8
Da Bones From Da Judah Peopo
1 Dis one message from Da One In Charge: “Dat time, da peopo dat stay agains you guys goin dig up da bones from da graves fo all da Judah king guys an da leada guys, an da pries guys, da guys dat talk fo me, an da peopo dat wen live Jerusalem town. 2 Dey goin put da bones on top da groun so da sun, da moon, an all da stars inside da sky goin shine on top um cuz da sky kine gods, az da ones da Jerusalem peopo get love an aloha fo an work fo. Dey follow da sky kine gods, an dey aks um wat fo do, an dey go down in front um fo show um respeck. No mo nobody goin pick up da bones fo bury um. Dey goin stay on top da groun jalike dey rubbish. 3 Da peopo dat stay alive still yet, from dis real bad kine nation, wea eva I make dem go, dey all goin like mahke mo den dey like live!” Az da message from me, Da One In Charge, da God Ova All Da Armies.
Peopo Do Bad Kine Stuff, I Punish Dem
4 Tell da peopo, dis wat me, Da One In Charge, tell:
“Weneva somebody fall down,
Dey goin stan up one mo time, aah?
Weneva somebody go da wrong road,
Dey goin come back an go da right road, aah?
5 So! How come dese peopo stay go da wrong road?
How come da Jerusalem peopo erytime no come back by me?
Dey stay tight wit bulaia kine gods.
Da Jerusalem peopo tell, ‘Us guys no goin go back!’
6 I lissen real good,
But wat dey tell, not right.
No mo nobody stay sorry fo da bad kine stuff dey wen do.
Dey tell, ‘Wat I wen do, I neva do notting wrong!’
Dey all go da way dey like,
Dey jalike one army horse running fas fo fight.
7 Even da stork bird
Know wen az time fo fly away.
An da dove, an da small swallow, an da heron bird,
Dey all know wen az time fo go away.
But my peopo donno wat stay right fo do
No matta Me, Da One In Charge tell um wat dey gotta do.”
8 Da One In Charge tell:
“How come you guys tell, ‘Us smart!
Us guys know wat fo do erytime,
Cuz we get da Rules from Da One In Charge!’ ”?
But you know wat?!
Da guys dat teach my Rules,
Dey use wat dey write fo bulai you guys!
9 Dese peopo dat tink dey know wat fo do erytime,
Dey goin come shame.
Dey goin come sked
Jalike dey fall down inside one trap.
Az cuz dey tell “Laytas” to wat Da One In Charge tell.
So den, how come you guys tink
Dey mo smart fo real? Dey know wat fo do erytime, o wat?!
10 “Az why I goin give dea wifes to odda guys.
An I goin give dea fields to odda guys dat like take ova um.
From da mos importan guy to da mos small guy,
All dem greedy fo get eryting fo ony dem.
Even da guys dat suppose to talk fo me
An da pries guys, dey all same same.
All dem bulai.
11 ✡ 8:11: Ezek 13:10Da peopo I get love an aloha fo
Jalike dey stay all bus up!
But da guys dat suppose to talk fo me an da pries guys,
Dey ony put on top dem small kine bandage
Cuz dey tink da peopo not importan.
Dey tell, ‘Erything stay okay!’
But no mo notting stay okay!
12 ✡ 8:12: Jer 6:12-15You tink dey come shame cuz dey do pilau kine stuff?
Nah! Dey no mo shame!
Dey no even know how fo ack jalike dey shame!
Az why dey goin fall down
Wit da odda peopo dat get kill.
I goin bring dem down
Wen I come fo punish dem!”
Az wat Da One In Charge tell.
13 Dis anodda message too, from Da One In Charge:
“I goin take away da food dey stay harves.
No goin get grapes on top da grape plants.
No goin get figs on top da fig trees.
All da leafs goin dry up an fall down.
All da tings I wen give dem,
I goin take away from dem,
An goin go some odda place!”
14 Da peopo goin tell, “How come us guys stay sit in dese small towns?!
Go come, us go run away togedda
To da towns dat get one strong wall.
Fo shua us goin mahke ova dea,
Cuz oua God, dass Da One In Charge a us, tell we goin mahke.
Jalike he give us poison watta fo drink
Cuz we wen do bad kine stuff agains him.
15 Us guys like eryting stay okay,
But no mo notting good happen.
Us guys like fo notting bad happen to us,
But us guys ony stay real sked.
16 From da Dan ohana land north side
We hear da noise
From da horses dat da army guys use dat stay agains us!
Wen dea strong horses make noise,
All da Judah peopo stay shake an come sked.
Da army guys stay come
Jalike dey goin eat up da land an eryting inside um,
An Jerusalem town an all da peopo dat stay live dea.”
17 Dis da message from Da One In Charge: “Dis wat I goin do.
I goin sen da army guys all ova wea you guys stay live,
Dey jalike poison snakes!
No mo nobody can make dem come tame.
Dey jalike snakes, an dey goin bite you guys!”
Jeremiah Cry Fo Da Jerusalem Peopo
18 Jeremiah tell, “I real sad!
No way I can come good from dat!
Inside, I come weak.
19 Lissen how da peopo dat I get love an aloha fo
Cry fo me help um
From da lands dat stay far away.
Dey tell: ‘Da One In Charge, he no stay Mount Zion, o wat?
No mo da King ova dea, o wat?’ ”
Da One In Charge tell,
“Dey try make me come huhu
Cuz a dea idol kine gods,
Dea gods from anodda place dat good fo notting?”
20 Jeremiah tell,
“Da time fo harves da food come awready.
Da summa fruits, pau awready.
But no mo nobody get us guys outa trouble yet.
21 Da peopo I love, dey all bus up.
Az why me too, I stay all bus up inside.
I stay real bum out an real sked.
22 Fo shua, Gilead side get medicine
An docta ova dea!
Cuz da peopo I love stay hurt.
So, how come no mo nobody fo make um feel good?!”