. No bulai nobody. No tell one ting an do anodda. No get jealous. No talk bad. 2 Jalike da bebes dat jus wen born an try fo get da milk, you guys go get da kine stuff dat stay good fo yoa spirit. Dass fo make you guys come mo an mo strong inside erytime, an God still goin take you guys outa da bad kine stuff. 3 ✡ 2:3: Songs 34:8Cuz now you guys find out dat Da One In Charge get one good heart.
4 Stay tight wit Christ. He jalike da main stone da builda guys wen throw out, but den God still wen pick him. He stay alive foeva an God tell he worth plenny! 5 Eh, you guys, come tight wit Christ fo God use you guys too, jalike you guys da stones fo make one place fo God Spirit. An you guys stay alive fo real kine too, jalike Christ. All you guys goin be jalike pries guys dat stay spesho fo God. Jalike you guys goin give sacrifices to God, da kine sacrifices God like, cuz Jesus Christ wen mahke fo all you guys. 6 ✡ 2:6: Isa 28:16Cuz inside da Bible, God tell,
“Eh, try look.
I put down da corna block inside Zion,
Dass da one I wen pick.
Dat stone real importan fo me.
Anybody dat goin trus him plenny,
Dey no need worry notting.”
7 ✡ 2:7: Songs 118:22Jesus, he jalike dat stone. You guys dat trus him, he real importan fo you guys, too. But den, fo da peopo dat no trus him, da Bible tell,
“Da stone da builda guys wen throw out,
Dat stone wen come da corna block,
Da mos importan one.”
8 ✡ 2:8: Isa 8:14-15An da Bible tell dis too,
“Dis da stone dat wen make da peopo fall down.”
Dey fall down cuz dey no do wat God tell um fo do. Dass wat God tell goin happen to dem.
9 ✡ 2:9 a: Outa 19:5-6; Isa 43:20; b: Outa 19:5; Rules2 4:20; 7:6; 14:2; Tit 2:14; c: Isa 43:21; d: Isa 9:2But you guys da one God wen pick. You da pries guys fo da King. You guys da peopo dat stay spesho fo God. God tell, “Dey mines!” bout you guys, fo you guys tell erybody all da good stuff God wen do. He tell you guys fo come outa da bad kine stuff an stick wit da good kine stuff he like us fo do. Jalike you wen go outa da dark an come inside da awesome light. 10 ✡ 2:10: Hos 2:23Befo time, you guys wen make jalike you guys not one ohana, but now you guys God ohana. Befo time, God neva like give you guys chance, but now he give you guys chance.
11 My frenz, you guys no stay kamaainas ova hea an you stay hea ony short time. Az why I stay beg you guys fo no do da bad kine stuff yoa body tell you fo do. Inside you, da bad kine stuff stay fight you. 12 Make shua you guys do da right tings in front da peopo dat donno God, so dat no matta dey poin finga you guys now, dey goin ony see da good kine stuff you guys do. Den wen Christ come back, dey goin tell how awesome God stay.
Lissen Each Odda
13 Lissen, an do wat all da leadas fo da peopo tell you fo do an do um fo Da One In Charge. Lissen to da king cuz he da main leada. 14 Lissen to da govna guys cuz dey da one da king wen sen fo punish da guys dat do bad kine stuff, an fo talk good bout da guys dat do da right kine stuff. 15 Dass why God like you guys fo do da good kine stuff fo da guys dat donno notting an no tink right, so no mo nobody can poin finga you. 16 No matta you guys get da right fo do wateva you like, no tink you can make excuse fo make any kine. Make like you work fo God. No foget he own you. 17 Get respeck fo erybody. Get love an aloha fo yoa braddahs an sistahs dat trus Christ. Get plenny respeck fo God. An get plenny respeck fo da king.
Worka Guys, Lissen Yoa Boss
(Isaiah 53:4-7, 9, 12; Ezekiel 34:5-6)
18 You worka guys, lissen yoa boss an get respeck fo dem. Not ony fo da boss dat make good to you, but fo da boss dat give you hard time too. 19 Good fo da guy dat suffa wen he get punish fo someting he neva do an he no let dat bodda him cuz he tink how God tink. 20 You tink God owe you someting if peopo bus you up wen you do someting bad, an still yet you no let dat bodda you? No way! But den, if you do someting good, an suffa fo dat, an dat no bodda you, God goin tell dass good. 21 Az why Christ wen pick you guys fo do wass good no matta you gotta fo dat. He wen suffa fo you guys. So make jalike him how he suffa. 22 ✡ 2:22: Isa 53:9Da Bible tell, “He neva do notting wrong. Nobody hear him bulai eva.” 23 ✡ 2:23: Isa 53:7Wen dey tell any kine to him, he neva ansa back. Wen he suffa, he neva tell he goin pay um back. But he let God da Judge take kea all dat cuz he know God do da right ting. 24 ✡ 2:24: Isa 53:5-6Christ, he da One dat wen carry all da bad kine stuff us guys wen do on top his body wen he mahke on top da cross. He wen do all dat so us guys no gotta mahke fo da bad kine stuff we wen do. Now, we ony stay live fo do da right kine stuff. Christ wen bleed an mahke fo us guys come good. 25 You guys was jalike da sheeps dat stay lost, but now you guys come back to God. He make shua he take kea a you guys good kine, jalike da sheep guy take kea his sheeps. An he da main leada guy fo make shua you guys no come pilau inside.
✡2:3 2:3: Songs 34:8
✡2:7 2:7: Songs 118:22
✡2:8 2:8: Isa 8:14-15
✡2:9 2:9 a: Outa 19:5-6; Isa 43:20; b: Outa 19:5; Rules2 4:20; 7:6; 14:2; Tit 2:14; c: Isa 43:21; d: Isa 9:2
✡2:24 2:24: Isa 53:5-6