1 Jesus look up an spock da rich guys putting dea money inside da money box inside da Temple. 2 Den he spock one widow dat no mo notting. She put two small coppa coins inside dea. 3 He tell, “I tell you guys da trut: Dis widow dat no mo notting, she wen put in mo plenny money den all da odda peopo. 4 All da odda peopo wen give dea money from plenny money dey get. But her no mo notting, yet she wen give God da ony money she get fo stay alive.”

5 Some a his guys talk story bout da Temple, how da Temple get da awesome stones an da odda tings da peopo wen give fo God. Jesus tell, 6 “You guys see all dis stuff? Bumbye no goin get one stone on top anodda. Eryting goin fall down.”

7 Jesus guys tell him, “Teacha, wen all dat kine stuff goin happen? An wat kine ting goin happen fo show us wen da time come fo dat?”

8 Jesus tell um, “Watch out! No let nobody bulai you guys! Plenny guys goin show up an use my name. Dey goin tell, ‘Eh me, I dat Spesho Christ Guy from God! Da time stay now!’ But no go wit dem. 9 You guys goin hear, ‘Dey fighting an get war all ova da place.’ No come bum out. All dat kine stuff gotta happen, but dat no mean eryting goin come pau yet.”

10 He tell, “Countries goin fight each odda. Kings goin fight each odda. 11 Da groun goin shake. No goin get food, an all ova da place da peopo no goin get notting fo eat. Plenny peopo goin get real sick an mahke. Real bad an awesome stuff goin come dat goin make plenny peopo come real sked. Unreal stuff from da sky goin come.

12 “Befo all dat stuff happen, peopo goin grab you guys an make you suffa. Dey goin turn you guys ova to da Jew churches an throw you guys inside jail. Dey goin bring you guys in front kings an govnas. Dey goin do all dat cuz you my guys. 13 Den you guys goin get chance fo tell dem da Good Stuff From God.

14 ✡21:14: Luke 12:11-12“But befo dat happen, go figga lidis: You guys no need worry wat you goin tell. 15 Cuz I goin give you guys wat fo tell, an I goin make you guys know wat fo do erytime, so da guys dat stan up agains you no goin know wat fo tell, an dey no goin show proof dat you guys wen do wrong.

16 “Even yoa faddah an muddah goin set you guys up. Yoa braddahs, yoa ohana, an yoa frenz goin set you guys up too, an dey even goin kill some a you guys. 17 Erybody goin hate you guys cuz dey know you my guys. 18 But dey no goin hurt you guys. You guys no goin lose even one hair from yoa head! 19 If you guys hang in dea to da end, you guys goin get da kine life dass fo real!

20 “Wen you guys see Jerusalem town wit da army guys all aroun dea, you goin know dat da time stay nea wen dey goin bus up Jerusalem. 21 Den da peopo dat stay Judea side gotta run to da mountains. Da guys inside Jerusalem town gotta get out, an da guys inside da boonies betta not go back town. 22 ✡21:22: Hos 9:7Cuz da time stay dat dey gotta suffa plenny, jalike da Bible tell. 23 Goin be hard time fo da hapai wahines an da muddahs dat stay breas feed dea bebes! Erybody in da land goin suffa plenny, cuz God had it wit da bad kine stuff da peopo wen do. 24 Peopo goin kill some wit swords, an take oddas away. Peopo all ova da world goin make um prisonas. Da peopos dass not Jew guys goin bus up Jerusalem an walk all ova um, till dea time pau.

25 ✡21:25: Isa 13:10; Ezek 32:7; Joel 2:31; JShow 6:12-13“Goin get awesome stuff fo see up inside da sky, wit da sun, da moon, an da stars. All ova da world, da peopos from inside da diffren countries goin suffa plenny. Dey goin come all bum out, jalike peopo feel wen da ocean poun loud an da waves come real high. 26 Da peopo goin pass out cuz dey so sked. Dey sked cuz dey donno wat goin happen inside da world. Da big powas inside da sky jalike da stars goin get shake up. 27 ✡21:27: Dan 7:13; JShow 1:7Dat time dey goin spock me, da Fo Real Kine Guy, stay coming inside one cloud wit plenny powa, an I goin be real awesome. 28 Wen all dat stuff start fo happen, stan up tall an look up. Cuz da time stay nea fo God cut you guys loose from da powa da bad kine stuff get ova you.”

29 Jesus tell um anodda story fo teach um. He tell, “Look da fig tree an ery kine tree. 30 Wen get new leaf, you can see um, an you know da summa time almos come. 31 Same ting, wen you guys see all dis stuff happen, den you goin know dat God stay da King hea now.

32 “Dass right! An I tell you guys dis too: All dat stuff goin happen befo all da guys dat stay alive now goin mahke. 33 Da sky an da earth goin go way, but wat I tell no goin go way, eva.

34 “Watch out! No good you guys come all jam up wit too much partying, getting piloot, an worrying bout all kine stuff. No good Da One In Charge come back, an you guys not ready. 35 Fas like one trap dat day goin come fo all da peopo dat stay inside da whole world. 36 Watch out all da time, an stay ready. Tell God fo let you get outa all da stuff dat goin happen, an fo let you stan in front me, da Fo Real Kine Guy.”

37 ✡21:37: Luke 19:47Ery day Jesus teach inside da open lanai fo da Temple. Wen da sun go down, he go outside da town fo stay on top da Olive Ridge. 38 An real early in da morning da peopo come fo hear him teach inside da open lanai fo da Temple.