50
Da One In Charge Come
Fo Rescue His Peopo
Fo Rescue His Peopo
1 Dis one spesho message from Da One In Charge:
“You guys tink yoa muddah get one divorce paypa
Dat I wen make
Fo tell dat I wen dump her an sen her away, o wat?!
No mo da kine paypa cuz I neva do dat!
You tink I owe somebody money
An I sell you guys to dem fo pay dem,
An az why now you dea slave?!
I neva do dat too!
Fo shua, I wen sell you guys,
But ony cuz you wen do bad kine stuff!
I wen sen away you guys muddah
But ony cuz you guys go agains me!
2 Wen I wen come fo help you guys, how come no mo nobody stay hea?
Wen I wen call, how come nobody ansa me?
You tink I no mo powa
Fo get you guys outa trouble, o wat?
Tink bout dis: I ony need fo tell da watta,
‘Go! No stay!’
An I make da ocean watta come dry,
An I can make da rivas come one desert.
Dea fish mahke,
An come haunas cuz no mo watta.
3 I make da whole sky come dark
Jalike I stay put burmbag kine cloth all ova da sky,
Fo show da sky stay sad inside.”
Da Worka Guy Do
Wat Da One In Charge Tell Um Fo Do
Wat Da One In Charge Tell Um Fo Do
4 Da One In Charge a me,
He make me know how fo talk fo him.
He make me know wat fo tell da tired guys
Fo dem come strong.
He wake me up ery day morning time
An make me lissen him real good,
Jalike da peopo dat study plenny.
5 Da One In Charge a me open my ear fo me lissen good.
Me, I no go agains him,
An I no turn aroun an go da wrong way.
6 ✡ 50:6: Matt 26:67; Mark 14:65Get guys dat wen wack my back wit whips,
An I let um wack me.
Get guys dat wen pull out my beard,
An I let um.
I no hide from da guys dat like make me come shame
An spit on my face.
7 Da One In Charge a me,
He da One help me.
Dass how come I no come shame
Cuz a wat dey do.
Dass why I stick wit wat I goin do,
An I no goin change my mind.
I stay shua dat I no goin come shame.
8 ✡ 50:8: Rome 8:33-34Da One dat goin show peopo dat I stay right,
He stay nea me.
Whoeva like poin finga me,
I like fo him an me stan togedda in front da judge!
Let him come in front me fo him tell me!
9 Fo shua, Da One In Charge a me, he help me.
Cuz a dat, wat guy can show me
Dat I wen do someting bad
An I need fo you punish me?! No mo nobody!
All dem guys dat stay agains me,
Dey had it, jalike da boros clotheses.
Da moth eat um up.
10 If one a you guys feel sked
Wen he go in front Da One In Charge,
An he lissen wat I tell,
Cuz I da guy dat work fo Da One In Charge,
Den, wen dat kine guy walk inside one dark kine place
Wea no mo light,
He goin trus Da One In Charge,
Cuz he know wat kine god him,
An he goin let his God take kea him.
11 But, all you odda guys dat make fire
An put arrows dat burn inside yoa arrow bag,
Go walk in da light from da fire you guys wen make
An da burning arrows you wen light.
Da ony ting you guys goin get from me,
Goin be dis: Bumbye wen you guys lay down,
You goin suffa plenny!