1 Saul still yet try fo make da peopo dat stay tight wit Da One In Charge come sked. He tell he goin kill dem. He go by da Main Pries Guy 2 an tell um fo write lettas to da Jew churches Damascus side, fo find some guys o wahines ova dea dat stick wit da message bout Jesus, fo put dem inside da prison Jerusalem side.

3 Saul go on da road an come nea Damascus. An you know wat? Right den an dea one light from da sky flash aroun him. 4 He fall down on top da groun an hear one voice tell him, “Eh Saul! Saul! How come you make me suffa?”

5 Saul tell, “Who you, Boss?”

Da voice tell, “Me Jesus, da Guy you stay make suffa. 6 Now stan up an go inside da town, an somebody goin tell you wat you gotta do.”

7 Da guys dat go wit Saul stay dea an no tell notting. Dey hear da voice, but dey no see nobody. 8 Saul stan up, but wen he open his eyes, he no can see notting. Az why dey hold his hand an dey all go inside Damascus. 9 Fo three day he no can see notting. An all dat time he neva drink o eat notting.

10 Inside Damascus had one guy, Ananias, dat stick wit da Good Stuff Bout Jesus. He see someting jalike one dream wea Da One In Charge tell him, “Ananias!”

He tell, “Yeah, Boss?”

11 Da One In Charge tell, “Go da guy Judas house on Strait Street, an tell him you like talk to one guy Saul from Tarsus. He stay pray ova dea. 12 He dream an he see one guy Ananias come an put his hands on top him an den his eyes come good one mo time.”

13 Ananias tell, “You Da One In Charge! I hear bout dis guy plenny time. He do plenny bad kine stuff to da peopo Jerusalem side dat stay spesho fo you. 14 An da Main Pries guys give him da powa fo him come ova hea fo capcha all da peopo dat tell you fo help dem cuz dey know who you.”

15 But Da One In Charge tell Ananias, “Go! I wen pick dis guy fo tell who me to da peopos dass not Jew guys an dea kings an to da Israel peopo too. 16 An I goin show him how plenny he goin suffa cuz he my guy.”

17 Den Ananias go da house wea Saul stay an go inside. He put his hands on top Saul, an tell, “Braddah Saul, Jesus Da One In Charge, da One dat show up by you wen you stay on da road fo come ova hea. He sen me by you fo you see one mo time, an fo his Good An Spesho Spirit take charge a you.” 18 Right den an dea someting jalike fish scales fall down from Saul eyes, an he see one mo time. He stan up an Ananias baptize him. 19 Afta dat he eat, an come strong one mo time.

Saul stay short time inside Damascus wit da peopo dat trus Jesus. 20 Right den an dea he start fo tell da peopo inside da Jew churches dat Jesus, he God Boy. 21 All da peopo dat hear Saul wen blow dea mind, an dey tell, “Eh, wassup? Dis da guy dat wen wipe out da peopo in Jerusalem dat tell da guy Jesus fo help um, aah? An he come ova hea fo bring dem to da Main Pries guys an throw dem in jail, aah?” 22 But Saul teach wit mo an mo powa, an da Jew guys dat stay Damascus side come all hamajang, cuz he show proof dat Jesus, he da Spesho Guy God Wen Sen.

23 ✡9:23: 2Cor 11:32-33Plenny days layta, da Jew guys come togedda fo talk how fo kill Saul. 24 But Saul hear bout dat. Da Jew guys stay watch da gates fo da town day time an nite time, fo dem kill um. 25 But nite time da guys dat stay tight wit Saul put him inside one big basket, an drop him down thru one big window in da wall nite time.

26 Saul go Jerusalem, an try fo go by da odda guys dat stay tight wit Jesus, but dey all sked Paul. Dey neva trus dat he fo real stay tight wit Jesus. 27 But Barnabas, he take Saul an bring him by da guys Jesus wen sen all ova. He tell um dat Saul see Da One In Charge wen he go Damascus side, an Da One In Charge talk to him. An inside Damascus he no sked fo use Jesus name fo do stuff. 28 Dass why Saul stay ova dea wit dem, an go all ova inside Jerusalem. He no sked fo use da name a Da One In Charge ova dea too fo do stuff. 29 He talk wit da Jew guys dat talk Greek, an try fo show um dat da Good Stuff Bout Jesus stay fo real. But dey make one plan fo kill him. 30 Wen da braddahs find out bout dat, dey take Saul Cesarea side, an sen him away Tarsus side.

31 Dat time nobody bodda da peopo dat come togedda fo church all ova Judea, Galilee, an Samaria. Dey trus God mo an moa, an da Good An Spesho Spirit kokua dem. Mo an mo peopo trus da Good Stuff Bout Jesus. An eryting dey do, dey do um wit choke respeck fo God.

32 Peter go all ova da place, an he stay Lydda side wit da peopo dat stay spesho fo God ova dea. 33 Had one guy Eneas ova dea. He one guy dat no can move. An he no can get off his bed fo eight year. 34 Peter meet him an tell um, “Eh, Eneas, Jesus, da Spesho Guy God Wen Sen, he make you come good awready. Stan up an make yoa bed.” Right den an dea Eneas stan up. 35 All da peopo dat stay Lydda side an Sharon side see um, an dey all trus Da One In Charge right den an dea.

36 Had one wahine Tabita inside Joppa town dat trus Jesus. (Dorcas her name in da Greek language. Dat mean “one deer.”) All da time she do good tings an help da pooa peopo. 37 Dat time she come sick an den mahke. Dey wash her body an put um inside one room upstairs. 38 Lydda town stay nea Joppa. Wen da guys dat stay tight wit Jesus hear dat Peter stay Lydda side, dey sen two guys by him fo beg um, “Try come now!” 39 Peter go wit dem, an wen he come ova dea, dey take him upstairs to da room. All da widows stay stan aroun him. Dey stay cry an show him da shirts an da coats Dorcas make wen she stay wit dem. 40 Peter tell um all fo go outside. Den he go down on his knees an pray. He turn aroun by da mahke wahine, an tell, “Eh Tabita! Stan up!” She open her eyes, spock Peter, an sit up. 41 He grab her hand an help her stan up. An he tell God peopo an da widows fo come, an he show um dat she stay alive. 42 All da peopo Joppa side hear bout dat, an plenny peopo trus da Good Stuff bout Da One In Charge. 43 Peter stay Joppa side long time inside Simon house. He one guy dat make stuff wit ledda.