37
God Goin Get Da Jerusalem Peopo
Outa Trouble
Outa Trouble
1 Wen King Hezekiah hear wat da Assyria guy tell dem, he come real sore inside. He rip his clotheses an put on burmbag kine cloth fo show how he feel. Den he go inside da Temple. 2 He tell Eliakim, da guy dat stay in charge a da palace, Shebna, da secretary guy, an da older pries guys fo put on burmbag cloth an go by Isaiah, Amoz boy, da one dat talk fo God. 3 Dey tell Isaiah, “Dis wat King Hezekiah tell: ‘Dis one day all us feel all bum out. God stay show dat us guys wen do wrong, an cuz a dat us come shame. Us stay jalike wen one bebe goin born, but da muddah not strong enuff fo born um. 4 Maybe yoa God, Da One In Charge, wen hear wat da territorial govna guy tell, an goin do someting. Cuz da govna guy boss, da Assyria king, wen sen da govna ova hea fo make fun a Da One In Charge, da God dat stay alive fo real kine. Da tings dat yoa God, Da One In Charge, wen hear dat guy tell, maybe God goin punish him fo dat. Az why you gotta pray fo da peopo dat still yet goin stay alive afta da Assyria guys do wateva dey goin do.’ ”
5 Afta King Hezekiah helpa guys come by Isaiah, 6 Isaiah tell dem, “Go tell yoa boss dis, da ting Da One In Charge tell me awready: ‘No sked cuz a all wat you wen hear, all dat real bad kine stuff da slave guys fo da Assyria king stay tell. 7 Dis wat I goin do: I goin put one spirit inside da Assyria king fo make um tink how I like um fo tink. He goin hear wat somebody tell him, an cuz a dat, he goin go back his country. Den bumbye, I goin make somebody kill um wit one sword, inside his land.’ ”
8 Den da Assyria territorial govna guy hear dat da Assyria king an his army wen leave Lakish town. So da govna guy go back an find da king stay fighting agains Libnah town.
9 Laytas, Sennakerib, da Assyria king, hear someting bout Tirhakah, da king from Sudan. Somebody tell Sennakerib, “Tirhakah come out fo fight you Assyria guys.”
Wen Sennakerib hear dat, he sen messenja guys by Hezekiah. He tell dem 10 fo tell Hezekiah da Judah king dis:
“I know you stay trus yoa god, so you figga, ‘My God no goin let da Assyria king take ova Jerusalem town.’ But no let yoa god bulai you! 11 Tink bout dis: You awready wen hear wat us king guys Assyria side an oua army guys wen do to all da odda countries. We wen wipe um all out fo give dea land to oua god. So, you tink you goin get outa dat?! No way! 12 Da gods fo da peopos from Gozan, Haran, Rezef, an da Eden peopo inside Tel Assar—you tink dea gods wen get da peopos outa trouble, da time my ancesta guys wipe dem out? Not even! 13 Now, wea da kings fo Hamath, Arpad, Sefarvaim town, Hena, Iva?! Dey all gone!”
King Hezekiah Pray
14 Afta Hezekiah read da letta da messenja guys bring, he go up to da Temple Fo Da One In Charge. He spread out da letta in front Da One In Charge. 15 Den Hezekiah pray to Da One In Charge: 16 ✡37:16: Outa 25:22“Eh! You, Da One In Charge! You, da God Ova All Da Armies. You da God fo us Israel peopo. You get yoa spesho place right hea inside dis Temple, inside da spesho room wit da awesome angel watcha guys on top da Box. You da ony One dass God fo real kine, cuz you da God ova all da kings an dea peopos all ova da world. Was you, da One dat wen make da sky an da earth. 17 Lissen real good, Da One In Charge! Open yoa eyes an look! Hear all da stuff Sennakerib wen tell fo talk bad bout you, da God Dat Stay Alive Fo Real Kine!
18 “You, Da One In Charge! An az true dat da Assyria king guys wen go wase all da diffren countries an dea land, 19 an throw all da idol kine gods da peopo wen make inside da fire an wipe um out. Cuz dose idols, dey not real gods, but ony wood an stone statue. 20 Now, oua God, dass Da One In Charge a us, get us outa trouble an no let da Assyria king hurt us. Den all da kings an dea peopos all ova da world goin know dat you Da One In Charge, da ony God dass fo real!”
