Da King Sing Cuz He Wen Win Da War
(2 Samuel 22:1-51)
Fo da main music guy. David, da guy dat work fo Da One In Charge, make da words fo dis song fo Da One In Charge, da time he get David outa trouble from all da guys dat stay agains him, an from King Saul.
David tell: “Eh! You Da One In Charge! I get love an aloha fo you!
You da One make me strong!”
Da One In Charge, he make shua notting bad happen to me,
Jalike he one solid rock mountain an one strong wall.
He jalike one big solid rock,
Fo me go by him fo hide me.
He real strong,
Jalike he one shield dat no let nobody touch me.
He jalike one big wall.
Da One In Charge, he good,
An az good fo erybody tell dat he good!
An wen I yell fo him help me,
He da One get me outa trouble
From da peopo dat stay agains me!
Was jalike peopo tie me up fo kill me.
Jalike da flood come all ova me
An litto mo wipe me out.
Jalike I all tie up wit ropes
Fo pull me inside da Mahke Peopo Place.
Jalike get trap wea I goin step
Fo kill me.
Wen me get plenny trouble,
I yell fo my God, Da One In Charge, help me.
Up dea inside God temple inside da sky,
He hear me yell to him.
Den da groun wen shake cuz a da earthquake,
Undaneat da mountains da foundation stay shake!
Da foundation wen move one side to da odda side,
Cuz God come huhu!
God come huhu,
Jalike smoke come outa his nose.
Jalike fire come outa his mout
Dat burn up stuff.
From him, fire come
Jalike kiawe stay burning.
God open up da sky
An come down hea.
Undaneat his feets get black storm cloud.
10 Jalike God fly down, riding
On top one a da awesome tings dat stay alive an go ery place God go
An stay by his throne,
Jalike he get wings wit da wind undaneat,
Fo dive down an grab someting!
11 He make eryting aroun him dark fo cova him,
He put clouds all aroun jalike one tent.
He make da black rain clouds
Jalike one straina fo da watta come thru.
12 But God so awesome, da strong light in front him
Broke da clouds
An hail an fire come down jalike da rain.
13 Da One In Charge make thunda come outa da sky
Wen he yell wit one big voice.
Da God Dass Mo Importan Den All Da Odda Gods,
14 He sen da lightning jalike he shoot arrows,
He make da peopo dat stay agains him
Run all ova da place.
He make da arrows flash plenny times wit lightning,
So da peopo donno wat fo do.
15 Da One In Charge tell “Not good, wass happening!”
Den he blow one real hard blas so can see da bottom a da ocean,
An can see da foundation rock wea da earth stan.
16 From up dea, jalike Da One In Charge put down his hand
An pull me up outa da deep ocean.
He get me outa trouble.
17 Da guys dat stay agains me, dey strong,
Da guys dat hate me, dey too strong fo me!
But Da One In Charge get me outa dea.
18 Da time I face all kine trouble, dey attack me,
But Da One In Charge, he hold me up fo me stan up.
19 He take me to one open place wea no mo presha.
Da One In Charge stay good inside wen he tink bout me,
Az why he get me outa trouble.
20 I stay pono wit Da One In Charge,
Dass why he make good to me.
I no do notting bad,
Dass why Da One In Charge pay me back good kine.
21 Cuz I make shua I do eryting da way Da One In Charge like,
I no go do stuff dat no stay right,
An I no go way from my God.
22 I tink bout all da Rules God make,
Wen he tell da tings I gotta do, I no make deaf ear.
23 In front God, no mo nobody can poin finga me,
I make shua I no do notting bad fo him punish me.
24 I stay do wass right,
Dass why Da One In Charge pay me back good fo dat.
All da time he see me,
Dass why he know I no go do notting bad.
25 Eh God! Fo da peopo dat stay tight wit you,
You show um dat you stay tight wit dem too.
Fo da peopo dat stay do da right ting,
You show um dat you stay do da right ting fo dem.
26 Fo da peopo dat stay pono in front God,
You show um dat you stay pono in front God too.
