5
One Song Bout Da One In Charge
An His Peopo
An His Peopo
(Matthew 21:33; Mark 12:1; Luke 20:9; James 5:4)
1 ✡5:1: Matt 21:33; Mark 12:1; Luke 20:9I like sing one song fo da one I get love an aloha fo.
I goin sing one song bout his grape field
On top one hill dat get good groun.
2 He dig up da groun,
Take away all da stones dea,
An plant good kine grape plants.
He build one towa in da middo
Wea his worka guys can watch um.
He even cut da stone one place nea dea
Fo step all ova da grapes
Fo press out da juice fo make wine.
He wen wait fo da good grapes get fruit.
But wat wen come out was real sour kine grapes.
3 Da one I get love an aloha fo, he talk:
“So den, you peopo dat live inside Jerusalem,
An you guys from Judah,
You guys tell me wass right an wass wrong
Bout me an my grape field!
(Dass da Israel peopo, you know.)
4 Tell me wat odda ting I gotta do
Fo my grape field, dat I neva do befo time?
I wen wait long time fo da good grapes come out.
How come ony get real sour kine grapes come out?
5 “Now, I goin tell you guys
Wat I goin do wit my grape field!
I goin take away da hedge from aroun um,
Fo da cows come inside an eat wat stay dea.
I goin broke down da wall aroun um
Fo odda guys go inside an bus um up.
6 I goin make um jalike da boonies wea no mo notting.
Nobody goin trim um, o hoe hana da weeds.
Plenny stickas an thorn bushes goin grow dea.
I goin tell da clouds
Fo no let um rain on top um.
Wat Isaiah Tell
7 “So, az da story bout dis peopo!
Da One In Charge, Da God Ova All Da Armies,
His grape field, dass da Israel peopo!
An da plantation dat make Da One In Charge feel good inside
Wit plenny love an aloha,
Dass da peopo from da Judah districk.
Da One In Charge wait fo peopo
Fo judge da right way,
But dey ony stay kill each odda!
He wait fo peopo fo do da right ting erytime,
But dey ony make each odda yell fo somebody help dem.”
God Da Judge Fo Da Judah Peopo
8 An God tell,
“Bummahs! fo you guys dat stay buy
All da house an field dat get no mo space awready,
You no leave even one place fo odda peopo live.
So you guys goin be da ony one
Fo live dea on top all dat land!
9 Da One In Charge, Da God Ova All Da Armies,
He talk fo me hear um:
‘Fo shua, goin get plenny big house ova dea,
But goin be kinda skery,
Cuz no mo nobody inside um.
Get nice big kine house
But no mo peopo live inside dem.
10 Ten acre grape field
Goin give ony six gallon wine.
An ten bag seed
Goin give ony one bag food.’
11 “Bummahs! to da guys
Dat get up early in da morning
Fo go all out fo da booze,
Dey stay up late nite time,
Till jalike dey stay on fire from da wine.
12 Dey make big party,
Dey get plenny small harp an bass harp,
Tammorine, flute, an wine dea.
But dey no tink notting bout Da One In Charge,
An da tings he do.
Wen he show da tings he make wit his hands,
Dey no see notting.
13 Dass why my peopo goin come prisonas
An go anodda land,
Cuz dey donno notting.
Dea importan peopo goin mahke
Cuz dey no mo food fo eat,
Da odda peopo goin mahke
Cuz dey no mo notting fo drink.
14 Dass why, jalike wea da mahke peopo go,
Da mout stay open big,
An waiting fo erybody.
Cuz down inside dea,
All da rich kine peopo goin go.
Same ting fo da odda kine peopo
Dat stay make big kine noise an go party out.
15 All dem goin lose face an come notting,
No matta dey big head an high nose.
16 But Da One In Charge, Da God Ova All Da Armies,
Cuz he stay judge da right way,
Peopo goin know how big him!
Him, da God dat stay good an spesho!
Peopo goin know how spesho he stay
Cuz he do da right ting erytime!
17 Dat time, da sheeps goin eat grass
Inside dea grass land.
Dey goin stay on top da land an eat plenny,
An da bebe sheeps goin eat
Wea da rich peopo wen live befo time,
But now, ony get bus up house all ova.
18 “Bummahs! fo da peopo dat drag
All da bad kine stuff dey stay do wit dem,
Jalike dey stay pulling heavy stuff wit one rope,
But da stuff dey stay pulling no worth notting!
Dey stay do bad tings,
Jalike dey stay drag one wagon wit one rope.”
19 Dat kine peopo tell, “We like God fo hurry up!
We like him make fas fo do his work,
Fo us guys see da ting
Dat da Good An Spesho God fo da Israel peopo
Make plan fo do.
We like see dat happen quick,
Den us guys goin know bout um.
20 “Bummahs! fo da guys dat tell
Dat da bad kine stuff stay good,
An da good kine stuff stay bad!
Dey tell, da dark stay light,
An da light stay dark!
Dey tell, da kine stuff dat taste bad, stay sweet,
An da sweet kine stuff taste bad!
21 “Bummahs! fo da guys dat tink dey know eryting erytime,
An tink dey smart fo undastan eryting.
22 “Bummahs! fo da guys dat erytime like drink wine,
An da real smart guys fo mix da booze.
23 Dat kine guys, wen somebody do wrong kine stuff,
Dey give da judge money
Fo make um look jalike dey stay do eryting right.
But fo da peopo dat stay do da right ting fo real kine,
Dey take away dea rights.
24 “Az why, wen dose peopo make lidat,
Dey goin come poho,
Jalike one plant wit da root all rotten,
An da wind blow away all da flowas jalike dus,
Jalike da fire burn up da junks from da wheat,
An da dry grass no mo wen stay burn.
Az cuz dey no take da Rules
Dat Da One In Charge, Da God Ova All Da Armies, teach um,
An dey ack jalike wateva Da One In Charge tell dem,
Stay no good!
No matta he da Good An Spesho God fo da Israel peopo,
25 Dass why Da One In Charge stay come huhu
Agains his peopo.
He put up his hand
An stay ready fo wack dem down.
Dass why da mountains stay shake,
An da peopo body dat mahke
Lay all ova outside jalike opala.
“But no matta God wack his peopo lidat,
He still yet stay huhu
An he stay ready fo wack um one mo time.
26 God goin put up one flag
Fo all da peopo inside da lands dat stay far see um.
He goin whistle fo dem fo come,
Fo dem come togedda fas from one real far place.
27 In dat army, nobody come tired
O trip an fall down.
Dey no need sleep late eva,
O pass out sleep cuz dey tired.
Dea belt stay tight aroun dea wais.
Da strap on dea slippa no broke.
28 Dea arrow, stay sharp,
An dea bows, ready fo shoot.
Da horses feet run real fas.
Da wheels on dea war wagons make big noise
Jalike da strong wind.
29 Da army guys make big noise jalike da wahine lion.
Dey grab eryting,
Jalike da lion make noise wen he grab one animal
An carry um away
An no mo nobody can bring dem back.
30 “Dat time, wen da army guys come dis land,
Dey goin make big noise
Jalike wen da ocean stay poun.
If anybody go look da land,
Dey goin see dat eryting stay dark
An erybody get big trouble.
Even da day time goin come dark cuz a da clouds.”