36
Peopo Stay Do Bad Kine Stuff
Fo da main music guy. David, da one wen work fo Da One In Charge, make dis song.
1 ✡36:1: Rome 3:13-18Wen peopo go agains God,
Dat make da peopo tink lidis:
“Da way us guys see um,
No need come sked a God!”
Dis, jalike da bad kine stuff
Talk to dem inside.
2 Wen dey tink lidat, dey tink dey big.
Az how come, wen dey do bad tings,
Dey no tell dat dey bad,
An no bodda dem dat dey do
Da bad kine stuff dey stay do.
3 Eryting dat come outa dea mout, no good, an all bulai.
Dey no like undastan wat dey stay do,
An dey no like do good tings.
4 Even wen dey on top dea bed,
Dey plan fo how dey goin do
Bad tings to somebody.
Dey stay go da way dass no good,
Cuz dey hard head.
Dey make up dea mind
Fo do bad kine stuff.
God, He Get One Good Heart
5 Eh! You Da One In Charge!
You get one good heart
Fo help yoa peopo,
You get one big heart,
Big jalike da sky!
You da kine God us guys can trus plenny,
Jalike get plenny clouds inside da sky!
6 How you do da right ting erytime—
Dass awesome,
Jalike da mos big mountains!
Da way you tell
Wass right an wass wrong
Cuz you da judge,
Dass deep,
Jalike da mos deep ocean!
Eh! You Da One In Charge!
You stay get peopo an animals
Outa trouble.
7 Eh God! You get one big heart
Fo help yoa peopo,
An no can get notting betta den dis!
Az why peopo can run by you
An hide fo no get hurt,
An you cova dem
Jalike da muddah bird
Hide dea bebe birds unda da wings.
8 Inside yoa house,
Get ony da bestes stuffs,
An you give yoa peopo all dat.
You give um plenny tings
Dat make um feel real good inside,
Jalike you give um watta fo drink
From one riva
Dat erytime get plenny watta.
9 Da fo real kine life,
All come from you,
An dass how us guys know how fo live,
Jalike you let us see da light.
10 You get plenny good heart
Fo help da peopo
Dat know you fo real kine,
An I like you get one good heart
Fo mo an mo plenny peopo.
An do da right ting
Fo da peopo dat like do
Da right ting erytime.
11 Da peopo dat tink dey high makamaka,
I no like dem come nea me.
Da peopo dat do bad tings,
I no like dem tell me fo get outa hea.
12 Look!
Da peopo dat do bad tings to odda peopo,
Dey fall down awready!
Somebody throw dem down,
An dey no can stan up!