15
No Mo Pity Fo Da Judah Peopo
1 ✡15:1 a: Outa 32:11-14; Census 14:13-19; b: 1Sam 7:5-9Den Da One In Charge tell me: “No matta if Moses an Samuel stay stan in front me praying, no way I goin feel pity fo dis peopo! Take dis peopo away from me! 2 ✡15:2: JShow 13:10If dey tell you, ‘Wea we goin go?’ tell um, ‘Dis da message from me, Da One In Charge:
“ ‘Da ones dat suppose to mahke cuz dey sick goin mahke from dea sick.
Da ones dat suppose to mahke cuz a war goin mahke cuz a war.
Da ones dat suppose to mahke cuz no mo food goin mahke cuz no mo food.
Da ones dat suppose to come prisonas goin come prisonas.’ ”
3 Da One In Charge tell: “I goin sen four kine tings fo wipe dem out: guys wit swords fo kill dem, da dogs fo drag da bodies out, da birds inside da sky, an da wild animals inside da fields fo eat um up an wipe um out. 4 ✡15:4: 2Kings 21:1-16; 2Rec 33:1-9I goin make all da diffren peopos an dea kings come bum out all ova da earth cuz a wat Manasseh, King Hezekiah boy, wen do inside Jerusalem.”
5 Da One In Charge tell:
“Who goin show pity fo you Jerusalem peopo? Nobody!
Who goin cry fo you guys cuz dey stay sad inside? Nobody!
Who goin go by you an aks how you stay? Nobody!”
6 Dis, da message from Da One In Charge:
“You guys da ones dat bag from me awready.
You guys no give a rip an you go way from me.
So I goin grab you guys an wipe you out.
I had it awready!
I no goin show you love an pity no moa!”
7 Den Da One In Charge tell:
“I goin judge da Judah peopo
Wea da judges come togedda inside dea towns all ova da land,
Jalike peopo throw da wheat in da air
Fo da wind blow away da junks.
I goin wipe dem out
An make shua dea kids mahke,
Cuz dey no change wat dey do.
8 I goin make dem get mo plenny widows
Den da ocean get sand.
Noon time, I goin bring somebody
Fo wipe out da young guys.
Right den an dea I goin make dea muddahs
Come sore inside an stay real sked.
9 Even da muddahs dat wen born seven boys
Goin come weak an pass out.
All dea boys gone awready.
Jalike da sun no shine fo dem no moa, even if stay day time.
Dey goin come shame, an donno wat fo do!
Da res a da guys dat stay alive still yet
I goin make da guys dat stay agains dem make war an kill um.”
Az da message from Da One In Charge.
10 Den I tell: “Bummahs! Cuz my muddah wen born me
Fo be da kine guy dat dis whole land like fight me
An fight bout me.
But I neva len nobody notting,
An nobody borrow notting from me.
Still yet, dey all like put kahuna on top me!”
11 Da One In Charge tell:
“Garans I goin get you outa dis
Fo eryting come good fo you, Jeremiah.
Garans I goin make da peopo dat stay agains you
Come aks you fo help dem wen dey in trouble an get hard time.
12 “You tink one guy can broke da army dat goin come from da north,
Jalike somebody broke iron an bronze metal? No can!
13 All da rich kine stuff you guys get,
I goin let da army guys dat come rip um off.
Dey no goin buy um,
Cuz a all da real bad kine stuff you guys do
All ova yoa country.
14 I goin let da peopo dat stay agains you guys
Take you guys away
Inside one land you guys donno from befo time.
I goin do all dis cuz I stay real huhu wit you guys,
Jalike one hot burning fire.”
15 Den I tell: “You Da One In Charge, you know how I stay.
No foget me! You gotta take kea me.
Pay back da peopo dat stay come afta me.
No wait long time fo get mad wit dem.
You gotta get me outa dis!
You know how dey make me come shame
Cuz I yoa guy.
16 Wen I hear wat you tell, I lissen real good,
Jalike I stay eat um up!
All dat make me stay good inside,
Make me like dance an sing.
Cuz peopo know I stay tight wit you!
Da One In Charge, you da God Ova All Da Armies!
17 I neva hang out wit peopo dat like good fun
An make big party wit dem.
I ony stay wit nobody, cuz you stay in charge a me,
An cuz you make me come plenny huhu wit dose peopo.
18 How come I still stay suffa?
An how come my plenny sores no heal, an no like come good?
You goin come
Jalike one small stream
Dat stay all dry up, o wat?!
You goin come jalike one puka
Dat no can trus fo get watta inside, o wat?!”
19 Az why Da One In Charge tell me dis:
“Jeremiah, if you come sorry an change,
I goin let you come back by me
An work fo me one mo time.
If you tell me stuff dat good fo me hear,
An no tell wase time kine stuff,
You can talk fo me one mo time.
Let dese peopo come do stuff yoa way,
But you betta not do stuff dea way!
20 I goin make you come jalike one bronze wall
Dat dese peopo no can broke down.
Dey goin make war agains you,
But dey no goin win ova you.
Cuz I stay wit you
Fo get you outa trouble.
Dass me, Da One In Charge, tell you dis!
21 “I goin get you outa da trouble
Dat da bad kine guys like make fo you.
I goin buy you back so da guys no goin grab you
An make you come sked.”
✡15:1 15:1 a: Outa 32:11-14; Census 14:13-19; b: 1Sam 7:5-9
✡15:2 15:2: JShow 13:10
✡15:4 15:4: 2Kings 21:1-16; 2Rec 33:1-9