Job Talk Moa
1 Den Job tell Elifaz:
2 “Fo shua, today I still goin squawk,
An I goin soun jalike I go agains God,
An suffa even if I moan.
3 I like know wea fo find God, but I no can find him!
I like go his place!
4 I like tell him wat happen to me,
An make argue wit him plenny.
5 I like find out how he goin ansa me,
An I like undastan wat he goin tell me.
6 You tink he goin use his powa fo make argue wit me?
Fo shua, he goin lissen me!
7 I stay do da right kine stuff.
Az why I can tell him how come I do wat I do.
An God my Judge goin tell I no do notting wrong,
Az why I no need go back to him no moa.
8 “But eh! I go da east side, he not dea.
I go da west side, he not dea too.
9 Wen he do stuff da north side, I no see him.
Wen he turn da south side, I still no see him.
10 But still yet, he know wat way I pick.
Wen he tes me, I goin come jalike pure gold.
11 Jalike my feets follow wea evas he step.
I make shua I stay tight wit him, an no turn away.
12 I no go bag from wat he tell fo do.
I lissen good wat he tell.
Cuz I know az jalike rich kine stuffs he give me,
An dass mo betta den da food I eat ery day.
13 “But God, he da ony God dass fo real.
No mo nobody can make him change his mind.
He do wateva he like do.
14 Cuz he goin make happen wat he plan fo do fo me.
An he get plenny mo plan fo wat he goin do fo me.
15 Az why bodda me plenny fo stan in front him.
Wen I tink bout all dis, I plenny sked a him.
16 Az God, da One wen make me lose fight.
Da God Dat Get All Da Powa make me come real sked a him.
17 But wen he make eryting come dark aroun me, dat no make me stay quiet,
Not even wen da dark stuff cova all ova me.”