No Copy Odda Peopos Funeral Ceremony
1 ✡ 14:1: Pries 19:28; 21:5You guys da peopo fo yoa God, Da One In Charge. So no go cut yoa body o shave da front a yoa head wen somebody mahke jalike odda peopos do. 2 ✡ 14:2: Outa 19:5-6; Rules2 4:20; 7:6; 26:18; Tit 2:14; 1Pet 2:9Cuz you guys one peopo dat stay spesho fo yoa God, Da One In Charge. He wen pick you guys from all da peopos on top da earth fo come his spesho peopo dat stay ony fo him.
Food Dat Make Um
Fo You No Come In Front God
Fo You No Come In Front God
3 No eat pilau kine stuff, notting. 4 Dis da kine animals you guys can eat: cows, sheeps, an goats, 5 deers, gazelle kine deers, red deers, wild goats, da ibex kine deer, da antelope kine deer, an da mountain sheep. 6 You guys can eat any kine animal dat get split in da hoof all da way, an dat chew da food ova an ova. 7 But from da animals dat no mo split in da hoof all da way, no matta dey chew da food ova an ova, you guys no can eat da camel, da rabbit, o da rock badger. No matta dey chew da food ova an ova, dey no mo da split in da hoof all da way, fo dem make um so you guys no can come in front God if you eat um. 8 Same ting fo da pig: you guys no can come in front God if you eat um, even if get split in da hoof all da way, cuz da pig no chew da food ova an ova. You guys no can eat dea meat o touch dea body wen dey mahke.
9 From all da animals stay living inside da watta, you guys can eat wateva animal get fins an scales. 10 But wateva animal dat no mo fins o scales, you guys no can eat um, cuz dey make um so you guys no can come in front God.
11 You guys can eat any kine bird dat no make um so you guys no can come in front God. 12 But dis kine bird, you guys no can eat: da eagle, da scavenja bird, da fish eagle, 13 da kite, da hawk, an any kine falcon bird, 14 all kine raven bird, 15 da ostrich, da nite hawk, da seagull, 16 da small owl, da big owl, da white owl, 17 da pelican, da odda kine scavenja bird, da cormorant, 18 da stork, any kine heron, da hoopoe bird, an da bat.
19 All da bugs dat fly togedda make um so you guys no can come in front God. No eat um. 20 But odda kine bugs dat get wings you guys can eat. Dat no make um so you no can come in front God.
21 ✡ 14:21: Outa 23:19; 34:26No eat notting dat you guys find dat awready stay mahke. You guys can give um to one guy from anodda place dat live inside yoa town, o sell um to one guy from anodda place dat go thru yoa town, an fo dem eat um. But you guys stay spesho fo yoa God, Da One In Charge. Az why you no can eat um.
Wen you guys cook one young goat, no boil um wit da muddah milk.
Da Ten Percent Fo God
22 ✡ 14:22: Pries 27:30-33; Census 18:21You guys gotta put on da side ten percent a da food you harves from inside yoa field ery year. 23 Take da ten percent a yoa wheat an barley, yoa new wine, yoa olive oil, an da firs one fo born from yoa cows, sheeps, an goats, to da place yoa God goin pick fo put his name dea. Eat um dea in front Da One In Charge. Dass how you guys goin learn fo get respeck fo God all da time. 24 But maybe dat place Da One In Charge goin pick stay too far, an he wen do plenny good kine stuff fo you guys ova dea. So maybe you no can carry all da stuff to da place Da One In Charge goin pick fo put his name dea. 25 Den change da ten percent a yoa stuff dat stay da property a God fo silva. Take da silva an go da place God pick. 26 Use da silva fo buy wateva you like: cows, sheeps, wine o beer, o anyting you like. Den you an yoa ohana goin eat um ova dea, an stay good inside in front yoa God. 27 Make shua you guys no foget da Levi ohana peopo dat stay inside yoa towns, cuz dey no mo land o odda property from Da One In Charge.
28 Afta ery three year, take all da ten percent from da food you guys grow inside yoa field dat year, an put um inside da store house inside yoa towns. 29 Dass fo da Levi ohana peopo dat no mo land o odda property from Da One In Charge, an fo da peopo from anodda place, an fo da kids dat no mo faddah o muddah, an fo da wahines dat no mo husban, dat live inside yoa town. Dass wea fo dem come an get plenny fo eat. Den yoa God, Da One In Charge, goin do plenny good stuff fo you guys, wateva you start fo do.
✡14:1 14:1: Pries 19:28; 21:5
✡14:2 14:2: Outa 19:5-6; Rules2 4:20; 7:6; 26:18; Tit 2:14; 1Pet 2:9
✡14:21 14:21: Outa 23:19; 34:26
✡14:22 14:22: Pries 27:30-33; Census 18:21