4
1 Dat time, afta plenny guys mahke in da war time,
Seven wahines goin grab one a da guys dat still stay dea.
Dey goin tell um,
“Ony marry us
Fo us get yoa name,
Fo peopo no talk bad bout us
An make us come shame cuz we no mo husban.
We goin eat da food us get awready,
An wea da clotheses us get awready.”
God Promise Fo Bring Dem Back
2 Dat time, goin get one guy,
Da One In Charge goin give him da right fo be king,
Cuz he jalike one new branch
Dat Da One In Charge make come out from da king ohana.
Dat guy goin be real good looking an stay awesome.
Erybody goin know bout da stuff dat grow on top da land,
Dat goin come real awesome too,
An da Israel peopo dat still yet stay alive dat time
Goin feel real good inside bout all dat,
An all da odda peopo goin get respeck fo dem.
3 All da peopo dat still yet stay alive inside Jerusalem town,
Peopo goin call dem “Spesho fo God”
Cuz dea name goin stay write down.
4 My boss goin clean up
All da pilau kine stuff da Jerusalem wahines wen do.
Jalike he goin wash clean da Jerusalem peopo
Cuz dey wen make plenny oddas bleed an mahke.
His Spirit goin be dea judge
An jalike wit one fire, he goin clean out all da bad kine stuff.
5 ✡ 4:5: Outa 13:21; 24:16Da One In Charge goin make one cloud
Ova da Temple on top Mount Zion
An ova erybody dat stay come togedda dea
Fo show him respeck wen he tell um fo come by him.
Day time, goin get one cloud wit smoke ova dem,
Nite time, goin get one real bright fire ova dem.
Ova all dis awesome stuff goin get one cova,
Jalike one tent ova erybody.
6 Dass goin be jalike one place fo shade
Wen da sun stay hot, day time,
Goin be one place dey can go
Fo hide an no get hurt
From da storms an da rain.