23
Jesus In Front Pilate, Da Govna
(Matthew 27:1-2, 11-14; Mark 15:1-5; John 18:28-38)
Den all da peopo dat wen come togedda take Jesus away fo go in front Pilate, da govna. Dey poin finga Jesus an tell, “Dis guy stay bulai oua peopo! He stay teach dem bad kine stuff. He tell dem no pay tax to King Cesar! He tell dat he da Christ Guy, da Spesho Guy God Wen Sen, an dat he one king.”
Pilate tell Jesus, “Eh, you da king fo da Jews, o wat?”
Jesus tell, “Dass right, wat you tell.”
Den Pilate tell da Main Pries guys an all da peopo, “I no find notting bad dat dis guy wen do.”
But dey tell mo strong, “All ova Judea da peopo like beef cuz a da stuff he stay teach. He wen start Galilee side. Now, he stay come all da way ova hea.”
Jesus In Front King Herod
Pilate hear dat, an he go aks Jesus, “You come from Galilee, o wat?” Wen Pilate find out dat Jesus come from Galilee, he tell his guys fo take Jesus by Herod. Cuz Herod da one dat stay in charge inside Galilee, an he stay Jerusalem town dat time. Herod, he feel good inside wen he spock Jesus, cuz Herod wen hear bout him an like see him from long time. Herod tink maybe Jesus goin do someting awesome fo him see um. Herod go aks Jesus plenny stuff, but Jesus neva say notting. 10 Da Main Pries guys an da teachas dat teach da Rules From God stay dea. Dey poin finga Jesus real hard. 11 Den Herod an his army guys ack jalike Jesus no good, an make fun a him. Dey put one fancy robe on top him, an sen him back to Pilate. 12 Dass how Herod an Pilate wen come frenz. Befo dat time dey stay agains each odda.
Pilate Tell Jesus Gotta Mahke
(Matthew 27:15-26; Mark 15:6-15; John 18:39–19:16)
13 Den Pilate tell da Main Pries guys, da leada guys, an da peopo fo come. 14 He tell um, “You guys wen bring dis guy by me, an you tell he stay try fo make da peopo beef us Rome guys. I wen aks him plenny stuff in front you, an I no find notting wrong da way you guys stay tell, fo poin finga him. 15 An Herod, he no find notting fo poin finga him too. He sen him back. You guys know he neva do notting dat tell he gotta mahke. 16 Az why I goin tell my army guys fo whip um an let um go.”
17 [Now, ery year, da Passova spesho religious kine ceremony, Pilate gotta let one prisona guy go fo da peopo.] 18 All da peopo was yelling, “Kill Jesus! Let Barabbas go fo us!” 19 You know, da Rome army guys wen throw Barabbas in jail befo time, cuz he lead some a da peopo an dey try fo ovathrow da leada guys inside Jerusalem. Barabbas even wen kill one guy.
20 Pilate like let Jesus go, so he go aks da peopo one mo time. 21 But dey stay yelling, “Kill da buggah on top one cross! Kill da buggah on top one cross!”
22 One mo time he tell dem, “How come? Wat kine crime dis guy wen do? I no find notting dat tell he gotta mahke. Az why I goin tell my army guys fo whip him an let um go.”
23 But dey stay yell da top a dea lungs, fo presha Pilate an make um kill Jesus on top one cross, an dey win. 24 So Pilate tell dat Jesus gotta mahke, jalike da peopo tell um fo do. 25 He let Barabbas go, da guy dey pick, dat wen make da peopo beef da govmen an kill one guy. An he give Jesus to dem fo dem do wat dey like do to him.
Dey Kill Jesus On Top One Cross
(Matthew 27:32-44; Mark 15:21-32; John 19:17-27; Hosea 10:8; Songs 22:7-8, 18)
26 Den dey take Jesus away. One guy name Simon from Cyrene stay come from da countryside. Da army guys grab him, put da cross on top him, an make him carry um behind Jesus. 27 Plenny peopo stay walking behind Jesus, an some wahines stay crying. Dey real sad inside cuz a wat stay happen. 28 Jesus turn an tell um, “Sistahs from Jerusalem, no cry fo me. Cry fo you an fo yoa kids. 29 Cuz da time goin come wen you goin tell, ‘Lucky now, da wahines dat no mo kids, da wahines dat neva born kids, an da wahines dat neva breas feed kids!’ 30  23:30: Hos 10:8; JShow 6:16Dat time da peopo goin tell da mountains, ‘Fall down on top us!’ An dey goin tell da hills, ‘Hide us!’ 31 Cuz if dey stay do dis kine stuff to one good guy like me, wat goin happen to da peopo dat not good?”
