12
Jeremiah Grumble To Da One In Charge
1 “You, Da One In Charge.
You erytime judge da right way
Weneva I tell you I get one problem.
Still yet, I like talk to you
Bout how you tink wass right an wass wrong.
How come da bad kine guys come out okay erytime, aah?!
How come all da peopo dat you no can trus live one easy kine life?!
2 You wen plant dem jalike one tree,
An dey stay solid, an dey get strong roots.
Dey get good kine stuffs, jalike one tree grow an get fruit.
Dey erytime tell, ‘Da One In Charge stay tight wit us guys,’
But inside, dey no stay tight wit you.
3 But you Da One In Charge, an you know me.
You see wat I stay do,
An you tes how I tink bout you.
Drag dose guys away jalike dey sheeps ready fo da meat market!
Pick dem fo kill, wen da time come fo kill dem!
4 “Da land stay coming all dry,
An da grass inside ery field stay come wipe out,
An da animals an birds go way awready.
Cuz da peopo dat live inside dat land do bad kine stuff.
How long moa, till you goin make dem stop?!
An dose bad peopo stay tell,
‘God no give a rip wat happen to us guys!’ ”
Da One In Charge Tell How Stay
5 Da One In Charge tell,
“If you wen run one race agains odda guys,
An dey make you come tired,
How you goin run agains horses?! No way!
If you stay shua you can handle ony wea da land stay safe,
How you goin walk thru da thick bushes by da Jordan Riva?! No can!
6 Even yoa braddahs an yoa ohana peopo,
Dey stab you in da back.
Dey go all out fo talk bad bout you.
But no trus dem, no matta dey talk nice to you.”
7 Da One In Charge tell:
“I goin leave my ohana an let um hang.
I goin bag from da peopo dat stay mines.
I goin let da peopo I love
Suffa from da guys dat stay agains dem.
8 Da peopo dat stay mines
Come afta me
Jalike one lion inside da fores.
Jalike da lion stay make big noise at me.
Az why I make to dem jalike I hate dem.
9 Da peopo dat stay mines,
Dey come jalike one scavenja dat like eat me.
Jalike get wild hyenas,
Wit scavenja birds all aroun um.
Go bring all da wild kine animals fo eat up my peopo!
10 “Get plenny leada guys from anodda place
Goin wase wat I wen plant.
Dey goin walk all ova my field.
Dey goin bus up my nice place!
(I stay talking bout wat dey goin do to my peopo!)
11 Goin come one wasted place.
Make me come sore inside wen I see dat empty land.
Da whole land stay bus up
Cuz no mo nobody kea bout um.
12 On top all da hill tops inside da boonies wea no mo notting can grow
Goin get plenny guys dat like come rip off stuff.
Cuz goin get war!
Jalike Da One In Charge use his sword fo kill da peopo
From one side a da land to da odda side!
No goin get nobody stay safe ova dea.
13 Da peopo goin plant wheat
But ony thorns dey goin harves.
Dey bus ass an come tired,
But dea work no goin help dem notting.
I like fo dem come shame cuz no mo wheat fo harves,
Cuz Da One In Charge stay real huhu wit dem!”
Message Fo Da Odda Nations
14 Dis wat Da One In Charge tell: “All da real bad kine peopos dat live nea me, dey like grab da land I wen give to my Israel peopo fo come dea property. I goin throw out dose bad peopos from dea land. But I goin throw out da Judah ohana from dea land too! 15 An afta I throw out all dose diffren peopos from dea place, I goin show love an pity fo dem, an bumbye I goin bring all dem back to dea property an dea land. 16 Dey goin learn fo real kine how my peopo suppose to ack. So den wen dey make one strong promise, dey goin tell lidis, ‘Jalike fo shua Da One In Charge stay alive.’ (Az not like befo time, wen da odda peopos wen teach my peopo fo use Baal name wen dey make one promise.) But if dey learn eryting bout me, Da One In Charge, den I goin let dem get da same rights my peopo get. 17 But if get peopo dat no lissen, I goin throw dem out from dea place an wipe um out.” Az da message from Da One In Charge.