But fo da sly buggahs,
You show um dat you mo akamai den dem.
27 Da kine peopo dat get hard time,
You get um outa trouble.
But da peopo dat ack high makamaka,
You shame um in front erybody.
28 Eh! You Da One In Charge!
Jalike you da One dat open da light fo me,
Fo see how fo me live fo real kine.
You da God fo me!
You make me come alive inside,
Jalike you open da light,
No matta was dark inside me befo time.
29 Wen you help me,
I can go afta big stack army guys.
You da God fo me!
Az why I can climb ova da wall aroun any town.
30 I like talk bout da One dass da God fo me:
Da way he do tings, come out how suppose to be.
Eryting dat Da One In Charge promise fo do,
Garans he goin do um.
Fo all da peopo dat let Da One In Charge take kea dem,
He jalike one shield dat no let dem get hurt.
31 Cuz no mo anodda God fo real kine.
Da One In Charge, he da ony one!
No mo anodda one dat stay strong, jalike one big solid rock.
Oua God, he da ony one!
32 Dass da God dat make me strong fo fight.
Ery place I go,
God make eryting come okay fo me.
33  18:33: Habak 3:19He make um fo me run an no fall down,
Jalike one deer dat run fas ova da big mountains.
34 He teach me how fo fight in da war,
Az how I strong fo even pull da metal kine bow.
35 Eh God! You wen get me outa trouble
Jalike you give me yoa shield fo me no get hurt.
You hold me wit yoa strong hand
fo me no fall down.
You take kea me plenny,
An cuz you help me, you make me come importan.
36 Jalike you wen make one wide place fo me walk.
Dass why my ankle stay strong an I no wipe out.
37 I chase da guys dat stay agains me, an catch um.
I no give up till I wipe um out.
38 I bus um up
Fo dem no stan up one mo time.
Dey fall down undaneat my feets.
39 You wen make me strong fo fight.
You make da peopo dat come agains me
Go down undaneat my feets.
40 Da ones dat stay agains me,
You make um turn aroun an run away.
I wipe out da peopo dat hate me.
41 Dey yell fo somebody help dem,
But no mo nobody get um outa trouble.
Eh! You Da One In Charge! Dey even wen yell fo you help dem,
But you no do notting fo dem.
42 I wen poun um an make um jalike powda,
Jalike dus dat da wind blow aroun.
I go sweep um outside, jalike dey dirt.
43 Eh! You Da One In Charge! You da one dat make me win
Agains da peopo dat poin finga me!
You put me in charge a plenny diffren peopos.
Da peopo dat stay work fo me now,
I neva know dem from befo time.
44 Wen da peopos from odda countries hear bout me,
Right den an dea dey tell, “Eh King David! You da boss!”
But wen dey tell dat, dey ony bulai fo make show.
45 Dey lose fight, all dose peopo from odda countries.
Dey come outa dea places wea dey hide fo no get kill,
An dey sked an shaking!
46 Da One In Charge, he alive fo real kine!
An I like erybody tell how plenny good tings he do.
He jalike one big solid rock fo me hide dea!
He da God dat get me outa trouble
An I like erybody tell, “God, he awesome!”
47 He da God dat pay back da peopo dat like hurt me.
He help me take ova da odda peopos.
48 Wen da peopo dat stay agains me like hurt me,
He get me outa da trouble.
Eh God! You even make me mo importan
Den da peopo dat come agains me.
Wen peopo come fo bus me up,
You get me outa trouble.
49  18:49: Rome 15:9Eh! You Da One In Charge! Dass why I goin tell how awesome you stay
In front all da diffren nations!
I like sing fo you, dat you da greates,
Cuz I know wat kine god you.
50 Me, I da king dat stay work fo you,
An you make me win da war plenny times.
You wen pick me
An put oil on top my head fo show dat.
An you goin stay tight wit me foeva,
Tight wit me, King David,
An wit all da odda king guys dat goin come from me.

18:33 18:33: Habak 3:19

18:49 18:49: Rome 15:9