22
Elifaz Talk Mo To Job
1 ✡ 22:1: Job 35:6-8Den Elifaz da Teman guy tell Job:
2 “Eh Job! You tink one guy can help God, o wat?
You tink God can use one guy dat undastan stuff, o wat?
3 You tink you goin make Da God Dat Get All Da Powa feel good inside,
Jus cuz you do da right ting?
If da way you live, you no mo blame fo notting,
Wat dat do fo him, aah?
4 “You tink he punish you cuz you get choke respeck fo him, o wat?
An he judge you fo dat?
5 Nah! All dis gotta be, cuz you do plenny bad kine stuff!
Fo shua, you stay do wass wrong an you no can stop!
6 Cuz dis gotta be wat you stay do:
You let yoa braddah guys borrow money from you.
Den you make um give you plenny stuffs
Fo make shua dey goin pay back wat dey owe you.
You know dey no goin bulai you.
But you even take dea clotheses an leave dem naked.
7 Mo like you neva give watta to peopo dat stay thirsty.
You hold back food from da hungry peopo.
8 Jalike peopo tell: ‘Anybody get powa, dey own da land,
Dass wea da importan peopo live.’
9 You sen da widows away an no give um notting.
Wen da kids dat no mo faddah go by you, dey lose fight.
10 Az why get traps all aroun you.
Az why right den an dea you come real sked.
11 Az why dark time you no can see notting.
Az why da big watta cova you.
12 “God stay da mos high place inside da sky.
He look down at da mos high stars!
13 But you tell, ‘Fo shua, God donno wassup!
He no can judge cuz eryting in da middo stay dark.
14 Da tick kine clouds hide him,
Fo him no see us guys,
Wen he walk inside da mos high place in da sky.’
15 You goin stay live da same way jalike yoa ancesta guys wen live?!
Cuz az da way da bad guys live!
16 You know da big flood grab dem befo da time dey suppose to mahke,
Jalike wen da big watta wash away da foundation fo one house.
17 Dey da ones tell God, ‘No bodda us guys!
Da God Dat Get Mo Powa Den All Da Odda Gods,
He no can do notting to us!’
18 Still yet, God was da One wen fill up dea houses wit good kine stuffs.
But me Elifaz,
Wen da bad kine guys tell me wass da bestes ting fo do,
No ways I goin lissen!
19 “Da guys dat do da right kine stuff,
Wen dey see bad kine tings happen to da bad guys,
Dey stay good inside.
Da peopo dat neva do notting wrong,
Dey make fun a da bad guys.
20 Dey tell: ‘Fo shua, da guys dat stay agains us come wipe out awready!
Da fire burn up all dea rich kine stuffs dat still stay!’
21 “Go come tight wit God! Make eryting come good wit him!
Wen you do dat, good kine stuff goin happen to you.
22 You betta take wat he teach you.
Put eryting he tell you inside yoa head.
23 If you come back to Da God Dat Get All Da Powa an be his guy,
An take eryting dat no stay right far from yoa tent,
God goin build you up one mo time.
24 So throw way gold jalike az ony dirt,
An throw out yoa Ofir kine gold inside da gulches jalike az rocks.
25 Den Da God Dat Get All Da Powa goin be jalike gold fo you.
He goin be jalike uku pile a silva fo you.
26 Cuz den fo shua you goin stay good inside
Bout Da God Dat Get All Da Powa.
You no goin come shame fo face God.
27 You goin pray to him an he goin lissen.
An you goin do da tings you wen make one strong promise fo do.
28 Wat you make up yoa mind fo do goin happen fo you.
An da light goin shine on top wat you do.
29 Cuz God take down da ones dat talk big cuz dey make high makamaka!
But da ones dat not lidat,
God goin get dem outa trouble.
30 Fo shua God get peopo outa trouble dat no stay clean inside,
Cuz now you no do wass wrong.”