13
Da Linen Malo
1 Dis wat Da One In Charge tell me: “Go buy one linen kine malo fo put aroun yoa wais. Put um on, but no wash um.” 2 So I buy um, jalike Da One In Charge tell me, an put um aroun my wais.
3 Den Da One In Charge tell me one mo time: 4 “Take da linen kine malo you wen buy dat you stay wear aroun yoa wais, an go da Perat Stream. Hide um ova dea inside one big crack inside da rocks.” 5 So I wen go an hide um Perat side inside da crack, jalike Da One In Charge wen tell me fo do.
6 Long time afta dat, Da One In Charge tell me, “Now go Perat, an get da malo I wen tell you fo hide ova dea.” 7 So I go Perat an dig up da malo, an bring um from da place wea I wen hide um. But now poho da cloth, an stay good fo notting.
8 Den Da One In Charge give me dis message: 9 “Dis how I goin make eryting come poho fo da Judah an Jerusalem peopo, cuz dey ack high makamaka. 10 Dese peopo, dey real bad. Dey no like lissen wat I tell um. Dey ony like do wat dey like do, cuz dey hard head. An dey go afta gods dat not dea god, fo dem work fo dose gods, an go down an show respeck fo dem. Cuz a dis, dey goin come jalike dis malo, good fo notting. 11 Jalike one malo stay tight aroun one guy wais, az how I wen tie da whole Israel an Judah ohanas aroun me. Den dey come my peopo. Az how odda peopo goin find out wat kine god me, an talk good bout me, an show respeck fo me. But my Israel an Judah ohanas still neva lissen.” Az da message from Da One In Charge.
Da Jars Fo Put Wine Inside
12 “Da One In Charge tell me fo tell da peopo dis: 13 Tell um: ‘Dis wat Da One In Charge tell: I da One goin fill up all da peopo inside dis land fo dem come piloot—da king guys from da David ohana dat sit on top his throne, da pries guys, da guys dat suppose to talk fo me, an erybody inside Jerusalem. 14 Den I goin smash um agains each odda jalike dey clay wine jars. I goin even smash da faddah-muddah guys agains dea kids too, all togedda. I no goin show pity fo dem, o make easy kine to dem, o give dem chance. I goin wipe um out.’ ” Az da message from Da One In Charge.
Da Prisona Guys
15 Lissen up, you Judah peopo! No ack high makamaka!
Do wat Da One In Charge tell you fo do!
16 Tell erybody right now
Dat yoa God, Da One In Charge, stay awesome.
Cuz if you wait, Da One In Charge goin make you guys come bum out,
Jalike he goin make eryting come dark fo you,
An jalike he make you guys trip an fall down on top da mountains
Wen come litto mo dark.
You guys stay wait fo light come,
But Da One In Charge goin make eryting come real dark
Jalike you stay inside one skery big black cloud.
17 But if you no lissen wat I tell,
I goin go hide an cry,
Cuz you guys ack high makamaka.
I goin cry real hard wit plenny tears,
Cuz da peopo a Da One In Charge all goin come prisonas.
One Message Fo King Koniah
18 Go tell da king an da queen muddah dis:
“Go come down from yoa thrones. Sit in da dirt an come notting.
Cuz yoa beautiful crowns
Goin come down from yoa head.”
19 Fo da big towns South Judah side,
Da gates goin stay shut.
No goin get nobody dea fo open um.
All da Judah peopo goin go way cuz dey prisonas,
Erybody goin go!
20 Look, you Jerusalem guys! You no can see
Da army guys dat stay come from da north side, o wat?!
So! Wea da peopo Da One In Charge tell you fo take kea dem?!
Dey jalike uku pile a sheeps
An you guys wen talk big bout dem!
21 You guys wen work hard
Fo make da Babylon peopo tink
You guys dea frenz.
So den! How you guys goin handle bumbye
Wen Da One In Charge put dem in charge a you guys?!
You guys goin come real sore,
Jalike one wahine ready fo born one bebe!
22 Wen you guys start fo tink, “How come all dis stay happen to us?”
All dis happen cuz you guys stay do plenny bad kine stuff.
Az why dea army guys goin rip off yoa clotheses
An rape you!
23 You tink da Sudan guys can change dea skin color?!
No can!
You tink da leopards can change dea spots?
Not even!
Same ting fo you guys.
No way you can change an do good kine stuff!
You ony know how fo do bad kine stuff!
24 Dis one message from Da One In Charge:
“I goin make you guys go all ova da place.
Jalike da wind from da boonies dat blow da junks from da wheat all ova da place.
25 Dis wat goin happen to you guys.
I wen measure awready wat goin happen,
Cuz you guys wen foget me, Da One In Charge.
You wen trus da fake idol kine gods.
26 Jalike I pull up yoa robe ova yoa face.
An erybody goin see yoa shame.
27 I wen look an see da pilau kine tings you guys do
On top da hills in da countryside.
You guys fool aroun wit da guys an wahines
Dat not yoa husban o wife.
You guys come hot up an fool aroun fo money.
Bummahs, you Jerusalem peopo!
How long you goin stay pilau?”