9
Wen God Punish, No Can Run Away
1 Amos tell: “Jalike one dream, I wen see my Boss. He stan right dea by da altar fo da sacrifice. He tell:
“ ‘Go wack da top a da main poses fo da Temple!
Till eryting undaneat da poses shake an fall down!
Bus um up fo da whole ting fall down!
Bring um down on top da head a all da peopo
Dat still yet stay inside da Temple!
Anybody stay alive still yet,
I goin kill um wit da sword.
No mo nobody goin get outa dea,
No mo nobody goin run way!
2 “ ‘No matta dey dig way down inside da Mahke Peopo Place,
I goin pull um back outa dea wit my hand.
No matta dey go up to da sky,
I goin pull um back down from dea.
3 No matta dey go all da way on top Mount Carmel
An hide ova dea fo nobody see um,
I goin find um an drag um back.
No matta dey stay hide from me on da bottom a da ocean,
I goin tell da big sea monsta wat fo do
An he goin go afta um an bite um.
4 No matta da guys dat stay agains um make dem come prisonas
An make um walk all da way to anodda country,
I goin tell da peopo ova dea fo kill um wit swords.
I goin watch fo make shua dat bad tings happen to dem,
Not good tings.’ ”
Dass wat Da One In Charge tell.
God Get Powa Fo Punish
(Amos 1:2; 4:13; 5:8-9)
5 “Da One In Charge a me,
Da God Dat Stay In Charge Ova All Da Armies,
Wen he touch da world, jalike da world melt,
An erybody dat stay live inside da world come real sad.
Da land move up an move back down
Jalike da Nile Riva Egypt side.
6 Da One In Charge, he build da top part a his house inside da sky,
Da arch go all da way up from da earth.
He tell da watta fo come up outa da ocean,
Den he pour um out on top da groun.
Da One In Charge, dass his name,
Cuz dass who him!”
God Punish, An God Make New
Da Israel Peopo Not Mo Betta Peopo
Den Da Odda Peopos
Den Da Odda Peopos
7 Dis wat Da One In Charge tell:
“Eh you Israel peopo!
Fo shua, I no make diffren to you guys
An to da peopo from da Sudan land!
I wen bring you Israel peopo up hea outa da Egypt land,
I wen bring da Filisha peopo from Crete Islan too,
An da Aram peopo, I wen bring dem from Kir side.
8 You know wat? Me, Da One In Charge, yoa Boss.
An I stay watch yoa land.
I see dat all da peopo ova dea
Stay do wass wrong!
Fo shua, I goin wipe out all dat land,
All da peopo dat come from yoa ancesta guy Jacob!”
Dass wat Da One In Charge tell.
9 Da One In Charge tell dis too:
“You know wat I goin do?
I da one dat goin tell
‘Make da peopo dat stay agains you Israel guys
Throw you outa yoa land
An make you go diffren countries fo live dea!’
Goin be jalike wen somebody shake one straina
An all da small rocks stay inside da straina,
But da good stuff fall down to da groun.
10 Goin get war,
An all my peopo dat do wass wrong goin mahke.
Dey da ones dat tell,
‘Notting bad goin happen to us guys!
All dat bad kine stuff no goin catch us up!’ ”
God Goin Make Da Israel Peopo Come New
(Jesus Guys 15:16-18)
11 ✡ 9:11: JGuys 15:16-18Plus, Da One In Charge tell dis:
“Dis peopo dat had King David fo dea king befo time,
Now dey all hamajang, jalike one shack ready fo fall down.
But goin come da time,
I goin fix up dea land jalike was King David time.
Jalike da peopo fix one wall dass all broke an fall down,
I goin fix dat wall dat was all bus up
An put up da tings dat wen broke.
I goin build um jalike was befo time.
12 Cuz a dat, da Israel peopo goin take ova wat still stay from da Edom land
An all da odda countries dat was mines befo time.”
Dass wat Da One In Charge tell, da One dat goin do all dat.
13 An you know wat? Da One In Charge tell dis too:
“Goin come da time,
Wen dey plant stuff goin grow real fas.
Da firs part goin be ready fo harves
Befo dey even ready fo plant da odda part!
Even wen time awready fo make ready da grape seeds
Fo plant da nex time
Dey still goin make lidat fo step all da grapes dey get
Fo make wine, from da las time!
Goin get real plenny juice from da fresh grapes
Goin run down da hills
An make da hills look jalike dey stay melt all ova da place!
14 I goin bring my Israel peopo back
From da place wea dey stay prisonas.
Dey goin build one mo time da towns dat was all bus up.
Dey goin make house dea, an plant grape fields
An drink da wine dat dey make dea.
Dey goin plant gardens
An eat da fruits dat grow dea.
15 I goin put my peopo on top dea land
Jalike I plant um dea.
An nobody goin throw um outa dea land, eva.
Cuz I wen give um dat land.”
Dass wat Da One In Charge tell, an he da God fo dem!