31
One Cedar Tree Inside Lebanon
1 June 21, da numba eleven year dat King Koniah stay prisona, dis message come fo me from Da One In Charge: 2 “Eh! Fo Real Kine Guy! Tell dis to Pharaoh da Egypt king an all his peopo:
“ ‘Get one king mo awesome den you, o wat?! No ways!
3 You know bout Assyria, aah? Befo time, jalike dey was one cedar tree Lebanon side.
Get nice looking branches
Dat make shade ova all da odda fores trees.
Da Assyria tree real tall, mo high den da odda trees
Dat grow togedda wit um.
4 Da watta make um grow big.
Deep undagroun streams make um grow tall.
Da streams go all aroun da place wea dat tree grow.
An all aroun da odda fores trees.
5 Az how da tree grow tall,
Mo tall den all da odda trees in da country side.
Da branches come big.
An spread out plenny cuz get plenny watta.
6 All da birds in da sky make nes inside da branches.
All da wild animals born dea bebes undaneat da branches.
All da importan nations live
Unda da shade a dat tree.
7 Da cedar tree look good looking cuz stay awesome.
Da big branches spread out all ova,
Cuz da roots go down fo get plenny watta.
8 ✡31:8: Start 2:9Da odda cedar trees inside da park wit trees God wen make,
No mo no odda tree stay awesome jalike dat tree!
Da pine trees no mo da same kine big branches.
Da plane trees no mo plenny leafs on top da branches.
No mo anodda tree inside da park God plant
Dat stay mo beautiful den dis tree.
9 I make um beautiful,
Wit plenny leaf.
All da trees inside Eden, da park God make,
Jalike dey jealous bout dis tree.
10 “ ‘Az why dis wat Da One In Charge, da Boss, tell: Egypt jalike dat tree! She stay mo tall ova all da odda trees, an cuz a dat she ack high makamaka bout how tall she stay. 11 Cuz da Egypt peopo stay do real bad kine stuff, I turn her ova to one nation dat stay in charge a all da odda nations fo dem handle her. I awready wen kick out dat tree! 12 So da nation dat stay mo mean den all da odda nations, dey cut down da big cedar tree an leave um ova dea. Da branches fall down on top da mountains an inside all da valleys. Da branches broke an lay inside all da gulches all ova da land. All da peopos on top da earth come outa da shade an bag from dea. 13 All da birds in da sky stay on top da cut off tree trunk dat lay dea, an all da wild animals stay wea da branches fall down. 14 Az why no goin get anodda tree dat drink plenny watta grow real tall lidat, above da odda trees dat get plenny leaf. Da ones dat drink plenny watta fo come tall, dey all goin mahke an go down inside da groun, wit da odda peopo dat mahke an go down inside da Deep Dark Hole.
15 “ ‘Dis wat Da One In Charge, da Boss, tell: Dat same day da big tree fall down inside da Mahke Peopo Place, I stop da deep undagroun streams an make um moan jalike dey stay sad inside wen somebody mahke. I hold back da streams an da odda wattas dat tree drink. Cuz a dat, I make Lebanon come real bum out cuz all da fores trees come dry. 16 Wen da big tree fall down, da noise make all da peopos come sked. Dass how I make dem shake. I make da tree fall down inside da Mahke Peopo Place, jalike all da odda ones dat go down inside da Deep Dark Hole. Den all da trees inside Eden, da bestes ones inside Lebanon, all da ones dat drink plenny watta, dey feel mo good inside. Az cuz da big tree stay wit um down dea unda da groun. 17 Da peopo dat live unda da shade a da big tree, an da odda peopos dat stay frenz wit dem, dey go down inside da Mahke Peopo Place too. Dass da same place fo da ones dey kill wit swords.
18 “ ‘Eh! Pharaoh King! Fo shua no mo anodda tree inside Eden mo awesome den you! But you know wat? Goin get armies bring you down too jalike da Eden trees fo go undaneat da groun. You goin lay dea wit da peopos dat no mo da mark fo show dat dey God peopo, an wit da ones get kill wit swords. All dis jalike one picha bout you, King Pharaoh! You da one dat make tantaran! Dat big tree, az you, you know!’ Az wat me Da One In Charge, da Boss, tell.”