1 Wen da big beef pau, Paul tell da Jesus guys fo come by him. He give dem good kine words, an tell um aloha. Den he go Macedonia. 2 He go thru Macedonia, an talk to da peopo ova dea an kokua dem. An den he go Greece side.

3 He stay ova dea three month. He ready fo ride da boat Syria side, but da Jew guys make one plan fo kill um, so he go back thru Macedonia. 4 Sopater from Berea, Pyrrhus boy, an Aristarkus an Secundus from Tessalonika, Gaius from Derbe, Timoty, an Tykikus an Trofimus from West Asia, dey all go wit him. 5 Dem guys go ahead an wait fo us guys inside Troas. 6 We ride boat from Philippi afta da spesho religious kine ceremony fo da Bread Dat No Mo Yeast. Five days afta dat, we go by da guys inside Troas, an we stay ova dea one week.

7 Da firs day a da week, we all meet togedda fo broke da bread fo no foget Jesus. Paul teach da peopo. Cuz he like go way da nex day, he talk till da middo a da nite. 8 Had plenny olive oil lamp inside da place upstairs wea we stay. 9 One young guy Eutykus stay sit by da window. He come sleepy wen Paul stay talk. Wen he sleep, he fall down on top da groun from three floors up. Dey pick um up, an jalike he mahke. 10 Paul go down dea, an throw his body on top da guy, an put his arms aroun him. He tell, “No worry, he still stay alive!” 11 Den he go upstairs one mo time fo broke da bread an eat wit dem. He talk to dem till da sun come up, an den he go. 12 Da peopo take da young guy Eutykus home, an dey feel good inside cuz he stay alive.

13 Paul tell us guys fo go by da boat an ride boat aroun da poin to Assos cuz he like walk ova dea. 14 He meet us Assos side, an he come inside da boat. An den us all ride boat to Mitylene. 15 Da nex day we ride boat from dea an go Chios Islan. Da nex day we cross ova to Samos Islan, an da nex day, we go Miletus town, da West Asia mainland. 16 Paul tink fo no go inside Efesus. He no like stay West Asia side long time, cuz if can, he like go Jerusalem fo da Pentecos ceremony.

17 From Miletus Paul sen somebody fo tell da older church leada guys from Efesus fo come by him. 18 Wen dey come ova dea, he tell um, “You guys know how I stay all da time, from da firs day I stay wit you guys West Asia side. 19 I work fo Da One In Charge, Jesus, da one wit one good heart. An I wen stay cry cuz da Jew guys make me suffa plenny an try kill me. 20 You guys know I no stay sked fo teach you guys all da stuff dat goin kokua you. I teach you guys in front all da peopo an inside yoa houses. 21 I tell da Jew guys an da peopo dass not Jew, dat dey gotta change an tell God dey sorry an like pau do all da bad kine stuff dey stay do, an no do um no moa. Dey gotta trus Da One In Charge a us guys, Jesus. 22 Now, da Good An Spesho Spirit stay tell me fo go Jerusalem. I donno wat goin happen to me ova dea. 23 I ony know dat da Good An Spesho Spirit stay tell me ery place I go, I goin suffa an go jail. 24 ✡20:24: 2Tim 4:7But den, fo me, fo stay alive, dass notting. I ony like do eryting Da One In Charge, Jesus, tell me fo do to da end. He tell me fo tell erybody da Good Stuff bout how plenny good tings God do fo us.

25 “I wen go all ova da place wea you guys stay, an tell you guys bout how peopo can get God fo dea king. I know fo shua nobody from you guys goin eva see me no moa. 26 Dass why I stay tell you guys today dat nobody can poin finga me if some guy no trus God an get cut off from God. 27 Cuz I no sked fo tell you guys all da stuff God like fo you guys do. 28 Make shua you leada guys live da way God like you fo live. An take kea all da peopo dat da Good An Spesho Spirit give you guys fo take kea. You guys gotta take kea da church guys jalike one sheep guy take kea his sheeps. Cuz Da One In Charge, Jesus, wen bleed an mahke fo make dem come God kids. 29 I know fo shua afta I go, some guys jalike wild dogs goin come by you guys fo try wipe you guys out. 30 Some a dem guys goin come from you guys. Dey goin change da true stuff fo take some peopo wit dem. 31 So watch out, you know! No foget fo three year I all da time tell all you guys day time an nite time bout dis stuff, an I even cry bout um.

32 “Now, I give you guys ova to God, an I tell you fo lissen wat God tell bout how he like do good tings fo peopo. All dat goin make you guys come strong inside an give you guys all da good stuff God wen promise fo give all his kids, da ones dat stay spesho fo him. 33 I neva like scam odda peopo fo get dea silva o gold o clotheses. 34 You guys know dat I wen work fo all da stuff me an my frenz need. 35 I do all dat fo show you guys dat by dis hard work, we gotta help da guys dat no stay strong inside. I no foget wat Da One In Charge, Jesus, wen tell, ‘Da guy dat give, he stay mo betta inside den da guy dat get.’ ”

36 Wen he tell dat, he go down on his knees wit all dem guys an pray. 37 Dey all cry an dey hug him an kiss him bye. 38 Dey come mo sad cuz he tell dey no goin see him no moa. An dey go wit him to da boat.