12
Da Wahine An Da Dragon
1 Den, jalike one dream, I see one big, awesome ting inside da sky. Was one wahine wit da sun fo her clotheses, an da moon unda her feets, an one crown wit twelve stars on top her head. 2 She hapai, an she stay cry, cuz real sore fo born her bebe!
3 ✡12:3: Dan 7:7Den I see anodda awesome kine ting inside da sky. Get one big, red dragon. He get seven head an ten horn, wit seven small crown on top da seven head. 4 ✡12:4: Dan 8:10Da Dragon tail sweep some a da stars outa da sky, an throw um down to da groun: one star from ery three stars. Da Dragon stan in front da wahine dat goin born one bebe, fo him eat her bebe as soon as he born. 5 ✡12:5 a: Isa 66:7; b: Songs 2:9She born one boy. He goin be da King fo lead all da diffren peopos on top da earth. He goin carry one king kine stick dat get iron on top fo show he in charge. But God grab up da boy an bring um to God an to God throne. 6 Den da wahine run to da boonies, to one place dat God wen make ready fo her, an somebody take kea her three an a half year.
7 ✡12:7: Dan 10:13, 21; 12:1; Jude 1:9Den get war inside da sky. Michael an his angel messenja guys fight da Dragon, an da Dragon an his bad angel messenja guys fight back wit dem. 8 But da Dragon guys not strong, az why dey no can stay inside da sky wit God no moa. 9 ✡12:9 a: Start 3:1; b: Luke 10:18Da big Dragon, God throw um outa da sky. Dass da ol snake. Dey call um da Devil an Satan, Da One Dat Stay Agains God. He bulai all da peopo inside da world. God throw him an his angel messenja guys down on top da earth.
10 ✡12:10: Job 1:9-11; Zek 3:1Den I hear one loud voice inside da sky dat tell,
“Now da time!
God goin take us outa da bad kine stuff we stay in!
An show us dat he da King,
An he get all da powa!
His Spesho Guy Christ get da right fo lead erybody!
Cuz da Bad Guy dat wen poin finga
Oua braddahs an sistahs all day an all nite,
God throw him down hea awready on top da earth.
11 Oua braddahs an sistahs wen win ova da bad kine stuff,
Cuz dey trus God Bebe Sheep Guy.
He wen bleed an mahke fo dem.
An dey wen tell dat dey trus him.
Dey not even sked fo give dea life fo mahke!
12 So, erybody dat stay wit God inside da sky, dance an sing!
But horraz to you guys on top da earth an da ocean!
Cuz da Devil wen go down by you guys!
He stay real huhu,
Cuz he know he ony get litto bit mo time lef!”
13 Wen da Dragon see dat God wen throw um down to da earth, he chase da wahine dat wen born da bebe boy. 14 ✡12:14: Dan 7:25; 12:7God give her two wings jalike one big eagle fo fly to da place wea he wen make ready fo her inside da boonies. Ova dea he goin take kea her fo three an a half year, an da Dragon no can touch her.
15 Den da Dragon blow out plenny watta outa his mout, jalike one riva fo him grab da wahine an take her away. 16 But da groun help her. Da groun open up one crack, an swallow up da watta dat da Dragon blow outa his mout. 17 So da Dragon come real huhu wit da wahine, an go way fo fight her odda kids. Dass erybody dat do wat God tell um fo do, an tell all da true stuff bout Jesus.
18 Den da Dragon go stan on top da beach by da ocean.
✡12:5 12:5 a: Isa 66:7; b: Songs 2:9
✡12:7 12:7: Dan 10:13, 21; 12:1; Jude 1:9
✡12:9 12:9 a: Start 3:1; b: Luke 10:18
✡12:10 12:10: Job 1:9-11; Zek 3:1