9
God Goin Punish Da Israel Peopo
1 You Israel peopo, no yell jalike you stay good inside!
No ack jalike da odda peopos wen dey amp out.
I tell dat cuz you guys no stay tight wit yoa God.
Ery place wea peopo split da wheat from da junks,
You guys like get money
Cuz you fool aroun wit idol kine gods!
2 Now da wheat an da grapes no goin be enuff
Fo give food fo da peopo.
Da new wine no goin be wat dey need.
3 Da peopo no goin stay inside da land Da One In Charge own.
Da Efraim peopo, some goin go back Egypt side,
An some goin go Assyria side.
Dey goin eat da kine food ova dea
Dat make um so dey no can go in front Da One In Charge.
4 Ova dea, dey no goin pour out wine
Fo make sacrifice fo Da One In Charge,
Cuz God had it wit dea sacrifices.
Dea sacrifices goin be fo dem
Jalike bread from one house wea somebody mahke.
You eat dat kine bread, you no can go in front Da One In Charge.
Ova dea, da food goin be ony fo peopo eat um.
No can bring um inside da Temple Fo Da One In Charge.
5 Egypt side an Assyria side, wat you guys goin do
Wen you suppose to make da spesho religious ceremonies?
Da times dat stay spesho fo Da One In Charge?
6 Even if da Israel peopo no come wipe out,
You know wat goin happen?!
Da Egypt peopo goin make um prisonas,
An da Memphis peopo goin bury dem.
Da thorn bushes goin take ova da silva dey like plenny,
An take ova dea tents.
7 ✡9:7: Luke 21:22Da time fo punish you stay come.
Az da time fo pay you back, cuz you wen make lidat.
Make shua da Israel peopo know dat!
You guys do plenny bad kine stuff,
An you guys hate me plenny.
Az why you guys tink da guys dat talk fo God
Do bad kine stuff an no bodda dem,
An you tink da guys dat lissen God Spirit, pupule.
8 Da guys dat talk fo my God,
Dey da guys dat guard you Efraim peopo.
But all ova da place, get traps dat stay ready
Fo catch da guys dat talk fo God.
Get peopo dat hate dem even inside da Temple Fo God.
9 ✡9:9: Local 19:1-30Dey go all out fo do plenny bad kine stuff,
Jalike wen happen long time befo inside Gibeah town.
God no foget da blame dese guys get.
An he goin punish dem fo all da bad stuff dey do.
10 ✡9:10: Census 25:1-5Da One In Charge tell:
“Was nice, firs time wen I wen find da Israel peopo!
Az jalike wen you find grapes inside da boonies.
Wen I see yoa ancesta guys,
Az jalike I wen find da firs ripe fruits on top one fig tree.
But wen dey wen come Baal-Peor,
Dey go all out fo dat shame kine idol god ova dea.
Dey come shame jalike da idol dey love.
11 Da Efraim peopo, dey awesome.
But no goin be lidat no moa, jalike wen one bird fly away.
Dey no goin get hapai.
Dey no goin born kids.
12 Even if you guys bring up kids,
I goin take away all dem from you.
Bummahs fo dem, wen I tell ‘Laytas’ to dem!
13 I wen pick da Efraim peopo,
Fo make um come good looking an rich
Jalike da Tyre peopo was befo time,
Jalike I plant dem inside one nice place wit plenny grass.
But now, da Efraim peopo gotta bring out dea kids
Fo da ones dat stay agains kill um.”
14 Da One In Charge, wat I goin tell you fo do fo dem?
Make dem lose dea bebes!
Make dea breases dry up!
15 Da One In Charge tell, “Cuz a all da bad kine stuff my peopo wen do Gilgal side,
Ova dea I wen start fo hate dem.
Cuz a da bad kine tings dey stay do,
I goin kick dem outa my land.
I no goin love dem no moa.
All dea leadas stay go agains me.
16 Da Efraim peopo, jalike one grape plant dat no can grow.
Dea root come all dry,
An no mo fruit.
Even if dey born mo kids,
I goin kill da kids dey love.”
17 God tell “Laytas” to da Israel peopo
Cuz dey no goin lissen him.
Dey goin go from one nation to anodda nation,
Cuz dey donno wea dey stay goin live.