38
Hezekiah Come Sick
Dat time Hezekiah come sick an litto mo mahke. Da guy dat talk fo God, Isaiah, Amoz boy, go by Hezekiah an tell, “Lissen up! Dis one spesho message from Da One In Charge. He tell, go make eryting ready cuz you goin mahke. You no goin come good.”
Hezekiah turn his whole body fo face da wall, an he pray to Da One In Charge, “Bummahs! You Da One In Charge! Try no foget all da stuff I wen do! I no hide um from you. I da kine guy you can trus, an do eryting I promise fo do. I try fo make shua I do ony good kine stuff dat you tell az good.” Den Hezekiah cry plenny.
Da One In Charge give Isaiah dis message: “Go tell Hezekiah, ‘Dis one spesho message from Da One In Charge, da God fo yoa ancesta David: I wen hear wat you wen pray an I see you cry. Cuz a dat, I goin give you fifteen mo year fo live. I no goin let da Assyria king do notting bad to you o to da peopo inside Jerusalem town. I no goin let da Assyria guys come inside dis town.’ ”
Isaiah tell da guys dat work fo Hezekiah, “Go get some figs, mash um all togedda, an put um on top da sore fo yoa boss come good.”
Hezekiah, he tell, “Wat da sign goin be, fo me know dat I goin go up inside da Temple Fo Da One In Charge one mo time?”
Isaiah tell, “Dis da sign from Da One In Charge fo show you dat he goin do wat he promise fo do. Da One In Charge tell, ‘Da shadow from da sun go down ten step awready, on top da palace stair dat King Ahaz wen build. Now, I goin make da sun shadow go back up da same ten step.’ ” So az wat wen happen. Da sun shadow go back up da same ten step, wea come down awready.
Afta Hezekiah, da Judah king, come good afta he sick, he write dis:
10 Me, dis how I wen figga:
“Dis da bestes time a my life,
An now I gotta go inside da gate
Fo da Mahke Peopo Place, o wat?!
Az fo real, o wat, dat God set me up
Fo take away da life I get fo live ova hea?!”
11 I tell, “In dis land, wit da peopo dat stay alive,
I no goin see Da One In Charge no moa.
I no goin see peopo no moa,
O stay wit da ones dat live
Inside dis world.
12 God take my body away from me
Jalike one sheep guy broke down his tent.
I stay roll up my whole life,
Jalike one guy dat stay weave someting,
Wen he pau, he roll um up,
An jalike God cut me off da frame fo weave.
God, morning time I stay okay,
But befo nite time you make my life pau.
13 I wait an try stay quiet inside
Till morning time.
But den, God go broke all my bones
Jalike one lion!
God, morning time I stay okay,
But befo nite time, you make my life pau.
14 I make noise jalike da swallow bird o da heron bird.
An make sad kine noise jalike one dove.
I try fo look up to you in da sky,
But my eyes too tired, I can ony look down.
I get plenny presha!
Help fo take kea me, my Boss!
 
15 “But wat I goin tell?
Cuz God wen make one promise to me,
An he da One wen do
Wat he tell he goin do.
I goin watch out plenny how I live
All da years I still get fo live,
Cuz befo time, I wen stay plenny bum out inside.
 
16 “Boss, peopo stay live
Cuz you do da same kine tings fo dem
Dat you wen do fo me!
An all da tings you stay do
Make me come alive inside too!
I stay alive now.
Make my body come good,
An let me live some moa!
17 Fo shua, if I neva suffa plenny,
Notting come good fo me afta.
You get plenny love an aloha fo me.
Az why you neva let me go
Inside da Deep Dark Hole, an mahke.
You wen take all da bad kine stuff I wen do,
An put um behind yoa back.
18 From inside da Mahke Peopo Place,
No mo nobody can tell dey know how awesome you
Da mahke peopo no can tell dat you da greates.
Da peopo dat go down inside da Deep Dark Hole,
Dey no wait fo you do wat you tell you goin do.
19 Da peopo dat stay alive,
Dey da ones tell dey know how awesome you,
Jalike I stay do today.
Da faddahs make shua dea kids know
How you do wat you tell you goin do.
 
20 “Da One In Charge goin get me outa trouble.
An us goin play harp kine music
An sing my songs,
Inside da Temple Fo Da One In Charge,
All da time us still yet stay alive.”
21 Az how wen happen, da time Isaiah tell Hezekiah guys fo put fig on top da sore, 22 an Hezekiah aks wat kine sign Da One In Charge goin give him dat he goin come good.