32
One Sad Song Fo Pharaoh
1 March 3, da numba twelve year King Koniah stay prisona, get dis message come fo me from Da One In Charge: 2 “Eh! Fo Real Kine Guy! Sing one funeral kine song bout Pharaoh, da Egypt king. Tell him:
“Mo den all da diffren peopos,
You was jalike one lion!
But now, you all bus up!
You mo jalike one sea monsta from da ocean!
You splash plenny watta in yoa Nile Riva channels.
You step all aroun da riva an make um dirty.
Az why da watta come muddy inside all da streams.
3 “Dis wat me Da One In Charge, da Boss, tell:
“ ‘I goin bring togedda plenny diffren peopos
Fo throw my net ova you.
Den dey goin pull you up inside my net.
4 I goin throw you down on top da dry land,
An throw you out on top da open fields.
I goin let all da birds in da sky land on top you.
An da wild animals from all ova da world
Goin grind yoa body.
5 I goin spread yoa body meat all ova da mountains.
I goin fill da valleys wit da rotten meat from yoa body.
6 I goin soak da land wit da blood dat come outa yoa body,
All da way to da mountains.
Da watta channels goin come fill up
Wit da stuff dat come outa you.
7 ✡32:7: Isa 13:10; Matt 24:29; Mark 13:24-25; Luke 21:25; JShow 6:12-13; 8:12Wen I pio you, I goin cova da sky,
An make da stars come dark.
I goin cova da sun wit one cloud,
An da moon no goin give da light she give.
8 All da lights inside da sky,
I goin make um come dark ova you.
I goin make yoa land come dark.
Az wat me Da One In Charge, da Boss, tell.
9 “ ‘I goin make you guys come all bus up.
An da odda nations goin find out wat happen to you.
Cuz a dat, plenny diffren peopos goin come futless,
Even peopo from lands dat you neva know bout befo
Goin come futless too.
10 I goin make plenny peopo bum out cuz a wat goin happen to you.
Dea kings goin come sked an shaking an come bum out cuz a you,
Wen I wave my sword aroun in front dem.
Da time you fall down, dey all goin shake an come sked,
Cuz dey donno if dey goin stay alive, o not.’
11 “Dis wat me Da One In Charge, da Boss, tell bout all dis:
“Da Babylon king goin use his army guys wit swords agains you.
12 All da tings you like show off,
I goin bring um down.
Strong guys goin use dea swords agains you.
Dey da mos skery peopos on top da earth.
Dey goin wipe out da real big head Egypt peopo,
An bring down eryting da Egypt peopo like show off.
13 I goin wipe out all dea cows
From wea dey grind nea plenny streams.
Da peopo no goin make da watta muddy wit dea feets no moa.
An da cows no goin make mud wit dea hoofs too.
14 Den I goin let da riva wattas calm down so no mo mud.
An make da streams flow nice kine jalike olive oil flow.
Az da message from me, Da One In Charge, da Boss.
15 Wen I make da Egypt land come all wipe out,
An take away eryting inside um,
An wen I wack down all da peopo dat live ova dea,
Den dey goin know az me Da One In Charge do all dat.”
16 “Dis da funeral song dey goin sing fo Egypt. Da wahines from all da diffren nations goin sing um fo Egypt an all da tings da Egypt peopo like show off. Az wat me Da One In Charge, da Boss, tell.”
17 Den March 17, da numba twelve year dat King Koniah stay prisona, get dis message fo me from Da One In Charge: 18 “Eh! Fo Real Kine Guy! Cry real loud cuz get plenny Egypt peopo make tantaran. Go make Egypt go down undaneat da groun wit da wahines from odda importan nations, an wit da odda peopo dat go down inside da Deep Dark Hole. 19 Tell dem, ‘You Egypt guys tink you mo nice den da odda peopos, o wat? Go down inside da Deep Dark Hole an lay down wit da odda peopos, da ones dat no mo da mark from God dat show dey his peopo.’ 20 Da Egypt peopo goin fall down wit da odda peopo dat get kill wit swords. Cuz da Babylon army guys wit swords stay ready fo kill da Egypt peopo too. Dey goin drag off all da Egypt peopo dat make tantaran. 21 Da mahke guys dat was big leadas befo time goin talk inside da Mahke Peopo Place bout da Egypt peopo an da ones dat help dem. Dey goin tell: ‘Dey down hea awready! Dey lay down hea wit us guys dat no mo da mark from God fo show dat us his peopo, an dey get kill wit swords.’ ”
22 “Da Assyria guys stay dea wit all dea army guys. Dey get graves all aroun fo dea guys dat wen get kill wit swords. 23 Dea graves stay inside da mos far part a Da Deep Dark Hole, an dea army guys lay down dea aroun da Tomb fo Assyria. Dey da strong guys dat wen get kill wit swords. Dey da ones dat make da peopo dat still stay alive come sked.
24 “Da Elam peopo stay dea too, an all dea choke plenny peopos aroun da Elam tomb. Dey all get kill wit swords. Dey da ones dat make da peopo sked dat still stay alive. But dey all wen go down jalike da odda peopos dat no mo da mark from God dat show dey his peopo. Dey shame in front erybody, jalike da oddas dat go down inside da Deep Dark Hole. 25 Dey get one place fo sleep wit da peopo dat get kill, wit all dea choke plenny peopo aroun da Elam tomb. Dey no mo da mark from God fo show dey his peopo. An dese da guys wen get kill wit swords. Cuz dey wen make da peopo sked dat still stay alive, az why dey get shame jalike all da peopo dat go down inside da Deep Dark Hole. Dey get one place ova dea fo lay down wit da odda guys dat get kill.
26 “Da Meshek an Tubal guys stay dea too, wit all dea choke plenny guys aroun da Meshek-Tubal tomb. No mo nobody from dem get da mark from God fo show dey his peopo. Dey get kill wit swords cuz dey make da peopo sked dat still stay alive. 27 Dey no get bury wit respeck. Get odda guys dat no mo da mark from God fo show dat dey his guys. An wen dose odda guys go down inside da Mahke Peopo Place, dey take wit um dea weapons dey use fo fight. Dey get bury wit dea swords undaneat dea heads. But fo da Meshek an Tubal guys, God punish dem cuz a da bad kine stuff dey wen do. Da odda peopos wen stay sked cuz a dose guys.
28 “You too, Pharaoh, God goin wipe you out. You goin lay dea wit da odda guys dat no mo da mark from God, da ones dat get kill wit swords.
29 “Da Edom kings an all dea princes stay dea too. No matta dey stay strong befo time, dey lay down ova dea wit da guys dat get kill wit swords. Dey lay down dea wit da guys dat no mo da mark from God. Az da guys dat go down inside da Deep Dark Hole. 30 All da princes from da north side, an all da Sidon peopo stay dea too. Dey wen go down wit da ones dat get kill. Befo time, dey make erybody come sked cuz dey strong. But now, dey shame. Dey lay down dea wit da odda guys dat no mo da mark from God, an dey get kill wit swords. Dey get shame, jalike da odda peopo dat go down inside da Deep Dark Hole.
31 “All dose guys da ones Pharaoh an all his army guys goin see down dea. Az why Pharaoh no goin feel bad bout all his army guys dat get kill wit swords. Az wat me Da One In Charge, da Boss, tell. 32 No matta me Da One In Charge make peopo dat still stay alive come sked, da Pharaoh guy an all his choke plenny peopos goin lay down dea wit da peopo dat no mo da mark from God, da guys dat wen get kill wit swords. Az da message from me Da One In Charge, da Boss.”