19
Wat God Tell Isaiah Bout Egypt
1 ✡19:1: Jer 46:2-26; Ezek 29:1–32:32Me, Isaiah, I get heavy kine stuff fo tell bout wat I see goin happen to da Egypt peopo:
Da One In Charge stay come Egypt side,
Jalike he stay ride on top one cloud.
Da idol kine gods da Egypt peopo pray to
Stay shake in front him.
Da Egypt peopo stay plenny sked
An no can tink good.
2 God tell: “I goin make da Egypt peopo go agains each odda.
One braddah goin fight his braddah.
One guy goin fight his frenz.
Da peopo inside one big town goin fight
Da peopo inside anodda big town.
One king guys goin fight anodda king guys.
3 Da peopo inside Egypt goin lose fight.
Dey make one plan, but I goin jam up da plan.
Dey goin go aks dea idol kine gods,
An da mahke peopo spirits.
Dey goin aks da kahuna guys an wahines wat fo do.
4 I goin turn ova da Egypt peopo
To one mean boss.
One strong king goin take charge a dem.”
Dat word come strait from Da One In Charge, Da Boss, Da God Ova All Da Armies!
5 Da Nile Riva watta no goin be enuff
Fo cova da Egypt land jalike one sea.
Da place wea da riva watta go goin stay all dry,
No mo wet place.
6 All da watta canal goin come haunas.
Da streams wea da Nile Riva split up goin come mo an mo dry.
An all da watta kine plants ova dea goin come rotten.
7 No goin get plants on da side a da Nile Riva
An wea da riva go inside da sea.
Da fields dey wen plant by da Nile Riva
Goin all come dry an blow away,
So no mo notting dea.
8 Da guys dat fish goin moan an get sad face.
All da guys dat try fo catch fish in da Nile Riva
Wit hook an net,
Dey goin stay sad.
9 Da guys dat make ready da flax plants
Fo make linen thread
An da guys dat weave da white cotton,
Dey goin stay bum out.
10 All da stuff dat stay da mos importan fo da Egypt land
Goin all come no good.
All da peopo dat work fo pay,
Dey feel real sore inside.
11 Fo shua, da leada guys fo Zoan town, Egypt side,
Dey stupid kine peopo wit attitude!
An da mos smart guys,
Dey suppose to tell da Pharaoh guy, dea king,
Wat fo do,
But dey ony tell um stupid kine stuff fo do.
So den! How you guys goin tell da Pharaoh guy,
“Oua ancesta guys,
Dey was smart guys dat know wat fo do erytime,
An dey was kings from befo time”?!
No way you guys can tell da Pharaoh guy dat!
12 So! Wea yoa smart guys stay now,
Da ones dat erytime know wat fo do?!
Let dem tell you wat Da One In Charge plan,
Wat Da One In Charge, Da God Ova All Da Armies,
Goin do agains Egypt.
13 Da leada guys fo Zoan town,
Dey go do stupid kine tings cuz dey no undastan.
Da leadas fo Memphis, az da main Egypt town, somebody wen bulai dem.
Da leadas fo da Egypt ohanas wen make dea peopo go da wrong way.
14 Da One In Charge, him da one wen make da Egypt peopo
So dey no can tink strait.
Cuz a Da One In Charge, da leada guys make dea peopo
Go da wrong way bout eryting dey stay do.
Da Egypt peopo, dey jalike one piloot guy
Dat stay fall all ova, even in his puke.
15 No ways da Egypt peopo goin know how fo work notting,
No matta dey rich o no mo notting,
O no matta dey importan o nobody know who dem.
16 Dat time, da Egypt peopo goin come jalike da wahines. Dey goin stay sked an shaking, wen dey see dat Da One In Charge, Da God Ova All Da Armies, put up his hand an shake um cuz he goin wack um. 17 Watevas come from da Judah land goin make da Egypt peopo real sked. Weneva somebody tell dem bout da Judah land, dey goin come real sked cuz a wat dey know, wat Da One In Charge, Da God Ova All Da Armies, stay plan fo do agains dem.
Bumbye God Goin Do Good Tings
Fo Da Egypt, Assyria, An Israel Peopos
Fo Da Egypt, Assyria, An Israel Peopos
18 Dat time, goin get five big Egypt town wea da peopo talk da Canaan language. Dey goin make one strong promise fo stay tight wit Da One In Charge. One a da towns goin get da name Sun Town.
19 An dat time, goin get one altar fo make sacrifice fo Da One In Charge inside da middo a da Egypt land, an one big stan up stone by da Egypt borda, fo no foget Da One In Charge. 20 Da altar an da stone goin be one sign fo show wat Da One In Charge A All Da Armies stay do inside da Egypt land. Wen God peopo yell to Da One In Charge fo help dem cuz odda peopo put plenny presha on top dem, he goin sen one guy fo get dem outa trouble, az somebody dat goin fight fo dem an get dem outa dea fas. 21 Da One In Charge goin let da Egypt peopo know who him. Wen dat happen, dey goin come tight wit him. Dey goin pray to him an bring animal sacrifices an wheat an barley sacrifices to him. Dey goin make strong promises to him, an dey goin do wat dey wen promise fo do. 22 He goin punish da Egypt peopo wit one bad kine sick, but den he goin make um come good. Cuz dey goin change dea mind an come tight wit Da One In Charge, an he goin lissen wen dey pray to him, an make um come good.
23 Dat time, goin get one big road go from Egypt to Assyria. Da Assyria peopo goin go Egypt side, an da Egypt peopo goin go Assyria side. An dey goin work togedda fo Da One In Charge.
24 Dat time da Israel peopo goin make one deal wit da Assyria peopo an da Egypt peopo, da three a dem togedda. Cuz dey come togedda, real good stuff goin happen fo all da peopo in da world. 25 Cuz Da One In Charge, Da God Ova All Da Armies, he goin do good stuff fo all a dem. He goin tell, “I goin make good stuff happen to my peopo, da Egypt peopo, an to da Assyria peopo dat I wen make, an to da Israel peopo dat goin be mines foeva!”