32
Elihu Talk
So dese three guys no like talk no mo wit Job. Cuz da way Job see um, he ony do wass right!
But get anodda guy Elihu, dat come real huhu wit Job, cuz Job stay tell dat he do wass right, an he no tell dat God do wass right. (Elihu, he Barakel boy from da Buz blood line dat come from da Ram ohana.) Elihu come huhu wit da three frenz too. Cuz dose guys neva find notting fo tell Job. Dey no can show proof dat Job no get um right. Still yet dey poin finga him. Elihu wen wait till Job pau talk cuz da odda guys all mo ol den him. But wen he know dat da three guys no mo notting fo tell, he come mo huhu.
So den Elihu, Barakel boy from da Buz ohana, tell dis:
“I mo young den you guys, an you guys ol.
Az why I wen hold back,
An I was sked fo tell you guys wat I know.
I wen tink, ‘Da ol guys,
Dey da ones suppose to talk.
Da ol guys suppose to teach peopo
Fo know wat fo do erytime.’
But fo shua,
Da spirit inside peopo dat make um undastan stuff,
Dass wat importan.
Dass wat Da God Dat Get All Da Powa breave inside um,
An dass wat help peopo fo undastan stuff.
Da ol guys, dey not da ony ones know wat fo do erytime.
Az not jus da guys dat real ol
Dat undastan wass right an wass wrong.
 
10 “Az why I tell dis: Lissen to me too.
I goin tell you guys wat I know.
11 Eh look! I wen wait hea wen you guys talk.
I lissen how you guys undastan stuff,
Wen you try find how fo tell wat you mean.
12 I wen lissen real good to you guys.
But you know wat?!
You guys neva show proof dat Job wrong!
No mo nobody ansa da stuff Job wen tell!
13 No good you guys tink, ‘Us guys, da ones find out how fo know wat fo do erytime.
God da ony one can blow away wat Job tink—peopo no can!’
14 But Job no argue wit me.
An wen I argue wit him,
No goin be da same way you guys argue wit him.
 
15 “Job, yoa three frenz futless awready,
An dey no can ansa notting.
Dey no can tink bout wat fo tell.
16 So I gotta wait still yet, o wat?!
Cuz dey no mo notting fo tell.
Dey ony stan dea an no tell notting.
17 Me, I goin talk too.
I goin tell wat I know.
18 Cuz I get plenny stuff fo tell.
Da spirit inside me, push me fo talk.
19 Inside, I stay jalike da wine inside one goat skin dat no mo puka.
Jalike new goat skins dat stay full a wine an ready fo bus open.
20 I gotta talk! Den I can res.
I gotta open my mout an ansa Job.
21 I no stay ack jalike one guy mo betta den anodda guy.
I no goin sweet talk nobody.
22 Cuz if I fo real kine wen know how fo sweet talk somebody,
Da One dat wen make me, he goin wipe me out!”