Da Job Story
1
Da Guy Job
1 Had one guy Job. He live da Uz land. Dat guy, no mo nobody poin finga him. He erytime do da right ting. He get awesome respeck fo God, an stay away from da bad kine stuff. 2 He get seven boys an three girls. 3 He own seven tousan sheeps three tousan camel, five hundred pair cows, an five hundred donkey. He get plenny guys work fo him. From all da peopos from da east side, he da mos importan guy.
4 Dis how Job stay away from do bad kine stuff: His boys take turns fo make one big luau inside dea houses, one afta da odda. An dey tell dea three sistahs fo come eat an drink wit dem. 5 Ery year, wen dey pau make all da big luau, Job sen one message fo dem come make one religious kine ceremony fo dem stan in front God. Den early morning time, he make one burn up kine sacrifice fo ery kid. Cuz he tink, “Maybe my kids wen do someting bad an tink bad kine stuff bout God.” Az how Job do erytime.
Da Firs Tes Fo Job
6 ✡ 1:6: Start 6:2One time, da ones dat live wit God come fo stan in dea place in front Da One In Charge fo lissen wat he like um do. An da One Dat Stay Agains God come wit dem too. 7 Da One In Charge tell Da One Dat Stay Agains God, “Wea you wen come from?”
Da One Dat Stay Agains God tell Da One In Charge, “I stay go all ova da world, checking out hea an dea.”
8 Den Da One In Charge tell Da One Dat Stay Agains God, “Wat you tink bout my worka guy Job? No mo nobody on top da earth stay jalike him. He one guy no mo nobody poin finga him. He erytime do da right ting. He get awesome respeck fo me, God, an he stay away from da bad kine stuff.”
9 ✡ 1:9: JShow 12:10Da One Dat Stay Agains God tell, “You tink Job get awesome respeck fo you fo notting? Nah! 10 You da one wen put jalike one fence all aroun him an his ohana, an aroun eryting he get. You stay make eryting he do come good, fo his sheeps an cows go all ova da land. 11 But you know, if you use yoa powa, an wack eryting he get, fo shua he goin talk bad bout you in yoa face!”
12 Da One In Charge tell Da One Dat Stay Agains God, “Kay den. I give you da powa ova eryting Job get. Ony one ting—no hurt Job!”
Den Da One Dat Stay Agains God go out from in front Da One In Charge.
13 One day, Job boys an girls stay make one big luau an drink wine inside dea mos ol braddah house. 14 But one messenja guy come by Job. He tell, “Da worka guys wen stay plow wit cows, an da donkeys stay grind grass nea dem. 15 Da steala guys from Shava go attack dem! Dey take away da animals, an kill yoa worka guys wit dea swords! Me, I da ony one dat get away fo come tell you dis!”
16 Befo dat guy pau talk, anodda messenja guy come. He tell, “Get fire from God fall down from da sky an burn up da sheeps an da worka guys! Me, I da ony one dat get away fo come tell you dis!”
17 An befo dat guy pau talk, anodda messenja guy come. He tell, “Da Kaldea guys make three gangs fo jump yoa camels an take um away. Dey kill yoa worka guys! Me, I da ony one dat get away fo come tell you dis!”
18 Befo da odda guy pau talk, anodda messenja guy come. He tell, “Yoa boys an girls stay make one big luau, an drink wine inside dea mos ol braddah house. 19 An right den an dea, one tornado kine wind come from da odda side a da boonies, an hit ery side a da house! Da house fall down on top da young guys, an dey all mahke! Me, I da ony one dat get away fo come tell you dis!”
20 Wen Job hear dat, right den an dea he stan up an rip his clotheses an shave his head fo show he stay sad inside. Den he go down an put his face on top da groun. 21 He tell,
“Wen I come outa my muddah belly,
I stay naked, no mo notting!
Wen I leave dis world,
I no goin get notting!
Da One In Charge give,
An Da One In Charge take away.
I goin talk good bout Da One In Charge
Cuz I know wat kine god him!”
22 No matta all dis stuff happen, Job no do notting bad. He no talk jalike God do someting wrong.