6
Da Israel Peopo No Come Sorry
(Matthew 9:13; 12:7; Efesus 6:17)
1 Da Israel peopo tell,
“Go come, we go back by Da One In Charge.
He wen rip us up,
But he goin make us come good.
He wen wack us guys,
But he goin put one bandage on us.
2 Two days, an he goin make us come strong one mo time.
Day numba three he goin bring us back,
So den we goin stay alive in front him!
3 Good we know Da One In Charge.
Good we go all out fo know um.
Jalike us guys stay shua da sun goin come up,
We stay shua Da One In Charge goin show up—
Jalike da rain dat come winta time,
An jalike da rain give watta on top da earth spring time.”
4 But Da One In Charge tell,
“Wat I goin do wit you Efraim peopo?
Wat I goin do wit you Judah peopo?
Wen you guys tink you stay tight wit me,
Az jalike da mist dat disappea morning time.
Jalike da dew dat come early an den go way.
5 Az why I sen da guys dat talk fo me.
But you neva lissen wat I tell!
An cuz you no lissen dem, I goin cut you guys up
Fo kill you wit wat I tell.
6 ✡6:6: Matt 9:13; 12:7Cuz make me feel good,
Wen you guys stay tight wit me,
Mo den wen you jus make sacrifice.
Make me feel good,
Mo den wen you jus make one burn up kine sacrifice
Wen you guys know dat I God.
7 “But jalike Adam wen do, dey wen broke da deal dey get wit me.
Da way dey ack, I no can trus dem.
8 Gilead, az one big town full a bad kine peopo.
Dey get stain from da blood a da peopo dey wen kill.
9 Da pries guys, dey one gang,
Jalike da steala guys dat hide togedda fo jump somebody.
Dey kill peopo on top da Shekem road.
Dey make plans fo do real bad kine stuff.
10 I wen see real bad tings
Da Israel an Efraim ohanas stay do.
Ova dea, dey come pilau
Cuz dey fool aroun wit odda gods.
11 “An fo you Judah peopo too,
I wen pick one day awready fo punish you guys.
Az goin be jalike wen da harves time come
An you gotta pay fo da bad kine tings you stay do!
Dass da time I wen like bring back my peopo
From wea dey was prisonas,