32 Dey take two crooks wit him. Dey goin kill dem wit Jesus. 33 Dey come da place “Da Skull.” Dey hang Jesus on top one cross fo kill um dea. Dey hang da two crooks on top da odda two crosses, one on da right side an da odda on da lef side. 34  23:34: Songs 22:18Jesus tell, “Faddah, let dem go fo dis bad ting dey stay doing. Dey donno wat dey stay doing!”
Da army guys throw dice fo take Jesus clotheses. 35  23:35: Songs 22:7Da peopo stan dea an watch um. Da leada guys fo da Jews make fun a him. Dey tell, “Eh, he wen take da odda guys outa da bad kine stuff dey stay in. If he da Spesho Guy God Wen Sen fo real kine, how come he no can get outa dis now?!”
36  23:36: Songs 69:21Da army guys make fun a him too. Dey come by him an like give him some a dea cheap kine wine fo drink. 37 Dey tell, “Eh, if you da king fo da Jews, get outa dis, den!”
38 Den dey write,
DIS DA KING FO DA JEWS
an put um on top da cross.
39 One crook dat stay hanging dea talk any kine to him. He tell, “Eh, you da Spesho Guy God Wen Sen, o wat? Den get outa dis, an get us guys out too!”
40 But da odda crook scold him, an tell, “Eh, you no sked God, o wat? Dey wen tell you gotta mahke, too, jalike him. 41 Us guys get da pay fo wat we wen do, but dis guy, he neva do notting wrong!” 42 An da guy tell Jesus, “Jesus, no foget me wen you come da King!” 43 Jesus tell him, “Eh, you get um! An I tell you dis: Today you goin be wit me inside God Beautiful Place.”
Jesus Mahke
(Matthew 27:45-56; Mark 15:33-41; John 19:28-30; Songs 31:5)
44  23:44: Outa 26:31-33Was bout noon time, an come real dark all ova da place, till three clock, 45 cuz da sun pau shine. Da big curtain inside da Temple broke in half. 46  23:46: Songs 31:5Jesus yell real loud. He tell, “Faddah! I give you my spirit!” Wen he tell dat, he mahke.
47 Da captain fo da army guys see wat happen, an he tell good stuff bout God. He tell, “Fo shua, dis guy neva do notting wrong!”
48 Da peopo dat wen come dea fo see wat goin happen see dat, an dey poun dea ches, fo show dat dey know someting real bad wen happen. Den dey go home. 49  23:49: Luke 8:2-3All da guys dat wen know Jesus, an da wahines dat wen come dea wit him all da way from Galilee side, dey stay stand far away fo watch all da stuff dat stay happen.
Dey Bury Jesus
(Matthew 27:57-61; Mark 15:42-47; John 19:38-42)
50 Had one guy name Joseph. He one a da National Council guys. He good an erytime do da right ting. 51 He come from Arimatea, Judea side. Wen da odda guys wen like kill Jesus, Joseph neva vote wit dem. He trus God, an stay wait fo God fo come da king. 52 He go in front Pilate, an go aks him fo Jesus body. 53 Joseph an his guys take Jesus body down from da cross, wrap him up inside one linen cloth, an put him inside one tomb peopo wen cut inside da rock fo bury somebody, but neva get one mahke guy inside yet. 54 Dat day was da Day Fo Make Ready Fo Da Passova, an da Res Day almos come.
55 Da wahines dat stay tight wit Jesus from Galilee side, dey go wit Joseph, an see da tomb, an how dey put Jesus mahke body inside. 56  23:56: Outa 20:10; Rules2 5:14Den dey go home fo make da spices an da perfume ready fo his body.
On da Res Day dey res, jalike da Bible tell fo do.

23:30 23:30: Hos 10:8; JShow 6:16

23:34 23:34: Songs 22:18

23:35 23:35: Songs 22:7

23:36 23:36: Songs 69:21

23:44 23:44: Outa 26:31-33

23:46 23:46: Songs 31:5

23:49 23:49: Luke 8:2-3

23:56 23:56: Outa 20:10; Rules2 5:14