God Tell Da Peopo Dat Need Help
Fo Come
(Jesus Guys 13:34)
55:1: JShow 21:6; 22:17Da One In Charge tell:
“Hui! All you peopo dat need help, come!
I tell da peopo dat stay thirsty,
Fo go come by me an I give you watta!
No matta you guys no can pay,
Go come get wheat fo you eat!
Go come get wine an milk!
No matta you no can pay,
No goin cost you notting!
How come you guys stay pay wit silva
Fo stuff dat you no can eat?
How come you guys stay work
Fo stuff dat no goin fill you up?
You guys gotta lissen me!
Eat good kine stuff.
Den you goin stay real good inside
Cuz you stay eat all da good kine food!
55:3: JGuys 13:34Go come by me, an lissen real good!
Lissen, fo you guys come alive inside.
I goin make one deal wit you guys
Dat goin stay foeva:
Da tings I wen promise King David dat I goin do
Wen I tell I goin stay tight wit him foeva,
I goin do all dat fo shua,
Cuz I do wat I promise fo do!
Look! Da one I wen make da promise bout,
I let him tell all da diffren peopos wat I stay do,
An be dea leada guy, an give dem my Rules.
An den, I tell dat guy,
‘You goin tell da nations fo come,
Dat you donno befoa.
An da peopo in da odda countries
Dat donno you,
Dey goin run to you.
Az cuz me Da One In Charge, yoa God,
Da Good An Spesho One fo da Israel peopo,
Da One make you come awesome.’ ”
Go all out fo know Da One In Charge
Right now, wen he let you guys meet him.
Call him fo help you
Now, wen he stay nea.
Fo da bad kine peopo,
Da ones dat stay make trouble,
Az good dey bag from da stuff
Dey do befo time,
An no tink bad kine stuff no moa.
Mo betta dey turn back to Da One In Charge,
Cuz he goin show pity fo dem.
Wen dey turn back to oua God,
He goin do plenny fo let dem go
Fo wat dey wen do befo time,
An hemo dea shame.
Da One In Charge tell dis:
“Da way I tink, az not da way you guys tink.
Da way I do stuff, az not da way you guys do stuff.
Jalike da sky stay mo high den da earth,
Same ting, da way I do stuff, stay mo high
Den da way you guys do stuff.
An da way I tink, I tink mo betta
Den da way you guys tink.
10  55:10: 2Cor 9:10Da rain an da snow come down from da sky,
An befo dey go back up dea
Dey give all da watta da groun need
Fo make da plants come up.
Dass how da groun make seed
Fo da farma guys plant bumbye,
An get food fo da peopo eat.
11 Dass jalike da tings I tell!
Wen da words go out from my mout,
Fo shua, I know
Az not wase time!
Da tings I tell, goin do wat I like um fo do,
An make happen
Wat I sen um fo make happen.”
12 Bumbye, wen you guys leave fo come back ova hea,
You guys goin dance an sing.
God goin lead you guys out,
An eryting goin come good fo you.
Jalike da mountains an hills
Goin sing loud in front you guys,
An all da trees in da fields goin clap dea hands.
13 Goin get pine tree
Wea befo time get ony thorn bush,
An flowa bush,
Wea befo time get ony thistle.
Dass how all dis goin happen,
Fo erybody know wat kine god Da One In Charge.
Goin stay lidat foeva,
Jalike one sign dat nobody goin bus up eva.

55:1 55:1: JShow 21:6; 22:17

55:3 55:3: JGuys 13:34

55:10 55:10: 2Cor 9:10