1 Da One In Charge tell Moses dis: 2 “Go tell da Israel peopo fo bring me someting dey like give an bring um to me. You guys take wat dey give. 3 Dis da kine presents you guys goin let dem give you: gold, an silva, an bronze. 4 Wool string, blue an purple an dark red. Egypt kine linen cloth. Hair from da goats fo make cloth. 5 Red ledda from da sheeps dat somebody wen dye. Skins from dolphins. Koa kine wood. 6 Olive oil fo da lamps. Stuff dat smell nice fo mix wit da olive oil fo put on top da prieses head fo show God wen pick dem, an fo make da incense smell nice. 7 Blue lapis lazuli stones an odda stones fo put togedda fo make jewelry, fo da ves da Main Pries Guy wear, an fo his ches piece in front. 8 Den I like da peopo make me one spesho place fo live, fo me stay wit dem. 9 I goin show you da plan fo my Tent an fo all da stuff inside da Tent, den you guys goin make um all jalike I stay show you.

10 “Tell um fo make one box outa koa wood, three feet nine inch long, two feet three inch wide, two feet three inch high. 11 All ova da outside a da box, an all ova da inside, tell um fo put pure gold. Den put pure gold molding aroun da top. 12 Melt gold metal fo make four rings. Put um togedda wit da four feets, two rings one side an two rings da odda side. 13 Make two poles outa koa wood an cova dem wit gold. 14 Put da poles inside da rings on top da two sides a da box fo carry um. 15 Da poles gotta stay inside da rings, no take um out. 16 Den put inside da box, da ting I goin give you fo make shua you no foget da Deal I stay make wit you.

17 ✡25:17: Heb 9:5“Make one cova fo da box outa pure gold, three feet nine inch long an two feet three inch wide. Dass da place I goin hemo da shame fo all da bad tings da peopo do fo make um come pono wit me. 18 Make two statues dat look jalike awesome angel watcha guys wit wings. Make um outa gold dat you work wit da hamma from da back side. One a dem go on top one side a da cova, an da odda go on top da odda side a da cova. 19 Da two angel watcha kine statues on da two sides, an da cova, put um all togedda fo come one piece. 20 Da statues dat look jalike awesome angel watcha guys wit wings, make dem jalike dey stay look at each odda ova da cova from da two sides. Make da statues wit da wings spread ova da cova fo hide da cova. Cuz dass da place wea I goin hemo da shame fo all da bad kine stuff da peopo do fo make um come pono wit me. 21 Den take da flat stones I goin give you fo make you no foget da Deal I stay making wit you guys, an put um inside da Box. Den put da cova on top da Box. Dass da place wea I goin hemo da shame fo all da bad tings da peopo do fo make um come pono wit me. 22 Az da place wea I goin meet wit you guys. I goin talk wit you from da spesho place wea I goin hemo da shame fo da bad tings da peopo do, fo make um come pono wit me, right dea in da middo a da two statues dat look jalike da awesome angel watcha guys, dat stan ova da Box Fo No Foget My Deal. From dat place, I goin tell you eryting da Israel peopo gotta do.

23 “Make one table from koa wood, three feet long, one an a half feet wide, an two feet three inch high. 24 Put pure gold all ova da table, an put gold molding all aroun da top. 25 Put three inch edge all aroun da top fo notting fall off da table, wit gold molding all aroun da edge. 26 Make four gold ring fo da table, an put da rings on top da four cornas wea da four table legs stay. 27 Da rings go nea da edge dat stay aroun da top, fo take da poles fo carry da table. 28 Make da poles outa koa wood fo carry da table, an put gold all ova dem. 29 Make da dishes an pans an cups an bowls outa pure gold fo go wit da table fo pour da kine wine offerings you pour out. 30 ✡25:30: Pries 24:5-8Put da twelve spesho breads on top da table, da ones dat show I stay wit yoa twelve ohanas. Ery day you gotta put new kine breads in front me, foeva.

31 “Make one stan fo put da lamps on top, wit gold. Put all da pieces togedda fo make um come one piece pure gold, an use one hamma fo shape um. Make da bottom wit da main piece dat go strait up, an da side pieces too, wit cup dat look jalike da bud a one flowa. 32 From da middo part, six tings goin stick out jalike one tree branch. Three branch goin come out one side, an three branch on da odda side. 33 Three small cup on top dat look jalike da almond flowa, wit da bud part an da flowa, stay on one branch, three on da odda one, an same fo da res a da odda branch too. 34 Da main piece in da middo a da lamp stan, dat one get four small cup on top, jalike da almond flowa, wit da bud part an da flowa. 35 Da three place wea da two side branch come outa da lamp stan, put one almond flowa bud part in da middo a da two branch, an anodda one on da nex two branch, an same fo da las two branch. 36 Da main piece, an da side pieces, an da almond flowas, all gotta be one piece pure gold, an you shape um wit da hamma. 37 Den make seven olive oil lamp fo go on top da lamp stan. Set um up fo da light come in front um. 38 Da pans fo carry da fire an da covas fo pio da light, make dem outa pure gold too. 39 Fo make da lamp stan an all da odda tings, use 75 poun pure gold.

40 ✡25:40: JGuys 7:44; Heb 8:5“Make shua you make eryting jalike da plan I stay show you hea on top dis mountain!”