Sennakerib Come Wipe Out
21 Den Isaiah, Amoz boy, sen dis letta to Hezekiah: “Dis da ting Da One In Charge, da God fo da Israel peopo, tell me: Cuz you wen pray to me bout Sennakerib, da Assyria king, 22 dis wat I tell agains Sennakerib:
“ ‘My peopo inside Jerusalem town
Dey jalike one young wahine
Dat tink you no good, an dey laugh at you.
Jalike one wahine dat shake her head an look
Wen you stay run away!
23 “ ‘Who you wen make shame, Sennakerib?!
Who you talk bad bout, aah?!
You wen go talk strong agains me!
You tink you mo betta den me,
Da Good An Spesho God fo da Israel peopo!
24 You wen sen guys dat work fo you,
Dat wen try make me, da Boss, shame.
You wen tell, “Me, Sennakerib,
I get plenny war wagon!
I can go on top a da high mountains,
To da mos far part a da Lebanon mountains,
Fo cut down da mos tall cedar trees
An da bestes pine trees!
Me, I da kine guy can go all da way to da end
A da mos high places,
Da fores wea da bestes tree grow!
25 Me, Sennakerib, I dig pukas fo watta inside odda peopo countries.
An drink da watta from ova dea.
Wen I go thru da streams
Wea da Nile Riva split up, Egypt makai side,
I make um all come dry!”
26 “ ‘Eh Sennakerib, you neva hear, o wat?
From long time me, Da One In Charge, wen start fo make all dis happen,
Befo time, I wen make da plan dat way awready,
An now I stay make um happen—
Fo you bus up da towns dat get strong wall
An make um come uku pile a rocks,
27 An fo you make da peopo dat live dose towns
Get ony litto bit powa.
Dey lose fight an come shame.
Dey come jalike da plants dat grow inside one field,
Da young green grass
O da grass dat grow on top da roof
O on top wea you plow fo plant da wheat,
Wea da sun burn um befo can grow.
28 “ ‘But I know wea you stay, Sennakerib.
I know wen you come an wen you go.
I know how you yell
An stay real mad agains me!
29 Cuz you stay mad agains me,
An I hear how big head you get
Cuz you tink you mo betta den me,
Me, Da One In Charge, goin make you my prisona
Fo do wateva I like you fo do,
Jalike I put one hook inside yoa nose,
An one bit inside yoa mout, jalike you one horse.
An I goin make you go back yoa place
On top da same road wea you wen come from.’ ”
30 Den Isaiah tell Hezekiah dis:
“An fo you, dis da sign Me, Da One In Charge, give you:
You goin eat!
Dis year, eat da wheat dat grow dea awready
From da wheat seed dat fall down las year wen dey harves da food.
Da year numba two, eat wateva come up from dat.
But da year numba three, plant seed an harves um fo food.
Plant grape fo make grape farm, an eat da grapes.
31 One mo time, goin get some a da Judah peopo
Dat da Assyria guys wen leave dea.
Dey goin be jalike one plant
Dat da root go down an da fruit come up.
32 Cuz da res a da peopo from Jerusalem goin come.
Goin get peopo dat da Assyria guys leave behind wea da Temple stay.
Da One In Charge, Da God Ova All Da Armies,
He goin do um, cuz az wat he fo real kine like do.
33 “Az why dis wat Da One In Charge tell bout da Assyria king:
No way he goin come inside Jerusalem town.
His guys no goin shoot arrow ova hea.
Dey no goin get dea shield fo fight oua army guys,
O pile up dirt by da wall
Fo dea army guys run ova da top.
34 Da same way he wen come,
Dass da way he goin go back.
He no goin come inside dis big town.
35 I goin do all dat fo me,
An fo da promise I wen make to King David, my worka guy.
I goin get da peopo hea outa trouble!”
Sennakerib Go Way, Den He Mahke
36 Den one angel messenja guy from Da One In Charge go out fo fight. He kill 185,000 army guys inside da Assyria camp. Wen da odda peopo ova dea get up early da nex morning, get plenny mahke bodies all ova da place! 37 Az why Sennakerib, da Assyria king, get outa dea fas an go way. He go back Nineveh town an stay ova dea.
38 Laytas, one time wen Sennakerib go down fo pray inside da temple fo his god Nisrok inside Nineveh, his boys Adramalek an Sharezer take dea sword an kill him. Den dey run away to da Ararat land. Esarhaddon, Sennakerib odda boy, come da nex king fo da Assyria peopo.