Peter An Cornelius
1 Had one guy Cornelius Cesarea side. He da captain fo six hundred Rome army guys from Italy. 2 Him an his ohana, dey not Jew, but dey all pray an show respeck fo God. He give plenny money to da pooa peopo, an erytime he pray to God. 3 One time, three clock in da aftanoon, he see someting jalike he stay dreaming. He see one angel messenja guy from God dat come by him an tell, “Eh, Cornelius!” 4 Cornelius eye um up real good an come real sked. He tell, “Yeah, Mista?”
Da angel guy tell, “God hear wat you aks him fo do, an he no foget all da money you give to da pooa peopo. 5 Now send some guys Joppa side fo bring back one guy Simon, da same guy dey call Peter. 6 He stay in da odda Simon house by da sea, da guy dat make stuff wit ledda.” 7 Wen da angel guy go way, Cornelius call two a his worka guys an one army helpa guy. Da helpa guy pray an get respeck fo God too. 8 Cornelius tell um all da stuff dat wen happen, an send da three guys Joppa side.
9 Da nex day, noon time, dey come nea Joppa. Dat time Peter go up on top da flat roof fo pray. 10 He come hungry an like eat. Dey stay cooking da food, an he see someting jalike one dream. 11 He see da sky open up, an one ting jalike one big sheet come down on top da groun wit rope dat hold up da four cornas. 12 On top da sheet had all kine animal, da kine dat get four feet, an snakes an lizards from da groun, an birds from da sky. 13 Den one voice tell um, “Eh Peter! Stan up! Kill um an eat um!”
14 But Peter tell, “Eh, you Da One In Charge! No way I goin do dat! I no eat notting dat stay kapu fo me!”
15 One mo time da voice tell, “No tell dat someting stay kapu dat God make okay fo eat!” 16 An da angel guy tell dat three time, an right den an dea da sheet go back up to da sky.
17 Peter tink plenny bout wat da dream mean. Right den an dea da guys dat Cornelius send find out da house wea Simon da ledda guy stay. An dey stop in front da gate fo da house. 18 Dey yell, “Eh, get one guy name Simon Peter ova hea?”
19 Peter still stay trying fo figga out wat da dream mean, an God Spirit tell him, “Simon, get three guy dass not Jew, downstairs stay looking fo you. 20 So stan up an go down dea. Go wit dem an no worry cuz was me wen bring um.” 21 Peter go down an tell um, “I da guy you stay looking fo. How come you hea?”
22 Da guys tell, “Captain Cornelius sen us. He one good guy dat get respeck fo God, an all da Jew guys get respeck fo Captain Cornelius. One spesho angel guy from God tell him fo bring you by his house fo hear wat you get fo tell.” 23 Den Peter tell da guys fo come inside an sleep ova.
Da nex day Peter go wit da guys, an some a da braddahs from Joppa go too. 24 Da nex day dey come Cesarea. Cornelius wait fo dem come, an he tell his ohana an his good frenz fo come his house. 25 Wen Peter go inside da house, Cornelius go in front him, an go down on his knees, cuz he get plenny respeck fo him. 26 But Peter tell um, “Stan up. Me, I ony one guy you know.” 27 Peter talk to him an dey go inside da house. He see plenny peopo ova dea. 28 He tell um, “You guys know dat oua Jew Rules tell dat one Jew guy no can stay togedda wit one guy dass not Jew. An da Jew guy no can go inside da odda guy house. But God show me dat no mo nobody can tell somebody, ‘Az kapu fo you go by dat guy cuz he pilau.’ 29 Az why wen da guys tell me fo come ova hea, I come. I no tell I no can. So try tell me how come you tell me fo come.”
30 Cornelius tell, “Three day ago, I stay pray inside my house, same time like now, three clock in da aftanoon. An right den an dea one guy in shiny kine clotheses stan in front me. 31 An he tell, ‘Cornelius, God hear wat you stay pray fo, an he know bout all da money you give to da pooa peopo. 32 Send some guys Joppa side fo find Simon, da same guy dey call Peter. He stay inside Simon house by da sea, da guy dat make stuff wit da ledda.’ 33 So right den an dea, I send dem fo bring you by me. An you get one good heart fo come my house. Now we all stay hea in front God, an we like hear all da stuff God tell you fo tell us.”
Wat Peter Tell
34 ✡ 10:34: Rules2 10:17Den Peter start fo talk. He tell um, “Now I know fo shua dat God treat erybody same same. 35 He tell, ‘Go come by me, erybody dat get respeck fo me an do da right ting, from all da diffren peopos.’ 36 Dis da Good Stuff dat God send peopo fo tell da Israel peopo: ‘Eh! Us guys can come frenz wit God an feel good inside cuz a wat Jesus Christ wen do. He Da One In Charge a eryting an erybody.’ 37 You guys know wat wen happen all ova Judea. Firs da guy John tell da peopo in Galilee fo get baptize. 38 An God give Jesus from Nazaret his Good An Spesho Spirit an powa. Jesus go all ova da place, an do da good kine stuff. Da Devil take charge a plenny sick peopo wit his powa, but Jesus even make dem all come good. Jesus do dat cuz God stay wit him. 39 Us guys see all dis stuff happen. He do all dat in da Jew countryside an inside Jerusalem. Den dey kill him on top one cross. 40 Afta three day God make him come back alive, an let some peopo see him. 41 All da peopo neva see um, but us guys dat God wen pick fo tell bout him, us wen see um. We wen eat an drink wit him afta he come back alive. 42 He tell us fo teach da peopo an fo tell dem dat we know he da One dat God Wen Send fo judge da peopo dat stay alive an da peopo dat stay mahke. 43 All da guys dat talk fo God long time befo time talk bout him. Dey tell dat whoeva trus him, God goin let um go an hemo dea shame fo all da bad kine stuff dey wen do. God goin do dat cuz a wat Jesus wen do.”
Da Peopo Dass Not Jew Guys
Get Da Good An Spesho Spirit
Get Da Good An Spesho Spirit
44 Wen Peter stay talk lidat, da Good An Spesho Spirit take charge a all da peopo dat hear da Good Stuff From God. 45 Da Jew guys dat trus Jesus, da ones dat come wit Peter, blow dea mind cuz God Good An Spesho Spirit take charge a even da peopos dass not Jew guys. 46 Cuz da guys dat come wit Peter hear da guys dass not Jews talk in odda kine language an tell good stuff bout God. 47 Den Peter tell, “Dese guys, dey can get baptize wit watta, aah? Dey get da Good An Spesho Spirit jalike da time us guys wen get um.” 48 So he tell um fo get baptize cuz dey come Jesus guys, an he da Spesho Guy God Wen Send. An den dey tell Peter, “Try stay wit us some moa!”