God Tell No Need Get Punish
Fo Da Bad Kine Stuff We Do
Us guys gotta tink plenny bout all da stuff we wen hear fo us no foget um. You know, all da stuff da angel messenja guys tell befo time was da trut, an was from God. If had peopo dat broke da Rules From God an neva lissen, God wen do da right ting wen he punish um fo da Rules dey wen broke.
Was lidat befo time. But den, Da One In Charge, Jesus, tell peopo dis awesome ting da firs time—how dey no need get punish fo da bad kine stuff dey do! Had peopo dat wen hear Jesus, an dey wen show us guys proof dat da tings he tell was fo real. But if us guys no like lissen him, no way we no goin get punish fo da bad kine stuff we do. An anodda ting: God wen show proof dat he stay tell da trut. An he do dis cuz he get da powa fo do all kine awesome stuff fo show who him. An God give his peopo his Good An Spesho Spirit fo dem do diffren kine tings he like dem fo do.
Jesus, Da Leada Dat No Gotta Punish Us Fo Da Bad Kine Stuff We Wen Do
(Songs 8:4-6; 22:22; Isaiah 8:17-18; 41:8-9)
We stay talk bout da new world dass goin come. But God neva tell bout da angel guys, dat dey goin be in charge a someting ova dea. 2:6: Songs 8:4-6But get one place inside da Bible wea David tell dis:
“God, how come you tink plenny bout us peopo on top da earth?
An how come you get aloha fo us peopo?
You wen make da angel guys
Ony litto bit mo importan den us peopo.
You wen make us peopo awesome
An you show us plenny respeck
Jalike you put one crown on top oua head.
[An you wen put us peopo
In charge a eryting you wen make.]
You put us in charge ova eryting.”
You know, wen da Bible tell dat God put us peopo in charge a eryting, dat mean eryting! But right now, wen us guys look aroun, we see dat us peopo still yet no “stay in charge a eryting.” But get one Guy dat “fo short time, da angel guys was litto bit mo importan den him.” Dass Jesus! Cuz Jesus wen go suffa an mahke fo erybody, God “make him awesome, an show him plenny respeck, jalike God go put one crown on top his head.” Dass how God do plenny fo us guys, cuz Jesus wen suffa an mahke fo us no need get punish. 10 Eryting dat get in dis world stay fo God, an come from God. Az why was good dat God wen make Jesus come da bestes kine leada cuz he wen suffa plenny. An dat make plenny peopo no gotta get punish fo da bad kine stuff dey wen do. God do all dis fo make dose peopo come awesome cuz dey God kids now.
11 Jesus make peopo good an spesho fo God. An him an dem, dey all get da same Faddah. Az why Jesus no shame fo call dem “my braddahs an sistahs.” 12  2:12: Songs 22:22Dis wat Jesus tell God:
“I goin tell all my braddahs an sistahs
Bout wat kine god you.
An wen my braddahs an sistahs all come togedda,
I goin sing bout you.”
13  2:13 a: Isa 8:17; b: Isa 8:18An one mo time, anodda place in da Bible, Jesus tell dis:
“I goin trus God erytime.”
An anodda place, he tell dis one mo time:
“Look! Dis me!
An dese guys, dey God kids!
God wen give dem to me!”
14 God kids get blood an bones cuz dey peopo. Dass why Jesus jalike dem, wit blood an bones too. He stay lidat so dat wen he mahke, he hemo all da powa from da Devil, da one dat get da powa fo kill peopo. 15 An get peopo dat stay sked all da time dey stay alive. Dey sked dey goin mahke, jalike dey slaves. But Jesus make um no stay slaves no moa. Da Devil da one make peopo stay sked fo mahke. Az why dey lissen him, jalike dey slaves unda him. But now da Devil no can do dat no moa. 16  2:16: Isa 41:8-9Fo shua Jesus neva come hea fo help da angel guys. He come fo help da peopo dat come from Abraham. 17 Dass why Jesus gotta come jalike his braddahs an sistahs, ery kine way. An cuz Jesus jalike his braddahs an sistahs, he goin come dea Main Pries Guy fo take kea all da kine stuff da Jew Main Pries Guy do fo God. He give da peopo chance, an he da kine guy dey can trus. Cuz az who him, an he goin hemo da shame fo all da bad kine stuff da peopo do, an bring um back togedda wit God. 18 Jesus, he wen get presha fo do bad kine stuff, but he no do um. An he wen suffa plenny cuz a da presha. Dass why now he help da peopo handle da presha dey get fo do bad kine stuff.

2:6 2:6: Songs 8:4-6

2:12 2:12: Songs 22:22

2:13 2:13 a: Isa 8:17; b: Isa 8:18

2:16 2:16: Isa 41:8-9