2
Da Israel Peopo Go Way From God
Get one message come from Da One In Charge fo me:
“Go tell dis
Fo all da peopo inside Jerusalem hear you.
Da One In Charge tell, ‘I no foget how you guys was, young time.
You guys was real tight wit me,
Jalike one bride dat get plenny love an aloha fo da guy she marry.
You guys wen stay tight wit me all da way thru da boonies,
Even da places wea no can plant seeds notting.
Dat time, you Israel peopo wen stay spesho fo me, Da One In Charge,
Jalike you guys was da firs food from da harves
Dat peopo give to me.
Anybody eat up dat food an no give um to me,
Dey goin get blame fo dat.
An all da bad kine stuff goin come on top dem.’ ”
Dass da message from Da One In Charge.
Lissen wat Da One In Charge tell, you Jacob peopo, all da ohanas inside da Israel house. Lissen wat he tell,
“How come yoa ancesta guys tell ‘Laytas!’ to me?!
Wot?! Dey tink I wen do someting wrong, o wat?!
Dey wen pray to da idol kine gods dat good fo notting.
Az how come yoa ancesta guys come good fo notting too.
Dey neva even tink fo aks, ‘Wea Da One In Charge stay,
Da One dat wen bring us guys hea outa Egypt?
He da One wen bring us guys thru da boonies
Wea up country eryting dry,
An get plenny gulch wea no mo watta,
An get real dark kine place wea can mahke.
Wea no mo nobody go thru dea,
An no mo nobody live ova dea.’
 
“But den, I wen bring you guys inside one land
Wea fruit grow good,
An you can eat odda stuff dat grow dea too.
But wen you guys come hea,
You make my land come all pilau.
You guys make da property I give you
Come one junk kine place.
Da pries guys neva aks,
‘Wea Da One In Charge stay?’
Da guys dat suppose to know da Rules fo shua,
Dey donno me fo real kine.
Da guys dat suppose to take kea da peopo,
Dey like beef wit me.
Da guys dat suppose to talk fo me,
Dey talk fo da god Baal.
Dey stay tight wit da idol kine gods
Dass good fo notting.”
 
“Az why I poin finga you guys one mo time.
An I goin do dis agains yoa kids an grankids too.”
Dass da message from Da One In Charge.
 
10 “Go take da boat da west side Cyprus Islan
An da odda islans ova dea fo look how da peopo ack.
Sen peopo east side by da Arab peopo an scope um out,
Fo see if someting stay happen ova dea, jalike wat stay happen ova hea.
11 All dose peopos, dey neva dump dea gods dat dey get from befo time.
No matta da gods dey get, dey not gods fo real.
But my peopo, dey wen bag from me,
Da God dat make dem come awesome,
Fo go pray to idol kine gods dat good fo notting!
 
12 “All you peopo dat live inside da sky,
You goin come real bum out!
You goin shake cuz you real sked,
Jalike you no can do notting!”
Dass da message from Da One In Charge.
13 “My peopo wen do two real bad tings:
Numba one, dey wen bag from me,
No matta I jalike one watta spring
Wea da watta come out all da time
An make peopo come alive.
Numba two, dey go wit odda gods, dass good fo notting.
Jalike dey dig big holes fo hold watta,
But no can hold da watta!
14 You tink da Israel peopo wen born fo come slaves? No ways!
So how come dey wen come prisonas, aah?!
15 Da ones dat stay agains da Israel peopo,
Dey make big noise wen dey go afta dem,
Jalike da lion make noise wen he start fo hunt.
Da ones dat stay agains da Israel peopo wase da land.
Dey make dea towns come one junk pile,
An no mo nobody live dea no moa.
16 Da peopo come from Memphis an Tahpanhes town Egypt side,
Dey slap yoa head.
17 You guys do all dis to you,
Cuz you guys wen bag
From yoa God, Da One In Charge,
Da time he show you guys da way fo go.
18 So now, how come you guys like get yoa powa from Egypt?
You guys like drink watta from da Nile Riva, o wat?!
An now, how come you guys like get yoa powa from Assyria?
You like drink watta from da Eufrates Riva, o wat?!
19 Da bad kine stuff you guys do,
Dass wat goin punish you guys.
Da way you guys make deaf ear to me,
Dat show proof awready dat you guys stay wrong.
Try tink hard, an you goin know
Dat eryting come real bad fo you guys,
Jalike you haunas!
Az cuz you guys bag from me, yoa God, Da One In Charge,
An no show respeck fo me.”
Dass da message from Da One In Charge, da God Ova All Da Armies.
 
