1 An right now I stay telling you serious kine fo do all dis stuff, jalike me an you stay stan in front God an his Spesho Guy Jesus Christ. Jesus, he da One dat stay da Judge fo da peopo dat stay alive, an fo da peopo dat stay mahke too. I stay trus you fo do all dis stuff, cuz you know dat Christ goin come back an take ova eryting, cuz he da King! 2 So dis wat you gotta do: Tell erybody wat God tell. You gotta be ready an go all out, no matta if eryting going good o bad. Wen anybody do bad kine stuff, tell um how come wat dey wen do was bad, an tell um dey betta no do wass bad no moa. Give um good kine words. Fo all dis, you gotta stay tight wit dem guys fo long time, an make shua you teach um real good.
3 You know, da time goin come, wen peopo no goin like lissen da peopo dat teach da solid kine stuff. Dey goin do wateva dey like. Dass why dey goin bring togedda mo an mo teacha guys, but ony fo teach um da kine stuff dey like hear. 4 Dey no goin lissen da true stuff, an dey goin go da odda way. But dey goin like lissen any kine make up stories dass not true.
5 But you, Timoty, you gotta stay so notting bodda you, no matta wat happen. Hang in dea wen you suffa. Do yoa job: tell peopo da Good Kine Stuff from God. Do all da kine stuff you suppose to do cuz you one worka guy fo God.
6 But fo me, you know wat? Jalike I goin pour out my blood fo come one sacrifice awready. My time almos stay pau. 7 Jalike one runna guy, I wen run good an pau da race. I wen hang in dea fo do eryting Jesus, Da One In Charge, wen trus me fo do. 8 Now, ony get one ting I stay wait fo get—dass da spesho medal fo da winna, dat Da One In Charge goin give to all da peopo dat do da right tings. He da Judge, an he do eryting da right way. Wen da right time come, he goin give me da spesho medal fo da winna. Not ony fo me, but fo all da odda peopo dat get love an aloha fo Da One In Charge, an fo real like him come back. Den he goin give dem dea spesho medal too.
Paul An His Guys
9 Eh, Timoty! One mo ting! Go all out fo come by me quick! 10 ✡ 4:10 a: Col 4:14; Fil 1:24; b: 2Cor 8:23; Gal 2:3; Tit 1:4Demas, he wen bag an leave me hea, cuz he wen tink all da stuff inside dis world nowdays mo betta. He wen go Tessalonika side. Cresens, he wen go Galatia side, an Titus, Dalmatia side. 11 ✡ 4:11 a: Col 4:14; Fil 1:24; b: JGuys 12:12, 25; 13:13; 15:37-39; Col 4:10; Fil 1:24Luke, he da ony guy dat stay ova hea wit me. Go get Mark, an bring um ova hea wen you come. He one good helpa fo me, you know. 12 ✡ 4:12: JGuys 20:4; Efes 6:21-22; Col 4:7-8Tykikus, I wen sen um Efesus side. 13 ✡ 4:13: JGuys 20:6Wen I was Troas side, I wen leave my heavy coat by Carpus—bring um wen you come. Same ting wit da books, bring um. An if you no can bring um all, bring ony da sheep skin books. I need dem da mostes.
14 ✡ 4:14 a: 1Tim 1:20; b: Songs 62:12; Rome 2:6You rememba da guy Alexander, da guy dat make da coppa stuffs? Da buggah wen jam me up real bad! Da One In Charge goin pay him back bumbye, jalike Alexander wen do to me. 15 You betta watch out fo dat guy too! He wen go all out agains eryting us guys wen teach da peopo!
16 Da firs time inside da court, neva had nobody fo back me up. Dey all wen bag an leave me dea. But you know, I no like Da One In Charge give dem hard time fo dat. 17 Still yet, Da One In Charge, he wen back me up an make me strong! He like me fo tell da peopo eryting bout him, dass why. All da diffren peopos wen hear wat I tell um. An Da One In Charge wen take me out from dat place, jalike from inside da lion mout. 18 Erytime peopo like do bad kine stuff to me, Da One In Charge goin make shua dat notting bad happen to me. He goin take me outa all dat, an take me to da sky, wea he da King. I like erybody tell how awesome he stay, an I like fo dem tell dat foeva an eva! Az right!
Aloha To My Odda Braddahs An Sistahs
19 ✡ 4:19 a: JGuys 18:2; b: 2Tim 1:16-17You know Priscilla an Aquila, aah? Tell um “Aloha!” fo me. Same ting fo da peopo from Onesiforus ohana. 20 ✡ 4:20 a: JGuys 19:22; Rome 16:23; b: JGuys 20:4; 21:29Erastus wen stay ova dea Corint side. Wen I was Miletus side, Trofimus wen come sick, az why I wen leave him dea. 21 Go all out fo come hea befo get cold. Eubulus, Pudens, Linus, Claudia, an all oua odda braddahs an sistahs, dey like tell you “Aloha!” 22 I like Da One In Charge stay tight wit eryting inside you. An I like him fo do plenny good kine stuffs fo all you guys!
✡4:10 4:10 a: Col 4:14; Fil 1:24; b: 2Cor 8:23; Gal 2:3; Tit 1:4
✡4:11 4:11 a: Col 4:14; Fil 1:24; b: JGuys 12:12, 25; 13:13; 15:37-39; Col 4:10; Fil 1:24
✡4:12 4:12: JGuys 20:4; Efes 6:21-22; Col 4:7-8
✡4:13 4:13: JGuys 20:6
✡4:14 4:14 a: 1Tim 1:20; b: Songs 62:12; Rome 2:6
✡4:19 4:19 a: JGuys 18:2; b: 2Tim 1:16-17
✡4:20 4:20 a: JGuys 19:22; Rome 16:23; b: JGuys 20:4; 21:29