24
Job Talk Moa
1 “Bummahs, dat Da God Dat Get All Da Powa
No tell wat day he goin judge da bad peopo!
Bummahs, dat even da peopo dat know him
Gotta wait fo see him judge da bad peopo!
2 Get guys dat move da stones
Dat mark da edges a da land dat stay da property a anodda guy.
Az how dey steal da odda guy land.
Dey rip off animals.
Den dey take um wea get good grass,
Jalike dey own um.
3 Dey take away da donkey from da kids
Dat no mo faddah o muddah.
Wen one widow borrow money,
Dey take her cow fo make shua she goin pay um back.
4 Dey push off da road da peopo dat need kokua.
You know da peopo inside da land dat no mo notting, aah?
Dese guys make all dem go hide!
5 You know, az jalike da wild donkeys inside da boonies.
Da peopo dat no mo notting gotta go out early.
Dey bus ass fo scrounge food hea an dea.
Da boonies give da donkeys an da pooa peopo food fo dea kids.
6 Dey go da fields fo harves dea food.
Dey pick da lef ova grapes
From da grape fields dat da bad guys own.
7 Dey no mo clotheses, so dey sleep naked nite time.
Dey no mo notting fo cova dea body wen cold.
8 Wen dey stay in da mountains,
Dey get wet from da heavy rain.
Dey sit close to da cliffs fo stay warm, cuz dey no mo roof.
9 Da bad kine guys lend money to da widows dat no mo notting.
Den wen da pooa widows no can pay up, da bad guys grab dea bebe.
Dey even grab da bebe from da muddah breas,
Fo keep um till da muddah pay dem back!
10 Da peopo dat no mo clotheses walk aroun naked an hungry.
Dey work fo carry wheat fo dea boss,
But dey still no mo notting fo eat.
11 Dey work in da middo a da stone walls dat make rows fo da olive trees.
Dey smash da olives fo get oil, but no can use um.
Dey step da grapes fo get juice, but still yet dey thirsty an no can drink um.
12 Inside Jerusalem town, da ones dat stay dying, stay moan.
An da peopo dat stay hurt yell fo somebody come help dem.
But God no lissen wen dey pray.
13 “Get peopo dat no like fo da daylight come.
Dey no give a rip how dey suppose to ack wen get light!
Dey no like use da light fo wat odda peopo use um fo.
14 Da killa guys get up wen firs come litto bit light,
Fo dem kill da peopo dat no mo notting an need plenny.
Nite time, dey go out jalike da steala guys.
15 Da guys dat fool aroun somebody wife,
Dey wait till almos dark, cuz dey tink, ‘Nobody goin see me.’
Dey hide dea face.
16 Nite time, get guys broke inside houses.
But day time dose guys shut da door fo stay inside dea houses.
Dey donno da light.
17 Dey all like da real dark nite,
Cuz fo dem, az jalike morning time fo go work.
Dey all know bout da skery kine stuff dat happen wen real dark!
18 “I like da bad guys disappea jalike da foam on top da watta.
I like da land dey own get kahuna on top um,
Fo nobody even go dea grape fields.
19 Jalike da hot time an da dry time take away da snow watta,
I like fo da Mahke Peopo Place take away da guys dat do bad kine stuff.
20 I like fo even dea muddahs foget dem,
An fo da worms tink dea mahke body sweet fo grind.
I like nobody rememba da bad kine guys.
All da tings dey wen do dat not pono, goin come wipe out,
Jalike one tree dat wen split.
21 I like fo dem marry wahines dat no can get kids,
An afta dey mahke, I like fo dem no can leave notting good fo dea widows.
22 I like God use his powa fo drag away da strong guys.
So dat no matta dey stan strong,
Dey not shua if dey goin stay alive, o dey goin mahke.
23 Maybe God goin let dem tink dey strong an stay safe,
But he watch how dey ack.
24 Fo short time dey stay importan,
But den dey goin disappea.
Cuz God bring um down, jalike da flowas dat dry up.
Da bad guys dry up, jalike wen one farma cut off da heads a da wheat.”
25 “If dis not right, who goin show proof I bulai?
Dey no can tell I wrong!”