20 “Long time befo time you guys wen no do wat I tell you fo do,
Jalike one cow dat broke off da yoke fo pull da wagon,
An broke da ropes dat tie um.
You guys wen tell, ‘Us no goin work fo you!’
Fo shua, unda da trees wit plenny leaf on top ery big hill,
You guys ack jalike da wahines
Dat make sex dea fo get money.
21 I wen make you guys come strong an solid,
Jalike I plant you guys fo come da bestes kine grape plant,
Da kine you stay shua goin make odda good plants erytime.
So how come you guys wen bag from me,
An come jalike one junk kine wild grape plant?
 
22 “No matta you guys wash yoa pilau clotheses wit stuff fo make um clean,
An use plenny soap,
Still yet, I see you guys get da blame,
Jalike you get one bad kine stain.”
Dass da message from Da One In Charge, da Boss.
 
23 “How come you guys tell, ‘Us guys not pilau!
We no go pray to da Baal kine gods!’?
Try tink how you guys wen ack inside da valley
Wea peopo make sacrifice to da odda gods.
Try tink wat you guys do ova dea.
You guys jalike one wahine camel dat hard up fo find one boy kine camel.
You guys run hea an dea.
24 O you guys jalike one wahine kine wild donkey
Dat know how fo live inside da boonies.
She smell da wind, cuz time fo go look fo one boy kine donkey.
She stay hard up,
An no mo nobody can stop her.
If da boy kine donkeys like go afta her,
Dey no need run fas an come tired.
Easy fo dem find her cuz she ready.
25 Same ting, you Israel peopo,
No need run till yoa slippas broke,
An yoa throat come dry.
But you guys tell,
‘No try bring us back from how we stay!
Us love da gods from da odda peopos!
Us gotta stay tight wit dem!’
 
26 “Jalike one steala guy come shame wen da security guys catch um,
Az how da Israel ohana come shame—
Dem, dea king guys, an dea leadas,
Dea pries guys, an dea guys dat suppose to talk fo God.
27 Dey tell one wood idol, ‘You my faddah!’
Dey tell one stone idol, ‘You wen born me!’
Dey make deaf ear to me,
An no lissen.
But wen dey get trouble,
Dey tell me, ‘Help us get outa trouble!’
28 So, now! Wea da gods stay,
Dat you guys wen make fo you?!
Let um come, if dey can get you guys outa trouble.
Cuz you Judah guys get plenny gods, aah?
Jalike you get one god fo ery town!”
 
29 Da One In Charge tell, “How come you guys poin finga me?
All you guys go agains me.
30 I wen punish you guys kids, but ony wase time!
Dey no come sorry bumbye.
You guys wen kill yoa guys dat talk fo me,
Jalike you one hungry lion an wipe dem out.”
 
31 You peopo dat live nowdays,
Tink bout wat I tell!
Dis me, Da One In Charge!
You Israel guys tink I jalike da empty boonies fo you,
O I jalike one land wea eryting stay real dark, o wat?
How come my peopo tell,
“We goin go wea eva we like go!
No way we goin go back by you no moa!”?
32 You guys tink one young wahine goin foget her jewelry?
You tink one bride goin foget her wedding clotheses?
But still yet my peopo foget me
Ova an ova.
33 You guys know fo shua how fo make da odda gods love you!
You can even teach hoaz da way fo do da mos baddes kine tings!
34 You guys kill da guys dat need help,
An peopo see dea blood
On top you guy clotheses!
An da ones you kill, dey neva do notting wrong.
You guys neva even catch dem
Stay broking inside yoa house.
35 But you guys tell,
“Me, fo shua I neva do notting wrong.
God no stay huhu wit me now.”
But me, God, I da One goin poin finga you guys,
Cuz you tell, “I neva do notting wrong.”
36 How come you guys go dis place an dat place all da time,
An no make up yoa mind who you like stay tight wit?
Da Egypt peopo goin bum you out,
Jalike da Assyria guys wen bum you out befo time too.
37 Wea eva you guys go fo make one deal
Fo dem help you,
You goin go way from dea
Wit yoa hands on top yoa head,
Cuz dey make you come dea prisonas!
Az cuz da peopos dat you guys trus,
Dey no good.
Me, Da One In Charge, an I tell you dat awready!
You guys stay tight wit dem,
Az why notting goin come good fo you guys.