34
Elihu Still Tink Job Do Wass Wrong
1 Den Elihu tell:
2 “Eh, you guys dat know wat fo do erytime! Lissen wat I tell.
Eh, you guys dat wen learn plenny! Lissen up!
3 Cuz us guys tes wat we hear,
Jalike oua tongue taste wat we eat.
4 Good, us guys make up oua mind
Bout wat stay right bout wat Job tell.
Good, us guys learn togedda da part dat stay good.
5 Cuz Job tell, ‘No matta I neva do notting wrong,
Still yet, God take away my rights!
6 No matta I neva do notting wrong,
He ack jalike I bulai.
No matta I neva go agains him,
Az jalike he shoot one arrow fo hurt me,
An no mo notting goin make me come mo betta.’
7 No mo nobody jalike Job!
Easy fo him talk bad bout God,
Jalike easy fo him drink watta.
8 He get bad guys fo his frenz.
He hang out wit da kine guys dat do wass wrong.
9 Cuz Job tink, ‘Wase time,
Fo try make God stay good inside bout one guy.’
10 “Az why you gotta lissen me, you guys dat undastan plenny!
No ways God goin do someting bad!
No ways Da God Dat Get All Da Powa goin do wass wrong!
11 ✡34:11: Songs 62:12Cuz God pay peopo fo wat dey wen do.
He make tings happen to erybody
Dat go wit wat dey wen do, good o bad.
12 Fo shua, God no goin do wass wrong!
Da God Dat Get All Da Powa,
No ways he jam up wass right!
13 Who wen pick God fo stay in charge a da earth, aah?!
Who make him da main One ova da whole world?!
Nobody!
14 If he make plan fo take back his Spirit an his breat,
15 Den all da peopo goin mahke togedda.
Fo come dirt one mo time.
16 “Eh Job! If you undastan stuff, den hear dis.
Lissen wat I tell.
17 Somebody dat hate fo do wass right,
You tink dey can be leadas?
You goin poin finga da Strong One dat erytime do wass right?
18 He da One dat tell king guys, ‘You guys worth notting!’
An he tell da alii guys, ‘You guys do bad kine stuff!’
19 He no make mo betta to one prince den he make to anodda prince.
He no make mo betta to da rich peopo den he make to da pooa peopo.
Cuz he wen make all dem.
20 Maybe some a dem mahke right den an dea, in da middo a da nite.
God shake up da regula kine peopo an dey pass away,
An da ones dat get powa, dey gone awready.
He take away da strong guys,
An az God, not da peopo, dat take um away.
21 “God see eryting da peopo do.
He see ery step wea dey walk.
22 Da peopo dat make trouble no can hide
In dark places, o unda dark shadows.
23 God no need put one spesho time
Fo peopo come in front him fo judge dem.
24 He no need aks question bout da high makamaka guys.
He know awready wat dey wen do, so he jus smash um,
An put odda guys in dea place.
25 Az cuz God know eryting dey wen do.
So he throw um out nite time
An dey all come smash up.
26 He wack dose high makamaka guys cuz a da bad kine stuff dey do.
He wack um wea erybody can see um.
27 He punish um cuz dey tell ‘Laytas’ to him.
Dey no even tink bout da way he do tings.
28 Da bad guys make da peopo dat no mo notting yell loud fo God help um.
Wen da pooa peopo yell fo help, God lissen!
29 But if God stay quiet, nobody goin poin finga him.
If he hide his face, nobody can find him.
Still yet, he stay in charge a da peopo an da nations same same.
30 He do dat fo no let nobody make jalike he one king,
Dat ack jalike God no matta,
Cuz God no goin let nobody trap da peopo.
31 “Cuz maybe some guy tell God,
‘I get da blame awready,
But I no goin do no mo wat you no like.
32 Show me wat I wen do wrong but I no can see um.
If I wen do someting wrong, I no goin do um one mo time.’
33 Eh Job! You figga God suppose to pay you good, da way you see um,
No matta you tink az no good wat God tell?!
You da one gotta make up yoa mind, not me!
So tell wat you tink!
34 “Get peopo dat undastan plenny stuff.
Get guys dat know wat fo do erytime.
Wen dey hear me, dis wat dey goin tell me:
35 ‘Job, he talk, but he donno notting.
An he no undastan notting!’
36 Me, I like fo Job get one tes to da max in front one judge,
Cuz he ansa God jalike he one a da kine guys dat do wass wrong!
37 Cuz he do mo plenny bad kine stuff an go agains God too.
He ony make fun a God in front us guys!
He grumble bout God mo an moa!”