8
Wat Happen To Da Talka Fo God
Da Summa Kine Fruits
1 Den Amos tell: “Anodda time, dis wat Da One In Charge a me show me. Was jalike one dream: Get one basket wit da kine fruits inside dat ony get summa time. 2 Den Da One In Charge tell me, ‘Eh Amos! Wat you see ova dea?’ ”
I tell um, “One basket. Inside, get da kine fruits dat ony get summa time.”
Den Da One In Charge tell me, “Dass jalike my Israel peopo. Litto bit mo an dey goin come wipe out jalike da fruits. No way I goin let dem go one mo time an no punish dem!”
3 Da One In Charge a me, he tell dis too: “Wen dat time come, da peopo dat sing inside da Temple no can sing, cuz dey sore inside an stay cry loud. Goin get choke plenny mahke bodies! All ova da place! Take um outside da town! An no talk! Dass wat me Da One In Charge tell.”
God Punish Da Israel Peopo
(Amos 1:3–3:2)
Da Rich Ones
4 Den Amos tell:
“You rich guys, you betta lissen dis real good!
You guys go all out fo put presha
On da peopo dat no mo notting.
An you try fo wipe out guys inside yoa land
Dat stay sked fo stan up agains you.
5 You guys, dis wat you tink, aah?
‘Us guys no like wait fo da new moon time
Wen da religious kine ceremonies all pau!
Cuz us guys like sell food.
But no can, till da religious kine ceremonies all pau!
An us guys no like wait fo sell da wheat
Till da Res Day pau.
Us guys goin make uku pile a money,
Cuz da measure us guys use,
Goin be mo small den suppose to be.
We goin take da money from da peopo
Fo mo den wat dey suppose to pay.
Den, wateva dey buy,
We goin jam up da scale too.
6 We even pick up da junks from da wheat
An sell dat too.
Den we goin use dat money
Fo go find peopo dat no mo notting,
An odda guys dat owe somebody money fo one pair slippa,
An we buy dose guys cheap
Fo come slaves fo us guys.’ ”
God Goin Shake Up Da Whole World
7 Amos tell dis: “Da Israel peopo, dey get real big head cuz dey come from Jacob an feel proud bout Jacob. Da One In Charge wen make one strong promise lidis:
“Fo shua, I no goin foget
Da tings da Israel peopo wen do, eva!
8 So, wat? You tink da groun goin shake
Cuz a all dat bad kine stuff?
Fo shua, goin shake!
You tink erybody dat live inside dat land
Goin cry plenny?
Fo shua, dey goin cry plenny.
Da whole land goin move up an shake
An den move back down
Jalike da Nile Riva, Egypt side.”
9 Da One In Charge a me tell dis too:
“Wen da time come, I goin make da sun come dark noon time.
Dass wen da whole world goin come dark, no matta day time.
10 Wen you guys make one religious kine ceremony dat make you feel good,
I goin change um an make you guys come sad.
Wen you guys sing,
I goin make you guys sing one sad kine song.
I goin make erybody stay sad inside
An wear burmbag kine cloth
An shave bolohead fo show dey stay sad inside.
Goin be jalike wen da faddah-muddah guys come sad
Cuz dea one an ony boy mahke.
Dat time, goin be jalike eryting taste real bad, till da end.”
Da Peopo No Lissen God
11 Amos tell: “Dis wat da Boss, Da One In Charge a me, tell:
“ ‘You know wat?
Goin come one time
Dat I goin make erybody all ova da land
Feel jalike dey hungry.
But dass not da hungry you get fo bread
O da thirsty you get fo watta.
Me, Da One In Charge, I stay talk bout dis:
Dey goin like hear all da tings I wen tell befo time,
Cuz dey goin come hungry fo hear all dat now!
12 Dey goin go aroun from da Big Salt Lake
To da Mediterranean Sea,
An from da north side to da east side.
Dey goin go all ova da place, fo aks peopo
“Eh! Da One In Charge, wat he stay trying fo tell us guys?”
But dey no goin find notting.’
13 “Dat time, even da good looking young girls an da young guys goin pass out cuz dey so thirsty fo hear wat Da One In Charge tell. 14 Da ones dat make one strong promise, an make um by da name a da pilau idol kine gods dat da Samaria an Dan an Beer-Sheba peopo pray to, dey goin come wipe out an stay lidat foeva. Dey goin tell:
“I shua dat I goin do um,
Jalike I shua dat da idol kine god dat da Dan ohana peopo pray to, stay alive!
O jalike I shua dat da idol kine god we go pray to Beer-Sheba side, stay alive!
“But all dose peopo dat make dat kine promise, dey goin fall down an mahke.
Dey no goin get up, eva!”
Dass wat Da One In Charge tell.