31
Da Guy Dat Know How Fo Make
Nice Looking Tings
Nice Looking Tings
1 Den Da One In Charge tell Moses: 2 “You know wat? I stay give you da name fo da guy dat goin work wit you. Dass Bezalel, Uri boy. His granfaddah, Hur. He come from da Judah ohana. 3 An I wen make my Spirit take ova him, fo make him smart fo make nice looking tings, an know all da diffren ways fo do um, an know how fo do any kine job he gotta do. 4 He know how fo figga bout how da gold an silva an bronze metal goin look, an den make um look good. 5 He know how fo cut da jewelry stones an make frame fo dem, an how fo cut da wood fo make ery kine ting. Bezalel, az da guy dat know how fo do all dese kine tings.
Da Helpa Guys
6 “An I wen pick Oholiab fo help him, Ahisamak boy. He from da Dan ohana. Get plenny odda peopo dat I wen make smart fo make all kine stuffs. I like dey make all da tings I stay tell you fo make:
7 da Tent Wea I Come Togedda Wit You Guys, an
da Box Fo No Foget Da Deal, an
da Place Fo Hemo Da Shame Fo Da Bad Tings Peopo Do Fo Make Um Come Pono Wit Me, on top da Box.
Dey goin make all da furnitures fo inside da Tent:
8 da Table an da tings you use fo um,
da Lamp Stan made outa pure gold an da tings you use fo da lamps,
da Altar fo da incense,
9 da big Altar fo burn da sacrifices on top an da tings you use fo dat,
da Watta Tank an da stan,
10 da thick religious kine clotheses fo da pries guys,
da spesho clotheses Aaron goin wear cuz he da Main Pries Guy,
an da clotheses his boys goin wear fo da pries kine job.
11 An da helpa guys goin make da spesho oil fo put on top da pries guys head fo make um come da prieses, an da incense dat smell nice fo go inside da Spesho Place inside da Tent. Dey goin make um all jalike I wen tell you fo make um.”
Da Rules Fo Da Res Day
12 Den Da One In Charge tell Moses: 13 “Tell da Israel peopo dis: No matta wat happen bumbye, you guys gotta do wat da Rules fo da Res Day tell foeva. Da Res Day, goin show dat me an you guys get one deal. Even da peopo dat goin come from you guys. So den you guys no goin foget was me, Da One In Charge, dat wen make you guys spesho fo me. 14 You guys gotta make da Res Day one spesho day, cuz was me dat wen make dat day spesho fo you guys. Anybody dat no mo respeck fo da Res Day, gotta mahke. Anybody go work dat day, you guys gotta cut um off from da Israel ohana an no let um stay wit you guys. 15 ✡ 31:15: Outa 20:8-11; 23:12; 34:21; 35:2; Pries 23:3; Rules2 5:12-14Get six days fo work an do eryting you gotta do. But da day numba seven, dass da day fo no work an no do notting, ery week. Dat day, spesho fo me, Da One In Charge. Anybody go work da Res Day, gotta mahke. 16 Da Israel peopo gotta do wat da Rules fo da Res Day tell, dass you guys, an da peopo dat goin come from you guys afta. Dass da Deal foeva. 17 ✡ 31:17: Outa 20:11Dis goin be jalike one sign foeva, fo da Deal dat I get wit you Israel peopo. Cuz me Da One In Charge, an I wen work six days fo make da sky an da world, but da day numba seven, I pau my work, an wen res an feel good bout um.”
18 Wen Da One In Charge tell Moses eryting he gotta do, ova dea on top Mount Sinai, he give Moses da two flat stone. Was ony God dat write da Deal on top da stone wit his finga.